༄༅། །ཕྱི་ལོ་ ༢༠༢༡ ཟླ་ ༤ ཚེས་ ༢༥ ཉིན་ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༣༢ ལ་ཕེབས་པའི་འཁྲུངས་སྐར་དུས་ཆེན་གྱི་ཉིན་མོར་ཨ་རིའི་གྲོས་ཚོགས་ཀྱི་ཊོམ་ལེན་ཊོ་སི་འགྲོ་བ་མིའི་ཐོབ་ཐང་རྟོག་ཞིབ་ཚན་པའི་ཚོགས་གཞོན་དང་མང་གཙོ་ཚོགས་པའི་གྲོས་ཚོགས་འཐུས་མི་སྐུ་ཞབས་ཇིམ་མེག་གྷོ་ཝན་ (Jim McGovern) མཆོག་གིས་རྒྱ་ནག་གཞུང་གིས་དགུང་ལོ་ ༦ ནས་བཟུང་བཙན་དབང་གིས་བཙོན་འཇུག་བྱས་པའི་ཀུན་གཟིགས་༧པཎ་ཆེན་རིན་པོ་ཆེ་མཆོག་དང་ཁོང་གི་ནང་མི་རྣམས་ཆ་རྐྱེན་གང་ཡང་མེད་པའི་ཐོག་མྱུར་དུ་གློད་གྲོལ་དགོས་ཞེས་བསྐྱར་ཞུ་གནང་ཡོད།
དེ་ཡང་སྐུ་ཞབས་མེག་གྷོ་ཝན་མཆོག་གིས་གསུང་དོན། ཨ་རིའི་གྲོས་ཚོགས་ཀྱི་ཊོམ་ལེན་ཊོ་སི་འགྲོ་བ་མིའི་ཐོབ་ཐང་རྟོག་ཞིབ་ཚན་པའི་ལས་འགན་གཙོ་བོ་ནི་འགྲོ་བ་མིའི་ཐོབ་ཐང་གི་ཡོངས་ཁྱབ་གསལ་བསྒྲགས་ནང་གསལ་ལྟར། གཞི་རྩའི་འགྲོ་བ་མིའི་ཐོབ་ཐང་ལ་སྐུལ་དེད་དང་སྲུང་སྐྱོབ་བྱ་རྒྱུ་ཡིན། འགྲོ་བ་མིའི་ཐོབ་ཐང་རྟོག་ཞིབ་ཚན་པའི་ལས་དོན་ཁོངས་ནས་གཅིག་ནི་ཆབ་སྲིད་བཙོན་པ་རྣམས་གློད་གྲོལ་ཡོང་བ་ཞུ་གཏུག་བྱ་རྒྱུ་དེ་ཡིན། བཙོན་པ་དེ་རིགས་ནི་ཁོང་ཚོས་དྲག་སྤྱོད་སོགས་ལག་བསྟར་མ་བྱས་ཀྱང་ཁོང་ཚོར་བདེན་པ་དག་སྐྱེལ་གང་ཡང་མེད་པའི་ཐོག་རང་དབང་བཙན་འཕྲོག་བྱས་པ་རྣམས་ལ་ཟེར།རྒྱུན་དུ་མི་དེ་རྣམས་ཀྱིས་དྲང་པོ་དྲང་གཞག་བྱས་པའི་རྐྱེན་གྱིས་བཙོན་དུ་བཅུག་གི་ཡོད། ཡིད་སྐྱོ་དགོས་པ་ཞིག་ལ་འཛམ་གླིང་ནང་ཆབ་སྲིད་བཙོན་པ་ཧ་ཅང་མང་པོ་ཡོད་པ་དང་། དེའི་ཁྲོད་ནས་གཅིག་ནི་ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་ཡིན། ཞེས་གསུངས།
ཀུན་གཟིགས་༧པཎ་ཆེན་རིན་པོ་ཆེ་མཆོག་ནི་དགུང་ལོ་དྲུག་སྐབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པར་ངོས་འཛིན་གནང་ཡོད་པ་དང་། ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་ངོས་འཛིན་ཐད་མེད་དུ་མི་རུང་བའི་ཐུགས་འགན་ཞིག་ཡོད། རྒྱ་ནག་གཞུང་གིས་༧པཎ་ཆེན་རིན་པོ་ཆེ་མཆོག་གནད་འགག་ཆེ་བའི་མི་སྣ་ཞིག་ཡིན་པ་ཤེས་རྟོགས་བྱུང་སྟེ་བཙན་འཁྲིད་བྱས་པ་ནས་བཟུང་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དང་ཁོང་གི་ནང་མི་རྣམས་ད་ཆ་གར་སོང་ཆ་མེད་དུ་གྱུར་ཡོད། འདས་པའི་ལོ་ངོ་ ༢༦ ནང་རྒྱ་ནག་གཞུང་གི་དབང་འཛིན་པ་ཚོས་ཁུངས་སྐྱེལ་ར་སྤྲོད་བྱས་པ་གཅིག་པུ་དེ་ནི་ཁོང་དང་ཁོང་གི་ནང་མི་རྣམས་བདེ་ཐང་ཡིན་ཞེས་པ་དེ་རེད།
སྐུ་ཞབས་མེག་གྷོ་ཝན་མཆོག་གིས་རྒྱ་ནག་གཞུང་གིས་བཤད་པའི་བདེན་སྤང་ལ་དགག་པ་དང་སྦྲགས་རྒྱ་ནག་གཞུང་གིས་ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གི་གནས་སྟངས་ངོ་མ་ཚོད་འཛིན་བྱེད་ཀྱི་ཡོད་པ་ནན་བཤད་གནང་ཡོད།
དེ་བཞིན་སྐུ་ཞབས་མེག་གྷོ་ཝན་མཆོག་གིས། ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གི་འཁྲུངས་སྐར་ལ་ངའི་ལག་རྟགས་ནི་ལོ་ལྟར་དང་འདྲ་བར་ཁོང་དང་ཁོང་གི་ནང་མིར་ཆ་རྐྱེན་གང་ཡང་མེད་པའི་ཐོག་མྱུར་དུ་རང་དབང་སྤྲོད་དགོས་པ་བསྐྱར་ཞུ་བྱ་རྒྱུ་དེ་ཡིན་ཞེས་དང་། གཞུང་སུ་འདྲ་ཞིག་གིས་ཀྱང་རྒྱ་ནག་གཞུང་གིས་བྱེད་བཞིན་པའི་བྱ་སྤྱོད་རྣམས་བདེན་པར་འཛིན་མི་སྲིད་ཞེས་གསུངས།
ད་དུང་ཁོང་གིས་ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་ལ་ཀུན་སྤྱོད་དང་། ཁྲིམས་ཐོག་ནས་བསམ་བློ་དང་དཔྱད་ཤེས། ཆོས་ལུགས་བཅས་ཀྱི་རང་དབང་ཡོད་པས་ཁོང་གློད་གྲོལ་གཏོང་དགོས། སླར་ཡང་ངས་ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གི་འཁྲུངས་སྐར་ལ་འཚམས་འདྲི་ཞུ་རྒྱུ་ཡིན། འདི་ལོར་ངེད་གཉིས་དངོས་སུ་མཇལ་འཕྲད་ཡོང་བའི་རེ་བ་དང་སྨོན་འདུན་ཡོད། ཅེས་གསུངས། །
