༄༅། །ཨ་རིའི་ཕྱི་སྲིད་ལྷན་ཁང་གི་མགྲིན་ཚབ་པ་སྐུ་ཞབས་ནེ་ཌི་པི་ར་ཡི་སི་ (Ned Price) ལགས་ཀྱིས་ཕྱི་ལོ་ ༢༠༢༡ ཟླ་ ༤ ཚེས ༢༢ ཉིན་གོ་ལའི་ཉིན་མོར་རྒྱ་ནག་གཞུང་ལ་ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གང་དུ་ཡོད་མེད་འཕྲལ་དུ་མང་ཚོགས་ལ་གསལ་བཤད་དགོས་པའི་གསར་འགོད་གསལ་བསྒྲགས་ཤིག་སྤེལ་བའི་ནང་འཁོད་དོན། ཕྱི་ལོ་ ༢༠༢༡ ཟླ་ ༤ ཚེས་ ༢༥ ཉིན་ཀུན་གཟིགས་༧པཎ་ཆེན་རིན་པོ་ཆེ་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༣༢ ལ་ཕེབས་པའི་འཁྲུངས་སྐར་དུས་ཆེན་སྲུང་བརྩི་ཞུ་གི་ཡོད། རྒྱ་གཞུང་གིས་ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་བཙན་དབང་གིས་ལོ་བསྟུད་མར་གར་སོང་ཆ་མེད་དུ་གྱུར་བཅུག་ཡོད་པ་མ་ཟད། བོད་མིའི་ཚོགས་སྡེ་ནས་ཁ་བྲལ་དུ་བཅུག་པ་དང་། དེ་བཞིན་བོད་མིའི་ནང་པའི་དབུ་ཁྲིད་གྲགས་ཅན་གྱི་གོ་བབ་དེ་ཡང་ངོས་ལེན་བྱེད་ཀྱི་མེད།
ཨ་རིའི་གཞུང་གིས་བོད་མིའི་ཐུན་མོང་མིན་པའི་ཆོས་དང་། རིག་གཞུང་། སྐད་ཡིག་གི་ངོ་བོ། ཆོས་དད་རང་དབང་བཅས་ལ་རྒྱབ་སྐྱོར་གནང་གི་ཡོད། ང་ཚོའི་ངོས་ནས་གཞུང་གི་ཐེ་བྱུས་མེད་པར་བོད་མི་ཚོས་དད་མོས་གཞིར་བཞག་ཐོག་རང་གི་ཆོས་ཕྱོགས་ཀྱི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་ཀུན་གཟིགས་༧པཎ་ཆེན་རིན་པོ་ཆེ་ལྟ་བུའི་ཡང་སྲིད་ངོས་འཛིན་དང་སློབ་སྤྱོང་གནང་ཕྱོགས་ཀྱི་ཐོབ་ཐང་ལ་བརྩི་བཀུར་ཞུ་གི་ཡོད།
ང་ཚོས་རྒྱ་ནག་མི་དམངས་སྤྱི་མཐུན་རྒྱལ་ཁབ་གཞུང་ལ་ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གང་དུ་ཡོད་མེད་འཕྲལ་དུ་མང་ཚོགས་ལ་ཡོངས་གྲགས་ཀྱི་གསལ་བཤད་དང་། ཀུན་གཟིགས་༧པཎ་ཆེན་རིན་པོ་ཆེ་མཆོག་ལ་མི་དངོས་སུ་མཇལ་འཕྲད་ཀྱི་གོ་སྐབས་གནང་རོགས་ཞེས་འབོད་སྐུལ་ཞུ་རྒྱུ་ཡིན། ཞེས་གསར་འགོད་གསལ་བསྒྲགས་སྤེལ་ཡོད།།
