༄༅། ། ཨ་རིའི་ཕྱི་སྲིད་ལྷན་ཁང་གི་མང་གཙོ་དང་། ངལ་རྩོལ། འགྲོ་བ་མིའི་ཐོབ་ཐང་གོང་འཕེལ་ཚན་པའི་གོ་སྒྲིག་འོག་ཨ་རིའི་ཕྱི་སྲིད་ལྷན་ཁང་གིས་ཕྱི་ལོ་ ༢༠༢༠ ལོའི་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་ཡིག་འབྲུ་ཁྲི་ལྔ་ཅན་གྱི་ལོ་འཁོར་སྙན་ཐོ་ཞིག་བཏོན་གནང་ཡོད།
འདི་ལོའི་ཨ་རིའི་ཕྱི་སྲིད་ལྷན་ཁང་གི་སྙན་ཐོ་ནང་བོད་ནི་རྒྱ་ནག་དང་ཁ་བྲལ་ཐབས་མེད་པའི་ཆ་ཤས་ཤིག་ཡིན་ཞེས་འགྲེལ་བརྗོད་གནང་མེད་པ་ནི་བོད་མིར་མཚོན་ན་རྒྱལ་ཁ་ལྟ་བུ་ཡིན། བོད་མིའི་སྒྲིག་འཛུགས་ནས་དུས་དང་རྣམ་པ་ཀུན་དུ་རྒྱལ་སྤྱིའི་སྟེང་བོད་དོན་ཆེད་ལས་འགུལ་སྣ་མང་སྤེལ་དང་སྤེལ་བཞིན་ཡོད་པ་དང་། ད་ལན་ཨ་རིའི་ཕྱི་སྲིད་ལྷན་ཁང་གིས་བོད་ནི་རྒྱ་ནག་དང་ཁ་བྲལ་ཐབས་མེད་པའི་ཆ་ཤས་ཤིག་ཡིན་ཞེས་འགྲེལ་བརྗོད་གནང་མེད་སྟབས་བྱང་ཨ་རིའི་སྐུ་ཚབ་དོན་ཁང་ནས་དགའ་བསུ་ཞུས་ཡོད།
ཕྱི་ལོ་ ༢༠༢༠ ལོའི་སྙན་ཐོ་ནང་ཨ་རིའི་ཕྱི་སྲིད་ལྷན་ཁང་གིས། རྒྱ་གཞུང་གིས་དམ་བསྒྲགས་ཅན་གྱི་སྲིད་བྱུས་འོག་ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་ད་བར་གར་སོང་ཆ་མེད་དུ་གྱུར་ཡོད་པ་དང་། བོད་ཀྱི་མཁས་པ་ཚེ་རིང་དོན་གྲུབ་ལགས་དང་པོ་ཏཱ་ལའི་དོ་དམ་ཁང་གི་འགན་འཛིན་བགྲེས་པ་རྒན་བསོད་ནམས་ལགས་རྣམ་གཉིས་འཛིན་བཟུང་བྱས་རྗེས་གར་སོང་ཆ་མེད་དུ་གྱུར་བ། སྔ་ལོའི་ཕྱི་ཟླ་ ༩ ནང་ཐོ་འགོད་བྱས་པ་ལྟར། བོད་རང་སྐྱོང་ལྗོངས་དབུལ་སྐྱོར་གསར་སྤེལ་ལས་དོན་ཞེས་པའི་སྲིད་བྱུས་འོག་རྒྱ་ནག་གཞུང་གིས་བོད་ནང་ངལ་རྩོལ་བསྒྱུར་བཀོད་ཁང་ཞེས་པ་གསར་འཛུགས་བྱས་ཏེ་བོད་མི་འབུམ་ལྔ་ལྷག་བཙན་དབང་གིས་ངལ་རྩོལ་བསྒྱུར་བཀོད་ཁང་དུ་བཅུག་ནས་ངལ་རྩོལ་བྱེད་དུ་འཇུག་བཞིན་པ་སོགས་འཁོད་ཡོད།
གཞན་ཡང་སྙན་ཐོའི་ནང་། ཨ་རིའི་སྲིད་འཛིན་ཟུར་པ་སྐུ་ཞབས་ཌོ་ནལ་ཊིམ་ (Donald Trump) མཆོག་གི་སྲིད་གཞུང་ནས་དེ་སྔ་རྒྱ་ནག་དམར་པོ་ཚོགས་པས་ཤར་ཏུར་ཀི་སི་ཐན་གྱི་ཁ་ཆེ་ཡུ་གུར་གྱི་རིགས་རྒྱུད་རྩ་གཏོར་གྱི་ངན་བྱུས་དང་བྱ་ངན་སོགས་སྤེལ་བཞིན་ཡོད་པ་གསལ་འདོན་གནང་བ་ལྟར་ད་ལྟའང་སྙན་ཐོའི་ནང་རྒྱ་གཞུང་གིས་བྱ་ངན་མུ་མཐུད་སྤེལ་བཞིན་ཡོད་སྐོར་ཨ་རིའི་ཕྱི་སྲིད་ལྷན་ཁང་གིས་རྒྱ་ནག་དང་འབྲེལ་བའི་འགྲོ་བ་མིའི་ཐོབ་ཐང་སྙན་ཐོའི་སྡེ་ཚན་ནང་འཁོད་ཡོད།
ཨ་རིའི་སྲིད་འཛིན་སྐུ་ཞབས་ཇོ་བྷཡེ་ཌན་མཆོག་གི་སྲིད་གཞུང་གིས་རྒྱ་ནག་མི་མང་བདེ་འཇགས་ལྷན་ཁང་གིས་སོ་ལྟའི་པར་ཆས་ཁྱོན་ཆེ་བཙུགས་པའི་ཐོག་བོད་རང་སྐྱོང་ལྗོངས་དང་བོད་ཀྱི་ས་ཁུལ་གཞན་གྱི་བོད་མི་དང་། ཡུ་གུར་བ། དེ་བཞིན་ཆོས་ཕྱོགས་དང་འབྲེལ་བའི་གང་ཟག་རྣམས་ལ་གསང་ཞིབ་མྱུལ་ལྟ་ནན་པོ་བྱེད་བཞིན་ཡོད་པ་བློ་འཚབ་ཆེན་པོའི་རྣམ་པ་བཏོན་ཡོད།
གཞན་ཡང་སྙན་ཐོ་དེའི་ནང་རྒྱ་ནག་གཞུང་གིས་བོད་ནང་གི་དགོན་སྡེ་ཁག་སོགས་ཀྱི་ནང་སོ་ལྟ་པར་ཆས་བཙུགས་པའི་ཐོག་བོད་མིར་གསང་ཞིབ་མྱུལ་ལྟ་བྱེད་བཞིན་ཡོད་པ་མ་ཟད། རྒྱ་གཞུང་གིས་མི་རིགས་དབྱེ་འབྱེད་བྱས་ཏེ་བོད་མི་དང་། ཡུ་གུར་བ། ལྷོ་སོག་པོའི་སོག་རིགས་ཚོའི་སྐད་ཡིག་དང་། ཤེས་ཡོན། ལས་ཀའི་ཐོབ་ཐང་འཕྲོག་བཞིན་ཡོད་པ་དང་། ཕྱོགས་མཚུངས་རྒྱ་ནག་མི་མང་བདེ་འཇགས་ལྷན་ཁང་གིས་འཕྲུལ་ལས་བཟོ་གྲྭ་དང་ལྷན་དུ་ལག་སྦྲེལ་བརྒྱུད་འཕྲུལ་ཆས་ཀྱི་ལམ་ནས་མི་སོ་སོའི་སྐད་སྒྲ་ངོས་འཛིན་དང་གསང་བའི་ཐོག་ནས་ཞིབ་འཇུག་བྱེད་ཕྱོགས་ཀྱི་འཕྲུལ་ཆས་གསར་བསྐྲུན་བྱེད་བཞིན་ཡོད།
རྒྱ་ནག་གཞུང་གིས་མི་རིགས་དབྱེ་འབྱེད་བྱས་ཏེ་བོད་ཀྱི་འབྲོག་པ་རྣམས་བཙན་དབང་གིས་གནས་སྤོ་བཅུག་པ་དང་། གྲངས་ཉུང་མི་རིགས་ཁག་གིས་ཞི་བའི་ངང་སོ་སོའི་ཆོས་དང་རིག་གཞུང་སྐོར་གླེང་སློང་གནང་བཞིན་པར་མི་རིགས་འཆམ་མཐུན་དང་སྤྱི་ཚོགས་བརྟན་ལྷིང་ལ་ཁ་གཡར་ནས་རྒྱ་གཞུང་གིས་མི་རིགས་དབྱེ་འབྱེད་ཀྱིས་དམ་བསྒྲགས་བྱས་དང་བྱེད་བཞིན་པ་སོགས་འཁོད་ཡོད་པ་མ་ཟད། བོད་མིར་གཞུང་འབྲེལ་མིན་པའི་ཚོགས་སྡེ་ཁག་གིས་མཐུན་འགྱུར་རོགས་རམ་གནང་བཞིན་པར་རྣམས་ལ་རྒྱ་གཞུང་དཔོན་རིགས་རྣམས་ཀྱིས་དམ་བསྒྲགས་བཀག་འགོག་བྱེད་བཞིན་ཡོད། ཅེས་འཁོད་ཡོད།།
