༄༅། །ཕྱི་ལོ་ ༢༠༢༡ ཟླ་ ༤ ཚེས་ ༢༦ རེས་གཟའ་ཟླ་བའི་ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཏོག་དབྱིབས་གཉན་རིམས་སྔོན་འགོག་སྨན་ཁབ་རིམ་པ་གཉིས་པ་དེ་བཞེས་གནང་མཛད་ཡོད།  

དེ་ཡང་གོང་ཚེས་ཉིན་༸སྐུའི་ཕྱི་ལུགས་བླ་སྨན་ས་འདུ་ཚང་ཚེ་བརྟན་རྡོ་རྗེ་ལགས་ཀྱིས་གཙོས་འབྲེལ་ཡོད་བཅས་བཞུགས་སྒར་༸རྒྱལ་བའི་ཕོ་བྲང་དུ་ཆེད་བཅར་གྱིས་མགོན་པོ་གང་ཉིད་མཆོག་ལ་ཏོག་དབྱིབས་གཉན་རིམས་སྔོན་འགོག་གི་སྨན་ཁབ་རིམ་པ་གཉིས་པ་དེ་བསྐྱོན་ཡོད། 

སྤྱིར་མགོན་པོ་གང་ཉིད་ཀྱིས་ཕྱི་ལོ་ ༢༠༢༡ ཟླ་ ༣ ཚེས་ ༦ ཉིན་རྡ་སའི་ཛོ་ནལ་སྨན་ཁང་ (Zonal Hospital) དུ་ཏོག་དབྱིབས་གཉན་རིམས་སྔོན་འགོག་སྨན་ཁབ་རིམ་པ་དང་པོ་དེ་བཞེས་གནང་མཛད་ཡོད་པ་བཅས། །