༄༅། །ཕྱི་ལོ་ ༢༠༢༡ ཟླ་ ༤ ཚེས་ ༢ རེས་གཟའ་པ་སངས་ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བྷལ་ཊིག་མངའ་ཁུལ་གྱི་རྒྱལ་ཁབ་ཁག་གི་གྲོས་ཚོགས་འཐུས་མི་དང་ཤེས་ཡོན་མི་སྣའི་སྐུ་ཚབ་ཁག་གཅིག་དང་ལྷན་ད་ལྟ་དང་མ་འོངས་པའི་ཡ་རབས་དང་སྤྱོད་བཟང་སྐོར་དྲ་ལམ་བརྒྱུད་བགྲོ་གླེང་མཛད་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཙམ་ལ་མགོན་པོ་གང་ཉིད་མཆོག་༸རྒྱལ་བའི་གཟིམ་ཆུང་ཕོ་བྲང་ནས་བཀའ་སློབ་གནང་ཡུལ་དུ་ཆིབས་སྒྱུར་གྱིས་བཀའ་སློབ་སྩལ་དོན། སྔར་ངོས་རང་ཐེངས་འགའ་ཤས་ལཱཏ་ཝི་ཡཱར་ (Latvia) སླེབས་པ་རེད། ལཱཏ་ཝི་ཡཱར་སླེབས་སྟངས་ནི་ངོས་ཀྱིས་རུ་སུའི་ནང་པ་རྣམས་ལ་ཆོས་འབྲེལ་བྱེད་ཀྱི་ཡོད། དེ་སྔ་ལྡི་ལིར་ཆོས་འབྲེལ་སྐབས་རུ་སུའི་ཆོས་ཞུ་བ་ཅིག་གིས་ངོས་ལ་སྤྱིར་རུ་སུའི་མི་མང་མང་པོ་ཞིག་རྒྱལ་བ་རིན་པོ་ཆེའི་༸སྐུ་མདུན་ནས་བཀའ་ཆོས་ཞུ་འདོད་ཡོད། འོན་ཀྱང་རྒྱ་གར་དུ་ཚུར་གསུང་ཆོས་ཞུ་རྒྱུར་ཡོང་བར་འགྲོ་གྲོན་ཆེན་པོ་ཡོད་སྟབས་རུ་སུའི་མང་ཚོགས་དཀྱུས་མ་རྣམས་རྡ་སར་སླེབས་ཐུབ་ཀྱི་མེད་སྐོར་གསུངས་སོང་། དེར་བརྟེན་ངོས་ལ་སེམས་ཁུར་ཆེན་པོ་སླེབས་ནས་ལཱཏ་ཝི་ཡཱ་རུ་སླེབས་པ་རེད།
ལཱཏ་ཝི་ཡཱ་རུ་ཆོས་འབྲེལ་སྐབས་རུ་སུའི་མི་མང་མང་དག་ཅིག་སླེབས་ཐུབ་པ་ཡོང་གི་ཡོད་པ་མ་ཟད། ལཱཏ་ཝི་ཡཱའི་མང་ཚོགས་ནས་ངོས་ལ་རྣམ་འགྱུར་བཟང་པོ་དང་གོ་སྒྲིག་ཧ་ཅང་གྲ་སྒྲིག་པོ་གནང་འདུག དེ་སྔ་ངོས་རང་ལོ་རེར་ས་གནས་སུ་སླེབས་ཏེ་ཆོས་འབྲེལ་བྱེད་ཀྱི་ཡོད། ཆོས་འབྲེལ་གྱི་མཐུན་རྐྱེན་ཡོངས་རྫོགས་ལཱཏ་ཝི་ཡཱ་ས་གནས་གཞུང་ནས་གནང་བཞིན་ཡོད་པར་བརྟེན་རུ་སུའི་མི་མང་དང་སོག་པོའི་མི་མང་མང་པོ་ཞིག་གསུང་ཆོས་ཞུ་བར་སླེབས་ཐུབ་པ་བྱུང་ཡོད། ངོས་རང་ལཱཏ་ཝི་ཡཱ་དང་འབྲེལ་བའི་འདས་པའི་གནས་ཚུལ་རྣམས་ད་དུངའང་དྲན་པའི་ཡུལ་ལ་འཆར་བཞིན་ཡོད། དེར་བརྟེན་དེ་སྔ་ངོས་རང་ས་གནས་སུ་སླེབས་སྐབས་གོ་སྒྲིག་གནང་མཁན་གྱི་འབྲེལ་ཡོད་ཡོངས་ལ་ཐུགས་རྗེ་ཆེ་ཞུ་རྒྱུ་ཡིན།
དེ་རིང་གི་བརྗོད་གཞི་ནི་ད་ལྟ་དང་མ་འོངས་པའི་ཡ་རབས་དང་སྤྱོད་བཟང་གི་ཉམས་ལེན་སྐོར་རེད། བཟང་སྤྱོད་དམ་ཚུལ་ཁྲིམས་ཞེས་ཆོས་ལུགས་ཀྱི་ཐོག་ནས་འགྲེལ་བཤད་རྒྱག་ཡོང་དུས་དད་པ་དང་འབྲེལ་ནས་ཡོང་གི་ཡོད། འོན་ཀྱང་ངོས་ཀྱིས་དུས་རྒྱུན་བཟང་སྤྱོད་སྐོར་ཤོད་སྐབས་རྒྱ་གར་གྱི་གནའ་རབས་རིག་གཞུང་ཆོས་ལུགས་རིས་མེད་ཀྱི་བཟང་སྤྱོད་སྒོ་ནས་ཞུ་གི་ཡོད། དེ་ཡང་རྒྱུ་མཚན་ལ་གཙོ་བོ་བརྟེན་པ་ཞིག་རེེད། འགྲོ་བ་མིའི་གནས་སྟངས་སྐོར་ཞུ་ཚེ། འཛམ་གླིང་འདིའི་སྟེང་འགྲོ་བ་མི་ཐེར་འབུམ་བདུན་ལྷག་ཙམ་ཡོད་པ་དེ་དག་འགྲོ་བ་མི་གཅིག་གྱུར་གྱི་འདུ་ཤེས་འཛིན་དགོས་ཀྱི་ཡོད་པ་མ་ཟད། ཚང་མ་མཉམ་རུབ་ཐོག་གནས་དགོས་པ་ནི་དངོས་ཡོད་གནས་ཚུལ་ཡང་རེད། འདས་པའི་ལོ་རྒྱུས་ནང་དམག་འཁྲུག་དང་དྲག་སྤྱོད་ཀྱི་དཀའ་ངལ་མང་དག་ཅིག་བྱུང་ཡོད། གོ་མཚོན་བཟོ་སླད་དུས་ཚོད་དང་དཔལ་འབྱོར་གྱི་འགྲོ་སོང་ཕོན་ཆེ་བཏང་བ་ནི་ཧ་ཅང་ཐབས་སྐྱོ་པོ་རེད།
སྤྱིར་བཏང་འགྲོ་བ་མིའི་རང་བཞིན་ནི་སྤྱི་ཚོགས་ལ་བརྟེན་པའི་སེམས་ཅན་ཡིན། ད་ཆ་ཚན་རིག་པས་སྤྱི་ཚོགས་ལ་བརྟེན་པའི་སེམས་ཅན་ཞིག་ཡིན་ཕྱིན་ཆད་སེམས་ཅན་དེ་དག་ལ་བརྟེན་དགོས་དོན་གཙོ་བོ་ནི་རང་གང་དུ་གཏོགས་པའི་སྤྱི་ཚོགས་དེ་ལ་བརྟེན་ནས་འཚོ་དགོས་ཀྱི་ཡོད། 
ཐོག་མར་སྐྱེས་པ་ཉིད་ནས་བཟུང་གཞན་ལ་བསྟུན་ནས་འཚོ་བ་དཔེར་ན། དང་ཐོག་ནང་མི་དང་སྤྲུན་མཆེད། དེ་ནས་ཚོགས་སྡེ་བཅས་ཡོང་གི་ཡོད། གང་ལྟར་གཞན་ལ་བརྟེན་ནས་འཚོ་བ་སྐྱེལ་གྱི་ཡོད། ཆུང་བྱིས་པའི་དུས་ནས་རང་བཞིན་ལྷན་སྐྱེས་སུ་ཡོད། སྐབས་རེ་འགྲོ་བ་མིའི་རང་བཞིན་སྤྱི་ཚོགས་ལ་བརྟེན་པའི་འདུ་ཤེས་ཆུང་དྲགས་པའི་དབང་གིས་ང་དང་ཁོ། ཁྱེད་ཚོ་དང་ང་ཚོ་སོགས་ཕྱོགས་རིས་ལ་བསྙད་དེ་ཕན་ཚུན་གསོད་རེ་ཡོང་གི་ཡོད། ང་ཚོ་ཚང་མ་སྤྱི་ཚོགས་ལ་བརྟེན་པའི་སེམས་ཅན་སྤྱི་དང་། ལྷག་པར་དུས་རབས་ ༢༡ ནི་འགྲོ་བ་མིའི་བདེ་སྡུག་ཕན་ཚུན་གཅིག་ལ་གཅིག་བརྟེན་དགོས་སྟབས། ཕན་ཚུན་གཅིག་ལ་གཅིག་བརྟེན་དང་གཅིག་ཕན་གཅིག་གྲོགས་ཀྱི་སྒོ་ནས་འཚོ་དགོས་ཀྱི་ཡོད། བདག་དང་གཞན་ཞེས་དབྱེ་བ་མེད་པའི་ཐོག་ནས་ང་ཚོ་འགྲོ་བ་མི་ཐེར་འབུམ་བདུན་ཚང་མ་མཉམ་རུབ་དང་ཕན་ཚུན་གཅིག་ཕན་གཅིག་གྲོགས་ཀྱི་ངང་འཚོ་བ་སྐྱེལ་དགོས།
མཆེད་གྲོགས་ཕོ་མོ་ཡོངས་ཀྱིས་བདེ་སྐྱིད་ལ་སེམས་ཁུར་ཡོད་པའི་ཐོག་མི་ཚེ་དོན་དང་ལྡན་པ་བྱེད་རྒྱུར་སོ་སོའི་མི་ཚེ་བདེ་སྐྱིད་ལྡན་པ་ཡོང་རྒྱུའི་ཐབས་གཙོ་བོ་ཆགས་ཀྱི་ཡོད། དེ་དག་ཆོས་ཕྱོགས་དང་འབྲེལ་བའི་དཀོན་མཆོག་འདོད་མཁན་དང་མི་འདོད་མཁན་སོགས་ཀྱི་བཟང་སྤྱོད་སྐོར་ལ་བཤད་ཀྱི་མེད། འགྲོ་བ་མི་ཐེར་འབུམ་བདུན་རྣམས་མཆེད་གྲོགས་ཕོ་མོའི་འདུ་ཤེས་དགོས་པ་ནི་ང་ཚོའི་བདེ་དོན་ལ་ཧ་ཅང་ཕན་ཐོགས་ཆེན་པོ་ཡོད། ང་ཚོ་ཚང་མ་བེད་སྐྱིད་ངང་ནས་འཚོ་བ་སྐྱེལ་ཐུབ་ཚེ་ཡག་པོ་ཡོད། ངོས་ཀྱིས་དུས་རྒྱུན་དུ་སེམས་པ་བཟང་པོ་བྱེད་དགོས་སྐོར་བཤད་ཀྱི་ཡོད། ད་ཆ་ང་ཚོར་གོ་ལའི་ཚ་དྲོད་རྐྱེན་པས་གནས་གཤིས་འགྱུར་ལྡོག་གི་དཀའ་ངལ་ཤུགས་ཆེ་འཕྲད་ཀྱི་ཡོད། མིའི་སྤྱི་ཚོགས་སྤྱི་ལ་དཀའ་ངལ་དེ་འདྲ་ཞིག་འཕྲད་བཞིན་ཡོད་པའི་སྒང་དམག་འཁྲུག་སོགས་ཀྱི་བརྒྱུད་སྡུག་བསྔལ་དང་དཀའ་ངལ་འཕར་མ་བཟོ་དགོས་རྒྱུ་མེད།
ང་ཚོ་ཚང་མས་འཛམ་གླིང་ཞི་བདེ་ལྡན་པ་ཞིག་འདོད་ཀྱི་ཡོད་སྟབས་འགྲོ་བ་མི་ཚང་མ་གཅིག་གྱུར་དང་གཉེན་གྱི་འདུ་ཤེས་འཛིན་ཐུབ་ཚེ་འཛམ་གླིང་འདི་བཞིན་ཞི་བདེ་ལྡན་པ་འགྱུར་ཐུབ། བྷལ་ཊིག་མངའ་ཁུལ་གྱི་རྒྱལ་ཁབ་ཨེསྚོ་ནི་ཡཱ་ (Estonia) དང་ལཱཏ་ཝི་ཡཱ། (Latvia) ལི་ཐུ་ནི་ཡཱ་ (Lithuania) བཅས་ཀྱི་མང་ཚོགས་ཡོངས་ལ་གོ་ལ་གཅིག་གྱུར་གྱི་འདུ་ཤེས་གོང་སྤེལ་གཏོང་ཆེད་ནུས་པ་ཕོན་ཆེ་ཡོད་པའི་ཐོག་ནས་ཞབས་འདེགས་གང་མང་ཞུ་དགོས། ངོས་རང་ལུང་པ་དེ་དག་ནང་སླེབས་ཡོད། ངོས་རང་ལོ་ན་ཆུང་དུས་ནས་པར་རིས་དང་འབྲེལ་བའི་དཔེ་དེབ་ཀློག་རྒྱུར་དགའ་པོ་ཡོད། ལྷག་པར་འཛམ་གླིང་དམག་ཆེན་གཉིས་པའི་གནས་ཚུལ་དེ་འདྲའི་ཐོག་ཤེས་རྟོགས་ཡོང་གི་ཡོད། བྷལ་ཊིག་མངའ་ཁུལ་གྱི་རྒྱལ་ཁབ་དེ་དག་སྐོར་ཤེས་ཀྱི་ཡོད། སྐབས་དེ་དུས་རྒྱལ་ཁབ་ཆེ་བས་ཆུང་བར་མཐོང་ཆུང་ངམ་མི་བརྩི་བའི་དཀའ་ངལ་འདུག ཕྱིས་སུ་ཁྱེད་རང་ཚོར་རང་དབང་ཐོབ་ནས་ངོས་རང་ས་གནས་སུ་སླེབས་སྐབས་སེམས་ནང་ཧ་ཅང་དགའ་པོ་བྱུང་སོང་།
འགྲོ་བ་མི་སྤྱི་ཡོངས་ཀྱི་མཐར་ཐུག་བདེ་སྐྱིད་ཡོང་དགོས་རྒྱུ་གཙོ་བོ་ནི་གཅིག་གྱུར་གྱི་འདུ་ཤེས་རེད། དམག་དང་གོ་མཚོན་ཐོག་ནས་དཀའ་ངལ་སེལ་རྒྱུའི་དུས་ཚོད་ཡོལ་ཟིན་པ་རེད། སྐབས་རེ་ངོས་ཀྱིས་འཛམ་གླིང་ཞི་བདེ་གོང་སྤེལ་གཏོང་བར་རྒྱལ་ཁབ་ཆུང་བ་ཚོར་དམིགས་བསལ་ནུས་པ་ཆེན་པོ་ཡོད་བསམ་པར་དྲན་གྱི་འདུག ཅེས་བཀའ་སློབ་སྩལ་ཏེ་དྲི་བ་ཁག་ལ་བཀའ་ལན་སྩལ། །
