༄༅། །ཕྱི་ལོ་ ༢༠༢༡ ཟླ་ ༤ ཚེས་ ༩ ཉིན་ཨིན་ཡུལ་གྱི་རྒྱལ་མོ་ཨེ་ལི་ཛེ་བྷེ་ཐི་ (Queen Elizabeth) མཆོག་གི་སྐུ་ཟླ་ཕི་རན་སི་ཕི་ལི་ཕི་ (H.R.H. Prince Philip, Duke of Edinburgh) མཆོག་དགུང་ལོ་ ༩༩ ཐོག་སྐུ་ཚེའི་འཕེན་པ་རྫོགས་པའི་གསལ་བསྒྲགས་ཐོན་ཡོད་པ་དང་། དེ་རིང་སྟེ་ཕྱི་ལོ་ ༢༠༢༡ ཟླ་ ༤ ཚེས་ ༡༠ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨིན་ཡུལ་གྱི་རྒྱལ་མོ་ཨེ་ལི་ཛེ་བྷེ་ཐི་ (Queen Elizabeth) མཆོག་དང་རྒྱལ་སྲས་ཕི་རིན་སི་ཆར་ལེ་སི་ (Prince Charles) མཆོག་རྣམ་གཉིས་ལ་ཐུགས་གསོའི་གསུང་འཕྲིན་སྩལ་ཡོད།

དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨིན་ཡུལ་གྱི་རྒྱལ་མོ་ཨེ་ལི་ཛེ་བྷེ་ཐི་མཆོག་ལ་ཐུགས་གསོ་སྩལ་བའི་ནང་འཁོད་དོན། ལྕམ་སྐུ་མཆོག་གི་སྐུ་ཟླ་ཕི་རན་སི་ཕི་ལི་ཕི་མཆོག་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་གོ་ཐོས་བྱུང་བས་བློ་ཕམ་བྱུང་། ཡིད་སྐྱོ་བའི་སྐབས་འདིར་ངོས་ཀྱིས་འདས་པོ་དམ་པ་དེ་ཉིད་ལ་ཐུགས་སྨོན་དང་རྒྱལ་མོ་མཆོག་གིས་དབུས་ནང་མི་ལྷན་རྒྱས་ལ་ཐུགས་གསོ་ཞུ་རྒྱུ་ཡིན།

དམ་པ་དེ་ཉིད་ཀྱིས་མི་ཚེ་དོན་དང་ལྡན་པ་ཞིག་བསྐྱལ་ཡོད་པས་ང་ཚོ་ཚང་མས་ཁོང་དྲན་གསོ་བྱེད་སྐབས་དགའ་བ་སྐྱེ་འོས་པ་རེད། ཅེས་དང་། དེ་བཞིན་མགོན་པོ་གང་ཉིད་ཀྱིས་རྒྱལ་སྲས་ཆར་ལེ་སི་མཆོག་ལ་ཐུགས་གསོ་སྩལ་བའི་ནང་འཁོད་དོན། ཡིད་སྐྱོ་བའི་སྐབས་འདིར་ངོས་ཀྱིས་སྐུ་ཉིད་མཆོག་གི་མ་ཡུམ་རྒྱལ་མོ་མཆོག་ལ་ཐུགས་གསོའི་འཕྲིན་ཡིག་ཅིག་བྲིས་ཡོད། བློ་ཐག་ཉེ་པོ་དང་བཀུར་འོས་ཀྱི་གྲོགས་པོ་ཞིག་ལ་རྩི་བཞིན་ཡོད་པའི་ཆ་ནས་ངོས་ཀྱིས་རྒྱལ་སྲས་མཆོག་གིས་དབུས་ནང་མི་ལྷན་རྒྱས་ལའང་ཐུགས་གསོ་ཞུ་རྒྱུ་ཡིིན། ཕི་རིན་སི་ཕི་ལི་སི་མཆོག་གིས་མི་ཚེ་དོན་དང་ལྡན་པ་ཞིག་བསྐྱལ་ཡོད། ཅེས་བསྐྱར་དུ་རྗེས་སུ་ཡི་རང་མཛད།། 

                                       གསུང་འཕྲིན་ངོ་མ་ཨིན་ཡིག་ཐོག་སྩལ་ཡོད་པས་ཚིག་དོན་ལ་ཧེ་བག་ཡོད་ཚེ་ཨིན་ཡིག་ལ་རྩ་འཛིན་ཡོང་བ་ཞུ།།