༄༅། །ཤར་དབུས་ཡུ་རོབ་རྒྱལ་ཁབ་ཁག་གི་ནང་གནས་བཞུགས་བོད་མི་རྣམས་ནས་ཕྱི་ལོ་ ༢༠༢༡ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་དང་བོད་མི་མང་སྤྱི་འཐུས་སྐབས་ ༡༧ པའི་སྤྱི་འཐུས་འོས་འདེམས་ཆེད་དངོས་གཞིའི་འོས་བསྡུར་ཆ་ཤས་ལེན་མཁན་མང་དུ་ཕྱིན་ཡོད།
དེ་ཡང་ཏོག་དབྱིབས་གཉན་རིམས་ཁྱབ་བརྡལ་ཕྱིན་པའི་རྐྱེན་གྱིས་ཤར་དབུས་ཡུ་རོབ་རྒྱལ་ཁབ་ཁག་གི་ནང་སྒོ་རྒྱ་བསྡམས་ཡོད་ནའང་སུད་སི་དང་ལིག་ཊེན་ཚིན། ཇར་མ་ནཱི། ཨོསྟྲི་ཡཱ། ཨི་ཊ་ལཱི་བཅས་ཀྱི་ནང་གནས་བཞུགས་བོད་མི་ཚོས་ཕྱི་ལོ་ ༢༠༢༡ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་དང་བོད་མི་མང་སྤྱི་འཐུས་སྐབས་ ༡༧ པའི་དངོས་གཞི་འོས་ཤོག་སྔོན་འགྲོའི་ལྷག་འཕངས་ཡོད།
བོད་མི་གྲངས་ ༤༥༩༡ ཙམ་གྱིས་ཕྱི་ལོ་ ༢༠༢༡ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་འོས་འདེམས་ཆེད་དེབ་སྐྱེལ་གནང་ཡོད་པའི་ཁྲོད་ནས་བོད་མི་གྲངས་ ༣༧༢༦ ནས་དངོས་གཞི་འོས་བསྡུར་ཆ་ཤས་བླངས་ཡོད།
ས་གནས་འོས་བསྡུའི་འགན་འཛིན་སུད་སིའི་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱི་སྣེ་ཁྲིད་འོག་ཕྱི་ལོ་ ༢༠༢༡ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་དང་བོད་མི་མང་སྤྱི་འཐུས་སྐབས་ ༡༧ པའི་དངོས་གཞིའི་འོས་འདེམས་ཆེད་འོས་ཤོག་འཕེན་མཁན་རྣམས་ལ་སྟབས་བདེ་སླད་སུད་སིའི་སྐུ་ཚབ་དོན་གཅོད་ཁྱབ་ཁོངས་སུད་སི་དང་ལིག་ཊེན་ཚིན། ཇར་མ་ནཱི། ཨོསྟྲི་ཡཱ། ཨི་ཊ་ལཱི་བཅས་རྒྱལ་ཁབ་ཁག་ལྔའི་ནང་འོས་བསྡུའི་ས་ཚིགས་གྲངས་ ༣༩ བཙུགས་ཡོད་པ་མ་ཟད། འཕྲལ་སེལ་ལས་བྱེད་གྲངས་ ༢༣༧ ཙམ་བསྐོ་བཞག་གནང་ཡོད།
སུད་སིའི་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས། ཏོག་དབྱིབས་གཉན་རིམས་ཀྱི་རྐྱེན་པས་དཀའ་ངལ་ཡོད་ནའང་ང་ཚོས་ཕྱི་ལོ་ ༢༠༢༡ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་དང་བོད་མི་མང་སྤྱི་འཐུས་སྐབས་ ༡༧ པའི་སྤྱི་འཐུས་འོས་ཤོག་ཚགས་ཚུད་ངང་འཕངས་ཐུབ་པ་བྱུང་ཡོད་པ་དང་། གཙོ་བོ་ས་གནས་བོད་མི་ཚོས་མཉམ་རུབ་གནང་བར་བརྟེན་ནས་ཕྱི་ལོ་ ༢༠༢༡ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་དང་བོད་མི་མང་སྤྱི་འཐུས་སྐབས་ ༡༧ པའི་སྤྱི་འཐུས་འོས་བསྡུ་ལམ་ལྷོངས་བྱུང་ཡོད་སྐོར་གསུངས།།
