༄༅། །རྫ་དབོན་པོ་ཡུལ་ཚོ་ནས་ཡིན་པའི་གྲྭ་བསྟན་འཛིན་ཉི་མ་ལགས་རྒྱ་ནག་གཞུང་གི་ཉེན་རྟོག་པས་འཛིན་བཟུང་གིས་རྡུང་རྡེག་མནར་གཅོད་ཚད་ལས་བརྒལ་བ་བཏང་བའི་རྐྱེན་གྱིས་ནད་གཅོང་དུ་གྱུར་ནས་ཕྱི་ཟླ་ ༡ ཚེས་ ༡༩ ཉིན་འདས་གྲོངས་སུ་གྱུར་རྗེས་རྒྱ་ནག་གཞུང་གིས་མུ་མཐུད་རྫ་དབོན་པོ་ཁུལ་དུ་དམག་མི་ཆེད་གཏོང་གིས་བོད་མིའི་ཁང་ཁྱིམ་རེ་རེར་ཞིབ་བཤེར་བྱས་ཏེ་དྲག་གནོན་སྔར་ལྷག་བྱེད་བཞིན་ཡོད་པ་དང་། ༧གོང་ས་མཆོག་གི་སྐུ་པར་སྒྲིག་གཤོམ་བྱས་ན་སྲིད་གཞུང་གི་རོགས་སྐྱོར་ཡོངས་རྫོགས་མེད་པ་བཟོ་རྒྱུ་ཡིན་པའི་དོན་ཚན་ ༥ ཅན་གྱི་བཀའ་རྒྱ་བསྒྲགས་འདུག 

དེ་ཡང་གྲྭ་བསྟན་འཛིན་ཉི་མ་ལགས་འདས་གྲོངས་སུ་གྱུར་རྗེས་ཡུལ་མི་ཁག་གཅིག་གིས་སྤྱི་ཚོགས་དྲྭ་རྒྱ་སྐད་འཕྲིན་གྱི་སྟེང་བསྟན་འཛིན་ཉི་མ་ལགས་ལ་གདུང་སེམས་མཉམ་སྐྱེའི་ལབ་གླེང་གནང་བར་བརྟེན་རྒྱ་ནག་གི་དམག་མི་རྫ་དབོན་པོ་ཁུལ་དུ་ཡོང་ནས་ཉིན་ཤས་རིང་བོད་མི་ཁག་གཅིག་འཛིན་བཟུང་བཀག་བསྐྱིལ་དང་འདྲི་རྩད་བྱས་ཡོད།འདི་ལོའི་ཕྱི་ཟླ་ ༣ ཚེས་ ༥ ཉིན་རྒྱ་ནག་གཞུང་གི་དྲག་ཆས་ཉེན་རྟོག་རུ་ཁག་ (The Snow Wolf Commando) ཟེར་བས་རྫ་དབོན་པོ་ཡུལ་ཚོའི་བོད་མིའི་ཁྱིམ་ཚང་རེ་རེར་སྔོག་བཤེར་བྱས་ཏེ། ༧གོང་ས་མཆོག་གི་སྐུ་པར་རྣམས་བཙན་གྱིས་མར་ལེན་དུ་བཅུག་སྟེ། དེའི་ཚབ་ཏུ་རྒྱ་ནག་གཞུང་གི་མགོ་འཁྲིད་ཚོའི་པར་བཀལ་པ་མ་ཟད། ཚོགས་འདུ་ཞིག་གི་ཐོག་བོད་མི་རྣམས་ཀྱིས་༧གོང་ས་མཆོག་གི་སྐུ་པར་མི་བཤམ་པའི་དོན་ཚན་ ༥ ཅན་གྱི་ཁས་ལེན་ཡི་གེ་ཞིག་ལ་མིང་རྟགས་བཀོད་བཅུག་ཡོད་པ་སོགས་དམ་དྲག་དོགས་ཟོན་སྔར་ལྷག་ཤུགས་ཆེ་རུ་བཏང་ཡོད།

ཕྱི་ཟླ་ ༣ ཚེས་ ༡༧ ཉིན་ས་གནས་རྒྱ་ནག་གི་འབྲེལ་ཡོད་ལས་བྱེད་ཚོས་ས་གནས་བོད་མི་མང་ཚོགས་རྣམས་བསྐོང་ཚོགས་བྱས་ནས།  སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་སྐུ་པར་སྒྲིག་གཤོམ་དང་བདག་ཉར་མི་ཆོག་པ་དང་། གཞན་ལ་བརྒྱུད་སྐུལ་དང་པར་འགྲེམས་མི་ཆོག་པ་སོགས་དོན་ཚན་ཁག་ལྔ་ཡོད་པའི་ཡིག་ཆར་མང་ཚོགས་ནས་ཁས་ལེན་གྱི་མིང་རྟགས་བཀོད་བཅུག་ཡོད་པ་དང་། གལ་ཏེ་བོད་མི་སུ་རུང་ནས་དོན་ཚན་དེ་དག་དང་འགལ་ཚེ་རྒྱལ་ཁབ་ཀྱི་རོགས་དངུལ་ཡོངས་རྫོགས་དང་རོགས་སྐྱོར་གཅིག་ཀྱང་མེད་པར་བྱ་རྒྱུ་ཡིན་སྐོར་བཀོད་འདུགཉིན་ཤས་རྗེས་རྒྱ་ནག་གཞུང་གི་དམག་མིས་ས་གནས་བོད་མིའི་རྒན་གསོ་ཁང་གི་བོད་མི་རྣམས་ལ་རྔན་པ་སྤྲོད་ཞོར་འཇམ་པོའི་བསླུ་བྲིད་ཀྱིས་བགྲེས་སོང་རྣམས་ཀྱི་སྡོད་ཁང་གཙང་མ་བཟོ་ཁུལ་གྱི་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་ཡོད་མེད་སྔོག་བཤེར་དང་། རྒྱ་ནག་གི་འགོ་ཁྲིད་ཚོའི་པར་སྤྲད་ཏེ་གུང་ཁྲན་ཏང་བཀའ་དྲིན་ཆེན་པོ་ཡིན་པ་བསམ་ཤེས་དགོས་པའི་འགྲེལ་བརྗོད་བྱས་ཡོད།

བསྟན་འཛིན་ཉི་མ་ལགས་འདས་གྲོངས་སུ་གྱུར་པའི་གནས་ཚུལ་ཐོན་རྗེས་ས་གནས་སུ་རྒྱ་ནག་གི་དམག་མི་འབྱོར་ཏེ་བོད་མི་རྣམས་ལ་འདྲི་རྩད་བསུན་གཙེར་བྱས་པ་དང་། འདི་ལོའི་གསུམ་བཅུ་དུས་དྲན་གྱི་སྔོན་ལ་ས་གནས་སུ་རྒྱ་མིའི་དམག་མི་མང་པོ་འགྲེམས་འཇོག་དང་། ས་གནས་བོད་མི་རྣམས་ཀྱི་ཁ་པར་ནང་མཉེན་ཆས་ཤིག་ཕབ་ལེན་བྱེད་བཅུག་ཏེ་དྲ་རྒྱའི་ཐོག་དམ་དྲག་སྟངས་འཛིན་ཡོང་ཐབས་བྱེད་བཞིན་ཡོད། །