༄༅། །ཕྱི་ལོ་ ༢༠༢༡ ཟླ་ ༤ ཚེས་ ༡༩ ཉིན་ཡུ་རུབ་རྒྱལ་སྤྱིའི་བོད་དོན་ལས་འགུལ་ཁང་དང་ཡུ་རོབ་གྲོས་ཚོགས་བོད་དོན་རྒྱབ་སྐྱོར་ཚོགས་པ་ཟུང་འབྲེལ་གྱི་གོ་སྒྲིག་འོག་བོད་དོན་ཞུ་གཏུག་གི་ཉིན་མོ་ཞེས་དམིགས་བསལ་ཚོགས་འདུ་ཞིག་དྲ་ལམ་བརྒྱུད་ཚོགས་ཡོད་པ་དང་། ཉིན་གཅིག་གི་ཚོགས་འདུ་ལས་རིམ་ཐོག་ཡུ་རོབ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་མི་ཀུ་ལ་སི་པེཀ་ས་ (Mikulas Peksa) ལགས་དང་། རྒྱལ་སྤྱིའི་བོད་དོན་ལས་འགུལ་ཁང་གི་ཡུ་རོབ་སྲིད་བྱུས་ངེས་སྟོན་པ་སྐུ་ཞབས་ཝིན་སེན་ཊི་མེ་ཊེན་ (Mr. Vincent Metten) ལགས། ཡུ་རོབ་གྲོས་ཚོགས་འཐུས་མི་སྐུ་ཞབས་ཧན་ནེ་སི་ (Hannes Heide) ལགས་དང་ལྕམ་སྐུ་ཨོ་སི་ར་ (Ausra Maldeikiene) ལགས་ཀྱི་ཕྱག་རོགས་ཨ་ལ་སེ་ཝི་སེ་ (Giedrius Alasevici) ལགས། ཁ་ཊ་ལོ་ནི་ཡ་ (Catalonia) ནས་ཡིན་པའི་ཡུ་རོབ་གྲོས་ཚོགས་འཐུས་མི་རྣམ་པའི་ཕྱག་རོགས་སྐུ་ཞབས་ཨེ་ལེག་སི་ (Alex Sarri i Camargo) ལགས། ཡུ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་ལས་བྱེད་ལྕམ་སྐུ་མི་ལ་ནི་ཡ་བྷོ་ལོན་ཌེ་ལེ་ (Melanie Blondelle) ལགས། དེ་བཞིན་པོ་ལེནྜ་དང་། སུད་སི། ཕ་རཱན་སི། བེལ་ཇི་ཡམ། ནི་དར་ལེནྜ། ཨཱ་ཡར་ལེནྜ་བཅས་ཡུ་རོབ་ཁུལ་གྱི་བོད་མི་དྲུག་བཅས་མཉམ་ཞུགས་གནང་ཡོད།དེ་ཡང་སྔ་དྲོའི་ཚོགས་འདུ་ཡུ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་ལས་བྱེད་ལྕམ་སྐུ་མི་ལ་ནི་ཡ་བྷོ་ལོན་ཌེ་ལེ་ལགས་ཀྱིས་གཙོ་སྐྱོང་དང་ཞུ་གཏུག་གི་སྦྱོང་བརྡར་གནང་ཡོད། ཉིན་རྒྱབ་རྒྱལ་སྤྱིའི་བོད་དོན་ལས་འགུལ་ཁང་གི་ཡུ་རོབ་སྲིད་བྱུས་ངེས་སྟོན་པ་སྐུ་ཞབས་ཝིན་སེན་ཊི་མེ་ཊེན་ལགས་ཀྱིས་ཚོགས་འདུ་གཙོ་སྐྱོང་དང་ཡུ་རོབ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་བཞི་དང་ལྷན་གྲོས་མོལ་གནང་ཡོད།
ཐོག་མར་སུ་ཝེ་ཌེན་ནས་ཡིན་པའི་ཡེ་ཤེས་དཔལ་ལྡན་ལགས་ཀྱིས། བོད་ནང་གི་བོད་མི་ཚོར་ནང་ཆོས་ཉམས་ལེན་བྱེད་འཇུག་གི་མེད་ལ། བོད་ཀྱི་འབྲོག་པ་རྣམས་ལ་རྟ་ནོར་ལུག་དང་རྩྭ་ཐང་གི་བདག་དབང་ཡང་མེད། དོན་དངོས་སུ་བོད་དེ་ཡང་བོད་མི་རྣམས་ལ་དབང་གི་མེད། གཞིས་ལུས་བོད་མི་ཚོས་འ་ཆད་འུ་ཐུག་གིས་རང་ལུས་མེར་སྲེག་གཏོང་གི་ཡོད། ཅེས་གསུངས།ཕ་རཱན་སི་ནས་ཡིན་པའི་སྐལ་བཟང་ལགས་ཀྱིས་ཆོས་དད་རང་དབང་དང་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་ཀྱི་གནད་དོན་སྐོར་གསུངས་གྲུབ་མཚམས་ནི་དར་ལེནྜ་ནས་ཡིན་པའི་ཀུན་གསལ་རིན་ཆེན་སྒྲོལ་མ་ལགས་ཀྱིས་བོད་ནང་ཕར་འགྲོ་ཚུར་འོང་གི་གོ་སྐབས་འདྲ་མཉམ་དང་བོད་མིའི་སྒྲིག་འཛུགས་ངོས་འཛིན་སྐོར་གསུངས་ཡོད། བེལ་ཇི་ཡམ་ནས་ཡིན་པའི་བློ་བཟང་དབང་པོ་ལགས་ཀྱིས་ཤེས་ཡོན་དང་བོད་ཀྱི་སྐད་ཡིག་གི་གལ་གནད་སྐོར་གསུངས་པ་དང་། ཨཱ་ཡར་ལེནྜ་ནས་ཡིན་པའི་བསྟན་འཛིན་ཟླ་མཛེས་ལགས་ཀྱིས་བོད་མཐོ་སྒང་གི་ཁོར་ཡུག་གི་གལ་གནད་སྐོར་གསུངས། པོ་ལེནྜ་ནས་ཡིན་པའི་བསྟན་འཛིན་མཁྱེན་བརྩེ་ལགས་ཀྱིས་རྒྱ་ནག་གི་ཤུགས་རྐྱེན་ཡུ་རོབ་ནང་སླེབས་པའི་མྱོང་བ་དངོས་ཀྱི་སྐོར་གསུངས།ཡུ་རོབ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་མི་ཀུ་ལ་སི་པེཀ་ས་ལགས་ཀྱིས། བོད་དོན་སྐོར་གྱི་གནད་དོན་དང་བརྗོད་དོན་ཁག་ཧ་ཅང་འབྲེལ་བ་ཡོད་པ་མ་ཟད། ཡུ་རོབ་གྲོས་ཚོགས་བོད་དོན་རྒྱབ་སྐྱོར་ཚོགས་པ་དང་ཡུ་རོབ་གྲོས་ཚོགས་ནས་གནད་དོན་དེ་དག་ལ་ཐུགས་སྣང་གནང་གི་རེད། ཅེས་དང་། རྒྱ་ནག་གི་ཤུགས་རྐྱེན་ཡུ་རོབ་ནང་སླེབས་ཡོད་པ་དེ་ཡོངས་གྲགས་ཡིན་ཞིང་། བོད་མི་ཚོས་རང་ལུས་མེར་སྲེག་མ་གཏོང་རོགས་ཞེས་བོད་མི་རྣམས་ལ་འབོད་སྐུལ་གནང་ཡོད། ཡུ་རོབ་གྲོས་ཚོགས་འཐུས་མི་སྐུ་ཞབས་ཧན་ནེ་སི་ལགས་ཀྱིས་རྒྱ་ནག་གི་དྲག་པོའི་ཤུགས་རྐྱེན་ཡུ་རོབ་ནང་སླེབས་ཡོད་པའི་སྐོར་གསུངས།སྐུ་ཞབས་ཨེ་ལེག་སི་ལགས་ཀྱིས་བོད་དོན་སྐོར་དཔེ་དེབ་ཀློག་གི་ཡོད་ཀྱང་བོད་མི་རྣམས་ཀྱི་སྐོར་ལ་ཉན་ཞིབ་བྱེད་རྒྱུ་དེ་ཧ་ཅང་གལ་ཆེན་པོ་རེད། ཅེས་གསུངས། ཡུ་རོབ་གྲོས་ཚོགས་འཐུས་མི་ལྕམ་སྐུ་ཨོ་སི་ར་ལགས་ཀྱི་ཕྱག་རོགས་སྐུ་ཞབས་ཨ་ལ་སེ་ཝི་སེ་ལགས་ཀྱིས་རྒྱ་ནག་གི་ཤུགས་རྐྱེན་ཡུ་རོབ་ཁུལ་དུ་སླེབས་པའི་རྐྱེན་གྱིས་ཡུ་རོབ་རྒྱལ་ཁབ་ཁག་གི་ནང་བོད་དོན་འཐབ་རྩོད་ལ་དཀའ་ངལ་འཕྲད་བཞིན་པའི་སྐོར་གསུངས།
བེལ་ཇི་ཡམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་སྔ་དྲོར་བོད་མིའི་སྒྲིག་འཛུགས་ཀྱི་ཕྱི་འབྲེལ་སྲིད་བྱུས་དང་བེལ་ཇི་ཡམ་སྐུ་ཚབ་དོན་ཁང་གི་ལས་དོན་གནང་ཕྱོགས་སྐོར་གསུངས་པ་དང་། ཉིན་རྒྱབ་བོད་མི་དྲུག་ནས་བོད་དོན་སྐོར་གསུངས་པར་རྗེས་སུ་ཡི་རང་དང་མ་འོངས་པར་ཁོང་རྣམ་པས་སོ་སོའི་ས་གནས་སུ་གཞུང་དང་གྲོས་ཚོགས་ནང་བོད་དོན་ཞུ་གཏུག་གི་ལས་འགུལ་མུ་མཐུད་སྤེལ་དགོས་པའི་འགན་ཆེན་པོ་ཡོད་པའི་སྐོར་གསུངས་རྗེས་ཡུ་རུབ་རྒྱལ་སྤྱིའི་བོད་དོན་ལས་འགུལ་ཁང་དང་ཡུ་རོབ་གྲོས་ཚོགས་བོད་དོན་རྒྱབ་སྐྱོར་ཚོགས་པ་ཟུང་འབྲེལ་གྱིས་ཉིན་གཅིག་རིང་བོད་དོན་ཞུ་གཏུག་གི་ཉིན་མོ་ཞེས་དམིགས་བསལ་ཚོགས་འདུ་ཞིག་གོ་སྒྲིག་གནང་བར་ཐུགས་རྗེ་ཆེ་ཞུས་ཡོད་པ་བཅས།།