༄༅། །ཕྱི་ལོ་ ༢༠༢༡ ཟླ་ ༤ ཚེས་ ༡༩ ཉིན་ཡུ་རུབ་རྒྱལ་སྤྱིའི་བོད་དོན་ལས་འགུལ་ཁང་དང་ཡུ་རོབ་གྲོས་ཚོགས་བོད་དོན་རྒྱབ་སྐྱོར་ཚོགས་པ་ཟུང་འབྲེལ་གྱི་གོ་སྒྲིག་འོག་བོད་དོན་ཞུ་གཏུག་གི་ཉིན་མོ་ཞེས་དམིགས་བསལ་དྲ་ལམ་བརྒྱུད་ཚོགས་འདུ་ཞིག་ཚོགས་གཏན་འཁེལ་ཡོད་པ་དང་། ཉིན་གཅིག་གི་ཚོགས་འདུ་ལས་རིམ་ཐོག་པོ་ལེནྜ་དང་། སུད་སི། ཕ་རཱན་སི། བེལ་ཇི་ཡམ། ནི་དར་ལེནྜ། ཨཱ་ཡར་ལེནྜ་བཅས་ཡུ་རོབ་ཁུལ་གྱི་བོད་མི་དྲུག་མཉམ་བཞུགས་གནང་རྒྱུ་ཡིན་འདུག

དེ་ཡང་སྔ་དྲོའི་ཚོགས་འདུའི་ཐོག་ཡུ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ཚེ་རིང་བྱམས་པ་ལགས་དང་གཞན་ལས་བྱེད་ཁག་གཅིག་གིས་བོད་དོན་ཞུ་གཏུག་དང་འབྲེལ་བའི་རྒྱུས་སྟོན་དང་སྦྱོང་བརྡར་གནང་རྒྱུ་ཡིན་པ་དང་། བེལ་ཇི་ཡམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་བོད་མིའི་སྒྲིག་འཛུགས་ཀྱི་ཕྱི་འབྲེལ་སྲིད་བྱུས་དང་། བེལ་ཇི་ཡམ་སྐུ་ཚབ་དོན་གཅོད་ཁང་གི་ལས་འགན་དང་དབུ་མའི་ལམ་གྱི་སྲིད་བྱུས་བཅས་ཀྱི་སྐོར་ལ་གསུང་བཤད་གནང་རྒྱུ་དང་། 

ཉིན་རྒྱབ་ཀྱི་ཚོགས་འདུའི་ཐོག་ཡུ་རོབ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་མི་ཀུ་ལ་སི་པེཀ་ས་ (Mikulas Peksa) མཆོག་གི་སྣེ་ཁྲིད་འོག་ཡུ་རོབ་གྲོས་ཚོགས་བོད་རྒྱབ་སྐྱོར་ཚོགས་པའི་ཚོགས་མི་རྣམས་དང་ལྷན་བགྲོ་གླེང་གནང་རྒྱུ་དང་། རྒྱལ་སྤྱིའི་བོད་དོན་ལས་འགུལ་ཁང་གི་ཡུ་རོབ་སྲིད་བྱུས་ངེས་སྟོན་པ་སྐུ་ཞབས་ཝིན་སེན་ཊི་མེ་ཊེན་ (Mr. Vincent Metten) ལགས་ཀྱིས་བགྲོ་གླེང་གཙོ་སྐྱོང་གནང་རྒྱུ་ཡིན་ཞིང་། ཡུ་རོབ་གྲོས་ཚོགས་འཐུམ་མི་སྐུ་ཞབས་པེཀ་ས་ལགས་དང་། སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་རྣམ་གཉིས་ཀྱིས་མཇུག་སྡོམ་གསུང་བཤད་གནང་རྒྱུ་ཡིན་པ་བཅས། །