༄༅། །འདི་གར་མེའོ་ཆོས་འཕེལ་གླིང་བོད་མིའི་གཞིས་སྒར་གྱི་ས་གནས་འགོ་འཛིན་ལས་ཁང་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་མཐུན་འགྱུར་འོག་མེའོ་ཆོས་འཕེལ་གླིང་བོད་མིའི་གཞིས་ཆགས་སུ་ཕྱི་རོལ་གྱི་ལུས་སྦྱོང་རྩེད་རྭ་གསར་རྒྱག་གི་ལས་གཞི་ལེགས་གྲུབ་བྱུང་ཡོད་པ་དང་། ཕྱི་རོལ་གྱི་ལུས་སྦྱོང་རྩེད་རྭའི་དམིགས་ཡུལ་གཙོ་བོ་ནི་གཞིས་མི་རྒན་དར་གཞོན་གསུམ་ཀུན་ནས་བེད་སྤྱོད་ཀྱིས་རང་ཉིད་ཀྱི་འཕྲོད་བསྟེན་ལ་ལུས་སྦྱོང་གི་ལམ་ནས་བདག་སྐྱོང་བྱེད་རྒྱུ་དེ་ཡིན།དེ་ཡང་ཕྱི་ལོ་ ༢༠༢༡ ཟླ་ ༤ ཚེས་ ༡༦ ཉིན་ཨ་རུ་ཎཱ་ཅལ་མངའ་སྡེ་གཞུངགི་གྲོས་ཚོགས་འཐུས་མི་སྐུ་ཞབས་སམ་ལོང་མོ་སང་ལགས་སྐུ་མགྲོན་གཙོ་བོར་མགྲོན་འབོད་ཞུས་གནང་བ་ལྟར་ཆེད་ཕེབས་ཀྱིས་ཕྱི་རོལ་གྱི་ལུས་སྦྱོང་རྩེད་རྭ་དེ་བཞིན་དབུ་འབྱེད་གནང་ཡོད། སྐབས་དེར་ས་གནས་འགོ་འཛིན་དང་ས་འཐུས་ཚོགས་གཙོ་གཙོས་པའི་ས་གནས་འགོ་འཛིན་ལས་ཁང་གི་ལས་བྱེད་རྣམ་པ་དང་། གཞུང་དང་གཞུང་འབྲེལ་མ་ཡིན་པའི་ཚོགས་པ་སྐྱིད་སྡུག་ཁག་གི་སྐུ་ཚབ་རྣམ་པ། སཾ་བྷོ་ཊ་སློབ་གྲྭའི་དགེ་ཆེ་ལས་ཚབ། གཞིས་གྲོང་ཁག་ལྔའི་སྤྱི་མི་བཅས་ནས་སྐུ་མགྲོན་གཙོ་བོར་སྣེ་ལེན་ཞུས་ཡོད།སྐུ་མགྲོན་གཙོ་བོས་རྩེད་ཆས་རེ་རེར་ལུས་རྩལ་སྦྱོང་བརྡར་བྱས་ཏེ་ཐུགས་ཧ་ཅང་སྤྲོ་པོའི་ཐོག་རང་ཉིད་ཀྱི་ཁྱབ་ཁོངས་ས་གནས་སུའང་དེ་ལྟར་འཛུགས་སྐྲུན་གནང་རྒྱུ་ཡིན་ཞེས་དང་། མེའོ་ཆོས་འཕེལ་གླིང་བོད་མིའི་གཞིས་ཆགས་ཀྱི་སྒྲིག་འཛུགས་དང་འཛིན་སྐྱོང་བཅས་པ་ནི་ཧ་ཅང་ཚགས་ཚུད་པོ་འདུག་པར་བསྔགས་བརྗོད་ཞུ་རྒྱུ་དང་། ལྷག་པར་ཁོང་གིས་ཕྱག་རོགས་གང་ཐུབ་རྒྱུའི་ཞལ་བཞེས་གནང་བྱུང་བ་མ་ཟད་སྔ་ལོ་ཕྱི་ཟླ་ ༡༠ ནང་ས་གནས་འགོ་འཛིན་དང་ལས་དྲུང་། གཞིས་གྲོང་ཁག་གི་སྤྱི་མིའི་སྐུ་ཚབ་གཉིས་བཅས་ཁོང་གི་བཞུགས་གནས་སུ་གཞིས་སྒར་གྱི་ཆུ་མཛོད་ཨ་མར་ས་འོག་ནས་ཆུ་འཐེན་ཆེད་གློག་རིན་དང་སྣུམ་རིན་བཅས་ཀྱི་འགྲོ་གྲོན་ཧ་ཅང་ཆེན་པོ་འགྲོ་བཞིན་འདུག་པར་ཉི་འོད་ཀྱིས་ས་འོག་ནས་ཆུ་འཐེན་འཕྲུལ་ཆས་གསར་འཛུགས་བྱེད་འཆར་ཡོད་རུང་དཔལ་འབྱོར་གྱི་དཀའ་ངལ་འཕྲད་བཞིན་ཡོད་སྐོར་བདེ་སྡུག་ཞུས་པར་ཁོང་གིས་ཕྱི་ལོ་ ༢༠༢༡ ནང་ཕྱག་རོགས་གནང་གི་ཡིན་ཞེས་གསུངས་བྱུང་བ་ལྟར་དན་རས་ཁོང་གིས་དེ་སྔ་ཞལ་བཞེས་གནང་བ་ལྟར་ཟླ་འདིའི་ཟླ་མཇུག་ལ་ས་གནས་འགོ་འཛིན་དང་གཞིས་གྲོང་ལྔའི་སྤྱི་མི་ཁོང་གི་བཞུགས་གནས་སུ་ཆེད་འབོད་ཀྱིས་རོགས་དངུལ་སྒོར་འབུམ་ ༣ གནང་རྒྱུའི་ཞལ་བཞེས་ཐོབ་གནང་བྱུང་ན་དེས་མ་འོངས་པར་གཞིས་ཆཧས་ཀྱི་ཆུའི་ལས་གཞིར་ཕན་ཐོགས་ཧ་ཅང་ཐོབ་ངེས་ཡིན་པར་ས་གནས་འགོ་འཛིན་གྱིས་ཐུགས་རྗེ་ཆེ་ཞུས་ཡོད་པ་བཅས། །