༄༅། །ཕྱི་ལོ་ ༢༠༢༡ ཟླ་ ༤ ཚེས་ ༡༥ ཉིན་བོད་མིའི་སྒྲིག་འཛུགས་ཀྱི་ཀམ་པུ་ཌར་སྡེ་ཚན་དང་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་ཁྱབ་ཁོངས་སྤྱི་ཚོགས་ཡར་རྒྱས་ཐེབས་རྩ་ཟུང་འབྲེལ་ཐོག་གོ་སྒྲིག་གནང་བའི་བོད་མིའི་སྒྲིག་འཛུགས་ཀྱི་ལས་ཁུངས་ཁག་གི་འཐུས་མི་ལས་གྲུབ་པའི་ཀམ་པུ་ཊར་དང་འབྲེལ་བའི་ཕྱག་ལས་གནང་མཁན་རྣམས་ལ་ཐེངས་དང་པོ་དྲ་རྒྱ་བརྒྱུད་ཀམ་པུ་ཊར་གྱི་ཤེས་བྱའི་ཐོག་ཟབ་སྦྱོང་ཞིག་གནང་ཡོད།

ཐེངས་འདིའི་དྲ་ཐོག་ཟབ་སྦྱོང་གི་དམིགས་ཡུལ་གཙོ་བོ་ནི་ཀམ་པུ་ཊར་དང་འབྲེལ་བའི་ཕྱག་ལས་གནང་མཁན་རྣམས་ལ་དྲ་ལམ་བརྒྱུད་འཆད་འཁྲིད་དང་། ཟབ་སྦྱོང་། ལམ་སྟོན་སོགས་གནང་སྟེ་བོད་མིའི་སྒྲིག་འཛུགས་ཀྱི་དགོས་མཁོ་དང་ལས་དོན་གནང་ཕྱོགས་ཁག་ལ་དམིགས་ནས་ལས་བྱེད་རྣམས་ལ་ཀམ་པུ་ཊར་དང་དྲ་རྒྱ་བརྒྱུད་འཛིན་སྐྱོང་གནང་ཕྱོགས་(e-government) དང་། བརྡ་འཕྲིན་འཕྲུལ་ཆས་འགྱུར་ལྡོག་ (digital transformation) བཅས་ཀྱི་ཐ་སྙད་ངོ་སྤྲོད་དང་། ཨི་སི་ཏཱོ་ནའི་གཙུག་ལག་སློབ་ཁང་ (E-governance Academy  of Estonia) གྱི་ཉམས་མྱོང་ལ་གཞིགས་ཏེ་འཕྲུལ་རིག་དང་འབྲེལ་བའི་དགོས་མཁོ་དང་གློག་རྡུལ་གཞུང་གི་ཐ་སྙད་རྣམས་རྒྱུས་མངའ་ལོན་ཐུབ་པ་བྱ་རྒྱུ། གློག་རྡུལ་གཞུང་འགྱུར་ལྡོག་གི་ཐ་སྙད་ཡར་རྒྱས་བཏང་སྟེ་བོད་མིའི་སྒྲིག་འཛུགས་ཀྱི་དམིགས་བསལ་དགོས་མཁོ་དང་ནུས་རྩལ་སོགས་མཚོན་ཐུབ་པ་དང་གལ་གནད་ཅིག་ལ་བརྩི་རྒྱུ་བཅས་ཡིན།

དེ་ཡང་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་དྲུང་ཆེ་ཡེ་ཤེས་དབང་མོ་ལགས་ཀྱིས་དྲ་ཐོག་ཀམ་པུ་ཊར་ཤེས་བྱའི་ཟབ་སྦྱོང་དངོས་སུ་འགོ་འཛུགས་གནང་བ་དང་འབྲེལ། མཉམ་ཞུགས་པ་རྣམས་ལ་བོད་མིའི་སྒྲིག་འཛུགས་ཀྱི་མ་འོངས་ཀམ་པུ་ཊར་གྱི་འཆར་སྣང་དང་། དེའི་ཁྱབ་ཚད་དང་གོ་སྐབས་སོགས་དྲན་སྐུལ་གནང་ཡོད།

ཟབ་སྦྱོང་དེ་བཞིན་ཁེ་ན་ཌའི་ (Zeropoint Security Corp) དང་།  ཨི་སི་ཏཱོ་ནའི་ཐེབས་རྩ་ (e-Government Academy ) ཐུན་མོང་ནས་མཐུན་འགྱུར་དང་། ཨ་རིའི་ཕྱི་སྲིད་ལྷན་ཁང་གི་མང་གཙོ་དང་། འགྲོ་བ་མིའི་ཐོབ་ཐང་། ངལ་རྩོལ་གོང་འཕེལ་ལས་དོན་ཚོགས་ཆུང་ (Bureau of Democracy, Human Rights, and Labor) གིས་  (ZeroPoint Security Corp) ཞེས་པ་དང་ལྷན་རོགས་དངུལ་གནང་བ་ཞིག་ཡིན་པ་བཅས། །