༄༅། །ཕྱི་ལོ་ ༢༠༢༡ ཟླ་ ༤ ཚེས་ ༢ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་མང་གཙོ་དང་འགྲོ་བ་མིའི་ཐོབ་ཐང་། སྣ་མང་རིང་ལུགས་གོང་སྤེལ་བསྟི་གནས་ཁང་ (Centre for Democracy, Pluralism and Human Rights) གིས་འདོན་སྤེལ་གནང་བའི་རྒྱ་གར་གྱི་ཁྱིམ་མཚེས་རྒྱལ་ཁབ་བདུན་གྱི་ནང་འགྲོ་བ་མིའི་ཐོབ་ཐང་གི་གནས་སྟངས་སྐོར་སྙན་ཐོ་དེ་དབུ་འབྱེད་གནང་ཡོད།དེ་ཡང་མང་གཙོ་དང་འགྲོ་བ་མིའི་ཐོབ་ཐང་། སྣ་མང་རིང་ལུགས་གོང་སྤེལ་བསྟི་གནས་ཁང་གི་དྲུང་ཆེ་ (M Vivekanand Nartam) ལགས་ཀྱིས་མང་གཙོ་དང་འགྲོ་བ་མིའི་ཐོབ་ཐང་། སྣ་མང་རིང་ལུགས་གོང་སྤེལ་བསྟི་གནས་ཁང་གི་ངོས་ནས་རང་དབང་གི་སྒོ་ནས་རྒྱ་གར་གྱི་ཁྱིམ་མཚེས་བོད་དང་། པ་ཀི་སི་ཐན། བྷང་ལ་དེ་ཤིས། ཨ་ཕི་གྷ་ནས་སི་ཐན། མི་ལེ་ཤི་ཡ། ཨིན་ཌོ་ནི་ཤི་ཡ། ཤྲི་ལངྐ་བཅས་ཀྱི་འགྲོ་བ་མིའི་ཐོབ་ཐང་གི་གནས་སྟངས་སྐོར་རྟོག་ཞིབ་གནང་སྟེ་སྙན་ཐོ་བཏོན་ཡོད་པ་སོགས་ཀྱི་སྐོར་གསུངས། སྐབས་དེར་དཔལ་ལྡན་སྲིད་སྐྱོང་མཆོག་གིས་གསུང་དོན།  ཕྱི་ལོ་ ༢༠༢༡ ལོར་འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་སྙན་ཐོ་ནང་བོད་ནི་འཛམ་གླིང་ནང་འགྲོ་བ་མིའི་ཐོབ་ཐང་གི་གནས་སྟངས་ཆེས་སྡུག་ཤོས་དེ་ཡིན་པ་འཁོད་ཡོད་པ་དང་། རྒྱ་ནག་གི་སྐོར་རྟོགས་དགོས་ན་ངེས་པར་དུ་བོད་ཀྱི་གནད་དོན་སྐོར་རྟོགས་དགོས། ཞེས་དང་། རྒྱ་གར་གྱི་མཐོ་སློབ་ཁག་གི་ནང་བོད་རིག་པའི་གནད་དོན་དང་འབྲེལ་བའི་སྐོར་གོ་རྟོགས་རྒྱ་ཆེ་སྤེལ་དགོས། རྒྱ་གར་མི་མང་དང་ལྷག་པར་རྒྱ་གར་གྱི་གཞོན་སྐྱེས་རྣམས་ནས་རྒྱ་གར་གྱི་ཁེ་ཕན་ལ་དམིགས་ཏེ་བོད་དོན་སྐོར་སློབ་སྦྱོང་མང་ཙམ་གནང་དགོས། ཞེས་སོགས་གསུངས། འགྲོ་བ་མིའི་ཐོབ་ཐང་གི་སྙན་ཐོ་དབུ་འབྱེད་མཛད་སྒོའི་ཐོག་ཕྱི་ནང་གི་མཁས་དབང་ཁག་གཅིག་དང་། ལྡི་ལི་སྐུ་ཚབ་དོན་གཅོད་འབྲོང་ཆུང་དངོས་གྲུབ་ལགས། དྲུང་ཆེ་དོན་གྲུབ་རྒྱལ་པོ་ལགས་སོགས་མཉམ་ཞུགས་གནང་ཡོད།

སྤྱིར་བསྟི་གནས་ཁང་དེ་ནི་རྒྱ་གར་རྒྱལ་ཡོངས་ནང་གཙུག་ལག་སློབ་གཉེར་ཁང་འདྲ་མིན་ནས་ཡིན་པའི་དགེ་སློབ་དང་ཁྲིམས་ལུག་དབང་འཛིན་གྱི་མཁས་དབང་། དེ་བཞིན་སྤྱི་ཚོགས་དང་ཞབས་པ་ཁག་གཅིག་ལས་གྲུབ་པའི་སྒྲིག་འཛུགས་ཤིག་ཡིན་པ་དང་། རྒྱལ་ཕྱི་ནང་གཉིས་སུ་འགྲོ་བ་མིའི་ཐོབ་ཐང་དང་འདྲ་མཉམ་གྱི་ནུས་པ་གོང་མཐོར་གཏོང་རྒྱུའི་ཆེད་ཕྱག་ལས་གནང་བཞིན་པ་ཞིག་རེད་འདུག །