༄༅། །ཕྱི་ལོ་ ༢༠༢༡ ཟླ་ ༤ ཚེས་ ༡༨ ཉིན་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་དབུ་མའི་ལམ་གྱི་ལས་འཆར་གོ་སྒྲིག་ཚན་པས་བོད་ཀྱི་ཟློས་གར་ཚོགས་པའི་ཚོགས་ཁང་ནང་བོད་ཀྱི་བུད་མེད་ལྷན་ཚོགས་ཀྱི་ཚོགས་མི་རྣམས་ལ་གཉིས་སྨན་དབུ་མའི་ལམ་གྱི་སྲིད་བྱུས་སྐོར་ཉིན་གཅིག་གི་ཟབ་སྦྱོང་ཞིག་གོ་སྒྲིག་ཞུས་ཡོད།དེ་ཡང་ཟབ་སྦྱོང་དེ་ནི་བོད་ཀྱི་བུད་མེད་ལྷན་ཚོགས་ཀྱི་ཚོགས་ཆེན་སྐབས་ ༡༣ དང་སྟབས་བསྟུན་བོད་ཀྱི་བུད་མེད་ལྷན་ཚོགས་ནས་རེ་སྐུལ་ཞུས་པ་བཞིན་རྒྱ་གར་ནང་གི་བོད་མིའི་གཞིས་ཆགས་ཁག་དང་། ཕྱི་རྒྱལ་ནས་ཕེབས་པའི་བོད་ཀྱི་བུད་མེད་ལྷན་ཚོགས་ཀྱི་ཚོགས་མི་རྣམས་ལ་གཉིས་སྨན་དབུ་མའི་གྱི་སྲིད་བྱུས་སྐོར་གོ་རྟོགས་ཡོང་ཕྱིར་དམིགས་ཏེ་གོ་སྒྲིག་ཞུས་པ་ཞིག་ཡིན།ཉིན་གཅིག་རིང་གི་ཟབ་སྦྱོང་དེ་བཞིན་ཚོགས་ཐུན་གཉིས་སུ་བགོས་ཏེ་སྔ་དྲོའི་ཚོགས་ཐུན་སྐབས་གཉིས་སྨན་དབུ་མའི་ལམ་གྱི་སྲིད་བྱུས་ཀྱི་གོ་དོན་ངོ་སྤྲོད་གནང་ཡོད་པ་དང་། མཉམ་ཞུགས་པ་རྣམས་ཀྱིས་གཉིས་སྨན་དབུ་མའི་ལམ་གྱི་སྲིད་བྱུས་ཐོག་གོ་རྟོགས་ཡག་པོ་ཡོང་ཕྱིར་སྡེ་ཚན་འདྲ་མིན་བགོས་ཏེ་དབུ་མའི་ལམ་གྱི་སྲིད་བྱུས་དང་འབྲེལ་བའི་བརྗོད་གཞི་འདྲ་མིན་ཐོག་གྲོས་བསྡུར་གནང་བཅུག་ཡོད་པ་དང་སྡེ་ཚན་ནང་ཁུལ་གྱི་གྲོས་བསྡུར་གནང་གྲུབ་རྗེས་མཉམ་ཞུགས་པ་རྣམས་ཀྱིས་བརྗོད་གཞི་རེ་རེའི་ཐོག་གཏམ་བཤད་གནང་ཡོད། གཏམ་བཤད་སྐབས་དོགས་འདྲི་ཡོད་པ་རྣམས་ལ་གྲོས་བསྡུར་གནང་གྲུབ་རྗེས་གཙོ་སྐྱོང་བས་བརྗོད་གཞི་རྣམས་ལ་ཁྱོན་ཡོངས་ནས་ངོ་སྤྲོད་དང་སྦྲགས་མཇུག་སྡོམ་གསུང་བཤད་གནང་ཡོད།དེ་བཞིན་ཉིན་རྒྱབ་ཀྱི་ཚོགས་ཐུན་སྐབས་མཉམ་ཞུགས་པ་རྣམས་ལ་རྩོད་རྙོག་འདུམ་འགྲིག་སྐོར་ཟབ་ཁྲིད་གནང་ཡོད་པ་དང་། དེ་ནི་དབུ་མའི་ལམ་གྱི་སྲིད་བྱུས་སྐོར་ཤེས་རྟོགས་བྱ་རྒྱུར་གལ་འགངས་ཤིན་ཏུ་ཆེ་བ་ཞིག་ཡིན། མཉམ་ཞུགས་པ་རྣམས་དབུ་མའི་ལམ་གྱི་སྲིད་བྱུས་ཀྱི་གོ་དོན་ཡག་པོ་གསལ་བཤད་བྱ་ཐུབ་པའི་ཆེད་བྱེད་སྒོ་མང་པོ་ཞིག་གྲ་སྒྲིག་ཞུས་ཡོད་པ་མ་ཟད་མཉམ་ཞུགས་པ་རྣམས་ཕན་ཚུན་གྲོས་བསྡུར་གྲུབ་པའི་རྗེས་དབུ་མའི་ལམ་གྱི་སྲིད་བྱུས་ཐོག་ལྟ་ཚུལ་མི་འདྲ་བ་གཉིས་བྱུང་ཡོད། སྡེ་ཚན་གཅིག་གིས་དབུ་མའི་ལམ་གྱི་སྲིད་བྱུས་ནི་ཕྱོགས་གཉིས་ཀ་ཚུད་པའི་སྒོ་ནས་གནད་དོན་འདུམ་འགྲིག་བྱ་རྒྱུ་ཞིག་ཡིན་པ་དང་། སྡེ་ཚན་གཞན་དེས་དབུ་མའི་ལམ་གྱི་སྲིད་བྱུས་ནི་ཕྱོགས་གཉིས་ཕན་ཚུན་མཉམ་ལས་བྱ་རྒྱུ་ཞིག་ཡིན་ཞེས་ལྟ་ཚུལ་མི་འདྲ་བའི་ཐོག་བགྲོ་གླེང་བྱས་ཡོད།ཟབ་སྦྱོང་གནང་མཁན་ཕྱི་དྲིལ་ལས་བྱེད་འབྲུག་བསྟན་སྐྱིད་ལགས་དང་། རིན་ཆེན་ལགས། བསྟན་འཛིན་ཀུན་མཁྱེན་ལགས།  ངག་དབང་ཆོས་དར་ལགས་བཅས་ཡིན། ཐེངས་འདིའི་གཉིས་སྨན་དབུ་མའི་ལམ་གྱི་སྲིད་བྱུས་སྐོར་གོ་རྟོགས་ཀྱི་ཟབ་སྦྱོང་ཐོག་བོད་ཀྱི་བུད་མེད་ལྷན་ཚོགས་ཀྱི་ས་གནས་བུད་མེད་ལྷན་ཚོགས་ཁག་ ༡༨ ནས་འཐུས་མི་གཉིས་བཅས་ཁྱོན་མི་གྲངས་ ༣༠ མཉམ་ཞུགས་གནང་ཡོད་པ་བཅས། །