༄༅། །བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་བུད་མེད་ནུས་སྟོབས་གོང་འཕེལ་ཚན་པས་བོད་ཀྱི་བུད་མེད་ཁེ་ལས་པ་དང་། ལྷག་པར་ན་ནིང་དགུན་དུས་སུད་ཚོང་ནང་མཉམ་ཞུགས་གནང་མཁན་བུད་མེད་ཁེ་ལས་པ་ཁག་གཅིག་གི་ཐོག་ཉམས་ཞིབ་གནང་སྟེ་སྙན་ཐོ་བཏོན་ཡོད།

དེ་ཡང་བོད་ཀྱི་བུད་མེད་ཀྱིས་དཔལ་འབྱོར་ཁྱབ་ཁོངས་སུ་བཟུང་བའི་གོ་གནས་གལ་ཆེན་ལ་དམིགས་ནས་ད་ལན་གྱི་ཉམས་ཞིབ་འདིས་དཔལ་འབྱོར་གནས་བབས་ཀྱི་ཁྲོད་དུ་བུད་མེད་ཀྱི་ནུས་པ་ཇི་ལྟར་ཐོན་ཚུལ་ལ་དཔྱད་བསྡུར་བྱས་ཏེ་ཁྲོམ་ར་ལ་ཤུགས་རྐྱེན་ཇི་ལྟར་ཐེབས་ཚུལ་དང་། ཁྲོམ་ར་དེ་དག་གིས་བུད་མེད་ཚོའི་འཚོ་བར་ཤུགས་རྐྱེན་ཇི་ལྟར་ཐེབས་ཚུལ་ལ་དམིགས་འཛུགས་བྱས་ཡོད། 

བུད་མེད་ནུས་སྟོབས་གོང་འཕེལ་ཚན་པས་བོད་ཀྱི་བུད་མེད་ཀྱིས་བཟུང་བའི་དམིགས་བསལ་དཔལ་འབྱོར་ཁྱབ་ཁོངས་ཐོག་ཉམས་ཞིབ་བྱས་ཏེ་ལས་འཆར་འདིས་བུད་མེད་ཀྱི་བདེ་འཇགས་དང་། འགོ་ཁྲིད་ཁྲོད་ཕོ་མོའི་ཧེ་བག་གཞི་རྒྱ་ཆེ་བའི་གནད་དོན་ཤེས་རྟོགས་བྱས་པ་དང་། དེས་བོད་ཀྱི་བུད་མེད་ལ་ཤུགས་རྐྱེན་གང་འདྲ་ཐེབས་མིན་ཤེས་རྟོགས་བྱས་ཡོད།

སྙན་ཐོའི་མཇུག་བསྡོམས་ནང་ཁེ་ལས་པའི་ལས་རིགས་ཁྲོད་བུད་མེད་ལ་གོ་སྐབས་རྒྱ་ཆེ་རུ་ཇི་ལྟར་གཏོང་དགོས་མིན་སོགས་ཀྱི་ཐོག་ཉམས་ཞིབ་གནང་ཡོད། ཨ་རིའི་རྒྱ་གར་ཐེབས་རྩ་ཁང་ ( American Indian Foundation) གི་མཐུན་འགྱུར་འོག་བསྟན་འཛིན་སྒྲོལ་དཀར་ལགས་ཀྱིས་སྣེ་ཁྲིད་དེ་ཉམས་ཞིབ་གནང་བ་ཞིག་ཡིན།།