༄༅། །བོད་མིའི་བླ་ན་མེད་པའི་དབུ་ཁྲིད་༸གོང་ས་ལྷ་མིའི་རྣམ་འདྲེན་༸སྐྱབས་མགོན་རྒྱལ་བའི་དབང་པོ་སྐུ་ཕྲེང་བཅུ་བཞི་པ་ཆེན་པོ་མཆོག་གིས་བོད་མི་རྣམས་ལ་མང་གཙོའི་ལམ་སྲོལ་བཟང་པོ་གསོལ་སྩལ་བཀའ་དྲིན་ཆེ་བ་བསྐྱངས་པ་དང་། ལྷག་པར་བོད་མིའི་འཕྲལ་ཕུགས་གཉིས་ལ་དགེ་མཚན་ཆེར་བསྐྱེད་གཟིགས་ཏེ་ཆབ་སྲིད་ཀྱི་སྐུ་དབང་ཡོངས་རྫོགས་མང་གཙོའི་ལམ་ནས་མི་དམངས་ཀྱིས་འོས་འདེམས་བྱས་པའི་དབུ་ཁྲིད་རྣམས་ལ་གསོལ་སྩལ་མཛད་ཡོད་པ་ལྟར། ཕྱི་ལོ་ ༢༠༢༡ ཟླ་ ༤ ཚེས་ ༡༡ རེས་གཟའ་ཉི་མའི་ཉིན་འཛམ་གླིང་ཡུལ་གྲུ་གང་སར་གནས་པའི་བཙན་བྱོལ་བོད་མི་ལོ་ན་བཅོ་བརྒྱད་སོན་པ་ཡན་རྣམས་ནས་མང་གཙོའི་ཁེ་དབང་ལོངས་སུ་སྤྱད་དེ་ཚང་ཁ་ཤིག་ཤིག་ངང་བོད་མིའི་སྒྲིག་འཛུགས་ཀྱི་སྲིད་སྐྱོང་དང་། བོད་མི་མང་སྤྱི་འཐུས་སྐབས་ ༡༧ པའི་སྤྱི་འཐུས་འོས་འདེམས་ཆེད་དངོས་གཞིའི་འོས་ཤོག་འཕངས་ཡོད།
དེ་ཡང་གོང་ཚེས་ཉིན་བཞུགས་སྒར་ཁུལ་དུ་སྔ་དྲོ་ཆུ་ཚོད་ ༨ ནས་ཕྱི་དྲོ་ཆུ་ཚོད་ ༥ བར་འོས་ཤོག་འཕེན་རྒྱུའི་དུས་ཚོད་གཏན་འབེབས་ཀྱི་གསལ་བསྒྲགས་སྔོན་སོང་ལྟར། ས་ཚིགས་སོ་སོར་བོད་མི་རྒན་དར་གཞོན་གསུམ་གྱིས་མ་བསྐུལ་དང་བླངས་ཐོག་ཚ་ཚ་འུར་འུར་ངང་དངོས་གཞིའི་འོས་བསྡུ་ཆེན་མོའི་ནང་ཆ་ཤས་བླངས་ཡོད།
སྐབས་དེར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་འོས་ཤོག་འཕངས་ཏེ་གསར་འགོད་པ་རྣམ་པར་གསུང་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གསོལ་རས་སྩལ་བའི་མང་གཙོའི་ལམ་ལུགས་ལག་བསྟར་བྱེད་པ་ནི་རྒྱ་ནག་གཞུང་ལ་བརྡ་ལན་དང་། བོད་ནང་ཡོད་པའི་བོད་མི་རྣམས་ཀྱི་སེམས་ཤུགས་འཕར་གཞི་ཞིག་ཆགས་ཡོད། བཙན་བྱོལ་ནང་བོད་མི་ཉུང་ཤས་ལས་མེད་པ་མ་ཟད་འཛམ་གླིང་ཡུལ་གྲུ་གང་སར་ཁ་ཐོར་ནས་གནས་ཡོད་ཀྱང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་དང་མི་ཐོག་རྒན་པས་སྐུ་ལས་བསྐྱོན་ཏེ་མང་གཙོའི་ལམ་ལུགས་ལག་བསྟར་གནང་བཞིན་ཡོད། 
སྲིད་སྐྱོང་མཆོག་གིས་དབུ་ཁྲིད་པའི་མ་འོངས་བཀའ་ཤག་ལ་སྐབས་ ༡༥ པའི་བཀའ་ཤག་ནས་བྱ་བ་གང་ཅིར་ལམ་ལྷོངས་ཡོང་བའི་སྨོན་འདུན་ཡོད། རྒྱལ་སྤྱིའི་ཐོག་བཀའ་ཤག་འདི་ལས་ལྷག་རྒྱབ་སྐྱོར་ཐོབ་པ་དང་། བོད་དོན་བདེན་མཐའ་གསལ་བར་ཤོག་ཅེས་ཁ་ཞེ་གཉིས་མེད་ཀྱི་སྒོ་ནས་སྨོན་འདུན་ཡོད། གང་ཡིན་ཞེ་ན་འཛིན་སྐྱོང་གི་ལས་དོན་མགོ་རྙོག་པོ་རེད། སྲིད་སྐྱོང་སུ་ཕེབས་པ་ཡིན་ནའང་དཀའ་ངལ་ཕྲན་བུ་ཡོད། ད་ལྟའིི་བཀའ་ཤག་གི་ལས་ཡུན་འཁྱུར་ལ་ཉེ་བ་ཡོད། ང་རང་ཡིན་ནའང་དགའ་སྤྲོ་ཆེན་པོའི་ངང་སྲིད་སྐྱོང་གསར་པ་སུ་ཕེབས་པ་ཡིན་ནའང་དེ་ལ་རྩིས་སྤྲོད་ཐུབ་པ་ཡོང་གི་འདུག་སྙམ་པའི་དགའ་ཚོར་ཡོད།
འདས་པའི་ལོ་ངོ་བཅུའི་ནང་གནས་ཚུལ་གང་བྱུང་བ་ཡིན་ནའང་གདོང་ལེན་དང་བཟོད་སྒོམ། འགན་ཁུར་དགོས་རིགས་ཁྱེར་ཡོད། སྤྱི་ནོར་གོང་ས་སྐྱབས་མགོན་ཆེན་པོ་མཆོག་གིས་རིང་ནས་སྙིང་དུ་བརྣག་པའི་འདོད་པའི་དོན། ཞེས་ཆབ་སྲིད་ཀྱི་སྐུ་དབང་ཡོངས་རྫོགས་སྩལ་བའི་བཀའ་སློབ་ཕེབས་ཡོད། སྐབས་དེར་ཉེན་ཁ་བཅུ་ཞེས་བཀའ་མོལ་མང་པོ་བྱུང་བ་རེད། ད་ཆ་ཉེན་ཁ་དེ་དག་གང་ཙམ་ཉུང་དུ་ཕྱིན་ཡོད་པ་མ་ཟད། ང་ཚོས་རྩིས་སྤྲོད་ཐུབ་ཀྱི་རེད། དེ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་ལྟར་གྲུབ་འབྲས་ཆེན་པོ་ཞིག་རྩི་བཞིན་ཡོད། ཅེས་གསུངས། །
