༄༅། །ཕྱི་ལོ་ ༢༠༢༡ ཟླ་ ༤ ཚེས་ ༢༤ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ལ་ནིའུ་ཡོག་དང་ནིའུ་ཇར་སི་བོད་རིགས་སྤྱི་མཐུན་ཚོགས་པས་ཕུན་ཚོགས་སྡེ་བཞི་ཚོགས་ཁང་དུ་ཐུགས་རྗེ་ཆེ་ཞུའི་མཛད་རིམ་ཞིག་གོ་སྒྲིག་ཞུས་ཏེ་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་འདས་པའི་ལོ་ངོ་བཅུའི་རིང་སྲིད་སྐྱོང་གི་མཛད་འགན་བཞེས་ཏེ་གཟེངས་སུ་ཐོན་པའི་ཕྱག་ལས་གནང་བར་ཐུགས་རྗེ་ཆེ་ཞུས་པ་དང་འབྲེལ་ཕུལ་བྱུང་དབུ་ཁྲིད་ཀྱི་གཟེངས་རྟགས་ཕུལ་ཡོད། 
ཕྱི་ལོ་ ༢༠༡༡ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་མིའི་འཕྲལ་ཕུགས་ཀྱི་བདེ་རྩ་ཁོ་ནར་དགོངས་བཞེས་བླ་མེད་ཀྱིས་ཆབ་སྲིད་དང་འཛིན་སྐྱོང་གི་སྐུ་དབང་ཡོངས་སུ་རྫོགས་པ་མི་མང་གིས་ཐད་ཀར་འོས་འདེམས་བྱས་པའི་འགོ་ཁྲིད་རྣམས་ལ་རྩིས་སྤྲོད་མཛད་པ་ནས་བོད་གཞུང་དགའ་ལྡན་ཕོ་བྲང་ཕྱོགས་ལས་རྣམ་རྒྱལ་གྱིས་ལོ་ངོ་ ༣༦༠ རིང་སྲིད་དབང་བསྐྱངས་པའི་སྐུ་དབང་ཡོངས་རྫོགས་མང་གཙོའི་ལམ་ནས་འོས་འདེམས་བྱུང་བའི་འགོ་ཁྲིད་ལ་རྩིས་སྤྲོད་མཛད་ཡོད།
དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ནི་མི་མང་གིས་ཐད་ཀར་འོས་འདེམས་བྱས་པའི་བོད་མིའི་སྒྲིག་འཛུགས་ཀྱི་སྲིད་སྐྱོང་ཐོག་མ་དེ་ཆགས་ཀྱི་ཡོད་པ་དང་། ཕྱི་ལོ་ ༢༠༢༡ ཟླ་ ༥ ཚེས་ ༢༦ ཉིན་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་བཀའ་ཤག་གི་ཁྲིམས་མཐུན་མཚོན་རྟགས་བཀའ་དམ་སྲིད་ཞི་བདེ་སྐྱིད་མ་དེ་ཡོང་རྒྱུའི་སྲིད་སྐྱོང་མཆོག་ལ་རྩིས་སྤྲོད་གནང་རྒྱུ་ཡིན་པ་རེད།
དེ་ཡང་ཐུགས་རྗེ་ཆེ་ཞུའི་མཛད་རིམ་ཐོག་ནིའུ་ཡོག་དང་ནིའུ་ཇར་སི་བོད་རིགས་སྤྱི་མཐུན་ཚོགས་པས་དཔལ་ལྡན་སྲིད་སྐྱོང་མཆོག་ལ་ཕུལ་བྱུང་དབུ་ཁྲིད་ཀྱི་གཟེངས་རྟགས་ཤིག་ཕུལ་རྗེས་ཕི་ལ་ཌེལ་ཕི་ཡ་བོད་རིགས་ཚོགས་པའི་ཚོགས་གཙོས་ཚོགས་པའི་ངོས་ནས་གཟེངས་རྟགས་དང་དྲན་རྟེན་ཕྱག་རྟགས་བཅས་ཕུལ་ཡོད་པ་དང་། དེ་བཞིན་གཅིག་སྒྲིལ་ཚོགས་པས་དཔལ་ལྡན་སྲིད་སྐྱོང་མཆོག་ལ་གཟེངས་རྟགས་ཤིག་ཕུལ་ཡོད།
དེ་ཡང་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་མཛད་རིམ་ཐོག་དཔལ་ལྡན་སྲིད་སྐྱོང་མཆོག་གི་རླབས་ཆེན་གྱི་བྱས་རྗེས་འགའ་གསལ་འདོན་གནང་བ་དང་ཆབས་ཅིག དཔལ་ལྡན་སྲིད་སྐྱོང་མཆོག་གི་བཟའ་ཟླ་དང་བུ་མོ་གཉིས་ཀྱིས་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཡོད།
དེ་བཞིན་མཛད་རིམ་ཐོག་སྤྱི་ཟུར་འཇམ་དབྱངས་བཟོད་པ་ལགས་ཀྱིས་བརྩམས་གནང་བའི་མི་མང་གི་སྲིད་སྐྱོང་། ཞེས་པའི་དཔེ་དེབ་དེ་དཔལ་ལྡན་སྲིད་སྐྱོང་མཆོག་གིས་གཙོས་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་དང་། ནིའུ་ཡོག་དང་ནིའུ་ཇར་སི་བོད་རིགས་སྤྱི་མཐུན་ཚོགས་པའི་ཚོགས་གཙོ་བཅས་ཀྱིས་དབུ་འབྱེད་གནང་ཡོད།
དེ་རྗེས་དཔལ་ལྡན་སྲིད་སྐྱོང་མཆོག་གིས། མཛད་རིམ་གོ་སྒྲིག་གནང་མཁན་རྣམས་ལ་ཐུགས་རྗེ་ཆེ་ཞུས་པ་དང་འབྲེལ་དཔལ་ལྡན་སྲིད་སྐྱོང་མཆོག་གིས་ལོ་བཅུའི་ལས་ཡུན་རིང་བོད་མིའི་སྒྲིག་འཛུགས་ནང་ཞབས་འདེགས་ཞུས་པའི་སྐབས་ཀྱི་མངར་སྐྱུར་འདྲེས་མའི་མྱོང་ཚོར་དང་། འདས་པའི་ལོ་ངོ་བཅུའི་ནང་ལས་དོན་ལེགས་གྲུབ་བྱུང་བ་ཁག་གི་གཙོ་བོ་ནི་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ཉག་གཅིག་ལ་བརྟེན་ནས་བྱུང་ཡོད་སྐོར་དང་།
དེ་བཞིན་ཉེ་ཆར་ཨ་རིའི་ཕྱི་སྲིད་ལྷན་ཁང་གི་མཐོ་རིམ་ལས་བྱེད་ཁག་གཅིག་དང་ལྷན་བྱང་ཨ་རིའི་བོད་ཀྱི་སྐུ་ཚབ་དོན་གཅོད་ཁང་དུ་གཞུང་འབྲེལ་ཚོགས་འདུ་ཐེངས་དང་པོ་ཚོགས་ཐུབ་པ་ནི་བོད་མིའི་སྒྲིག་འཛུགས་ཀྱི་ཕྱི་སྲིད་འབྲེལ་ལམ་ཐོག་ལོ་རྒྱུས་རང་བཞིན་ལྡན་པ་ཞིག་ཆགས་ཡོད་སྐོར་གསུངས་པ་མ་ཟད། བོད་མི་ཡོངས་ཀྱིས་སྤྱི་དོན་སླད་ནུས་པ་མཉམ་སྤུངས་དང་རྡོག་རྩ་ཆིག་སྒྲིལ་སྔར་ལྷག་གནང་དགོས་སྐོར་དང་། སྲིད་སྐྱོང་གསར་པ་མཆོག་དང་། བཀའ་ཤག སྤྱི་འཐུས་བཅས་ཀྱི་ལས་དོན་ཁག་ལམ་ལྷོངས་ཡོང་བའི་སྨོན་འདུན་དང་འབྲེལ་ཁོང་ཚོའི་གྲུབ་འབྲས་ནི་བོད་ཀྱི་འཐབ་རྩོད་ལས་འགུལ་ལ་ཐོབ་པའི་གྲུབ་འབྲས་ཤིག་ཡིན་ཞེས་གསུངས།
དེ་ཉིན་གྱི་ཕྱི་དྲོར་དཔལ་ལྡན་སྲིད་སྐྱོང་མཆོག་ལ་ཆེ་བསྟོད་ཀྱི་གསོལ་སྟོན་རྒྱས་པ་ཞིག་འདེགས་འབུལ་ཞུས་ཡོད་པ་བཅས། །
