༄༅། །ཕྱི་ལོ་ ༢༠༢༡ ཟླ་ ༤ ཚེས་ ༨ ཉིན་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་ཀོ་ལེ་གྷལ་དོན་ལྡན་གླིང་བོད་མིའི་གཞིས་ཆགས་སུ་ཕེབས་འབྱོར་སྐབས་ས་གནས་འགོ་འཛིན་དགེ་ལེགས་འབྱུང་གནས་ལགས་དང་། སྤྱི་མི་བརྒྱ་དཔོན། གཞུང་འབྲེལ་མིན་པའི་ཚོགས་པ་སྐྱིད་སྡུག་ཁག་གི་ལས་ཀྱི་སྣེ་མོ་བ་རྣམ་པ། སློབ་ཕྲུག་སོགས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།
ཏོག་དབྱིབས་གཉན་རིམས་སྔོན་འགོག་དང་ཁྱབ་གདལ་མི་འགྲོ་བའི་དགོས་ངེས་ཀྱི་ཁྲིམས་སྒྲིག་ལྟར་བཀའ་བློན་མཆོག་གིས་ས་གནས་སྨན་ཁང་དུ་ཏོག་དབྱིབས་གཉན་རིམས་ཡོད་མེད་བརྟག་དཔྱད་བྱེད་སྐབས་ནད་རྟགས་མེད་པའི་གྲུབ་འབྲས་ཐོན་ཡོད།
ཉིན་དེར་བཀའ་བློན་མཆོག་གིས་ཀོ་ལེ་གྷལ་སཾ་བྷོ་ཊ་སློབ་གྲྭར་ཕེབས་ཏེ་སློབ་གྲྭའི་དཔེ་མཛོད་ཁང་གི་ཁང་མིག་གསར་པ་དང་། སྤྱོད་སྒོ་སྣ་མང་གི་ཚོགས་ཁང་བཅས་དབུ་འབྱེད་གནང་གྲུབ་རྗེས་ས་གནས་འགོ་འཛིན་དང་སློབ་གྲྭའི་སློབ་སྤྱི་གཉིས་ཀྱིས་བཀའ་བློན་མཆོག་ལ་སློབ་གྲྭའི་ནང་ལེགས་གྲུབ་བྱུང་བའི་འཛུགས་སྐྲུན་ལས་གཞི་ཁག་འགྲེལ་བརྗོད་གནང་ཡོད།
སྐབས་དེར་སློབ་གྲྭའི་ཚོགས་ཁང་ནང་དབུ་འབྱེད་མཛད་སྒོ་དང་འབྲེལ་བཀའ་བློན་མཆོག་གིས་ལོ་མང་རིང་བོད་མིའི་སྒྲིག་འཛུགས་ནང་ཞབས་འདེགས་ཞུས་པ་དང་། དེ་བཞིན་ནང་སྲིད་བཀའ་བློན་གྱི་འགན་ཁུར་བཞེས་ཏེ་གཞིས་ཆགས་ཡར་རྒྱས་བཏང་བ་བཅས་ལ་ཐུགས་རྗེ་ཆེ་ཞུའི་མཛད་སྒོ་ཞིག་ཚོགས་ཡོད། ལས་རིམ་ཐོག་ཀོ་ལེ་གྷལ་དོན་ལྡན་གླིང་བོད་མིའི་གཞིས་ཆགས་ཀྱི་ས་གནས་འགོ་འཛིན་དགེ་ལེགས་འབྱུང་གནས་ལགས་ཀྱིས་གཞིས་ཆགས་ཀྱི་ལམ་ཀ་སོགས་འཛུགས་སྐྲུན་ལས་གཞི་ཁག་དང་། དེ་བཞིན་ལོ་གཉིས་ཀྱི་ལས་ཡུན་རིང་ཧིན་སྒོར་ས་ཡ་ ༡༢༠ གསོག་སྒྲུབ་ཐུབ་ཡོད་སྐོར། གྲུབ་འབྲས་དེ་དག་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་དང་། ས་གནས་འགོ་འཛིན་ལས་ཁུངས་ཀྱི་འབྲེལ་ཡོད་ལས་བྱེད་དང་ཚོགས་པ་སྐྱིད་སྡུག་ཁག་གི་ལས་ཀྱི་སྣེ་མོ་བ་རྣམས་ཀྱི་རམ་འདེགས། ལྷག་པར་བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་ནས་རྒྱབ་སྐྱོར་གནང་བ་ལས་བྱུང་བ་ཞིག་ཡིན་སྐོར་གསུངས་ཡོད།
དེ་རྗེས་ནང་སྲིད་བཀའ་བློན་མཆོག་གིས་ད་ལམ་ས་གནས་སུ་ཕེབས་དགོས་དོན་ནི་ས་གནས་མི་མང་གིས་ཁོང་རང་ཉིད་ལ་ཡིད་ཆེས་ཀྱིས་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་གྱི་འགན་འཁྲི་གནང་སྟེ་ཞབས་སྤྱི་ཞུ་རྒྱུ་བྱུང་བར་ཐུགས་རྗེ་ཆེ་ཞུའི་འཐོན་ཕྱག་སླད་ཕེབས་ཡོད་སྐོར་དང་། དེ་དང་མཉམ་དུ་ས་གནས་སུ་གྲུབ་ཟིན་པའི་གལ་ཆེའི་ལས་གཞི་འགའ་དབུ་འབྱེད་དང་། སྒྲུབ་བཞིན་པའི་ལས་གཞི་ཁག་ལ་གཟིགས་ཞིབ་ཏུ་ཕེབས་ཡོད་སོགས་གསུངས།
བཀའ་བློན་མཆོག་གིས་མི་མང་ལ་མཐའ་མའི་གསུང་བཤད་གནང་བའི་ནང་ཁོང་རང་ཉིད་གཞིས་ཆགས་དེ་ནས་ཡིན་སྟབས་འཚོར་བ་དམིགས་བསལ་ཞིག་ཡོད་སྐོར་དང་། གཞིས་ཆགས་ཡར་རྒྱས་ཕྱིན་པ་དང་། ས་གནས་འགོ་འཛིན་གྱི་སྣེ་འཁྲིད་དང་། མི་མང་དང་གཞུང་འབྲེལ་མིན་པའི་ཚོགས་པ་ཁག་གིས་རྒྱབ་སྐྱོར་འོག་གཞིས་ཆགས་ཡར་རྒྱས་བཏང་བར་བསྔགས་བརྗོད་གནང་ཡོད། 
དེ་བཞིན་བཀའ་བློན་མཆོག་གིས་དཀའ་ཚེགས་ཆེ་བའི་ཏོག་དབྱིབས་གཉན་རིམས་ཀྱི་དུས་སྐབས་ཁྲོད་འཛམ་གླིང་རྒྱལ་ཁབ་རྣམས་མཉམ་རུབ་ཀྱིས་ཏོག་དབྱིབས་གཉན་རིམ་དེ་བཞིན་རྒྱག་ནག་ནས་ཁྱབ་གདལ་བྱུང་བར་སྐྱོན་བརྗོད་དང་། རྒྱ་ནག་གཞུང་གི་རྒྱ་སྐྱེད་རིང་ལུགས་ཀྱི་ཐབས་ཇུས་ལ་ཁ་གཏད་གཅོག་བཞིན་པའི་སྐབས་བོད་མི་རྣམས་ཀྱིས་དེ་སྔ་ལས་ལྷག་ང་ཚོའི་འཐབ་རྩོད་ནང་རྡོག་རྩ་གཅིག་སྒྲིལ་བྱས་ཏེ་རང་དབང་གི་ཆེད་དུ་འཐབ་རྩོད་བྱེད་དགོས་ཞེས་གསུངས།
མཐར་དོན་ལྡན་གླིང་བོད་མིའི་གཞིས་ཆགས་ནས་བཀའ་བློན་མཆོག་ལ་ཐུགས་རྗེ་ལེགས་གསོལ་ཆེད་སྒྲོལ་མའི་སྐུ་བརྙན་ཞིག་འབུལ་ཡོད་པ་དང་། ས་གནས་མཉམ་འབྲེལ་ནས་སྟོན་པའི་སྐུ་ཐང་ཞིག་ཕྱག་རྟགས་སུ་འབུལ་ཡོད།
ཕྱིན་ཉིན་དེར་བཀའ་བློན་མཆོག་སྔ་འགྱུར་སྟག་ཤམ་ཨོ་རྒྱན་བསམ་གཏན་ཆོས་གླིང་དགོན་པས་འགན་འཁུར་ཐོག་ཀོ་ལེ་གྷལ་དོན་ལྡན་གླིང་བོད་མིའི་གཞིས་ཆགས་སུ་སྟོན་པ་ཤཱཀྱ་ཐུབ་པའི་སྐུ་བརྙན་མཐོ་ཚད་ཕི་ཊི་ ༡༡༣ ཅན་གསར་བཞེངས་གནང་རྒྱུའི་ས་ཁུལ་དུ་གཟིགས་སྐོར་དང་འབྲེལ། སྟག་ཤམ་དགོན་གྱི་མཁན་པོ་དང་ལྷན་སྟོན་པའི་སྐུ་བརྙན་གསར་བཞེངས་དང་འབྲེལ་བའི་ཐོག་བཀའ་བསྡུར་གནང་ཡོད།
དེ་རྗེས་བཀའ་བློན་མཆོག་ས་གནས་ཀྱི་དྲིམ་ཞིམ་བྱུག་སྣུམ་བཟོ་ཆེད་ཀྱི་རྩྭ་འདེབས་འཛུགས་ (Vetiver plantation) བྱེད་སར་གཟིགས་སྐོར་ཕེབས་ཕེབས་ཡོད། ལས་གཞི་དེའི་སྔོན་འགྲོའི་ལས་འཆར་ནང་ཞིང་པ་དུད་ཁྱིམ་གྲངས་ ༣༦ གིས་ས་ཞིང་རྒྱ་ཁྱོན་ཨེག་ཀར་ ༡༠༨།༨༠ སྟེང་ལས་འཆར་དེ་སྤེལ་རྒྱུའི་གྲོས་མཐུན་ཞིག་རྒྱ་གར་གྱི་བཟོ་གྲྭ་ཞིག་དང་ལྷན་ཕྱི་ལོ་ ༢༠༢༠ ཟླ་ ༩ ཚེས་ ༢༦ ཉིན་བཞག་ཡོད། །
