༄༅། །ཕྱི་ལོ་ ༢༠༢༡ ཟླ་ ༤ ཚེས་ ༥ ཉིན་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་ལ་དྭགས་སུ་ཕེབས་འབྱོར་སྐབས་ལ་སྤྱི་ཚེ་བརྟན་དབང་ཕྱུག་ལགས་དང་། བོད་མི་མང་ཕྱོགས་བཞུགས་སྤྱི་འཐུས་དོན་གྲུབ་བཀྲ་ཤིས་ལགས། དེ་བཞིན་ས་གནས་ཀྱི་ལས་ཀྱི་སྣེ་མོ་བ་རྣམས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།

སྐབས་དེར་བཀའ་བློན་མཆོག་གིས་ལ་བྱང་མ་ཁྱུ་དང་ཆུ་ཤུལ་ཁུལ་དུ་གནས་སྡོད་མི་མང་ཆེད་བསོད་ནམས་གླིང་ཨག་གླིང་དུ་ས་ཆ་གནང་སོན་བྱུང་བ་དེ་ཉིད་དབུ་འབྱེད་དང་གསུང་བཤད་གནང་ཡོད།དེ་ཉིན་ལ་སྤྱི་ལས་ཁུངས་ནས་བཀའ་བློན་མཆོག་ལ་ཆེ་བསྟོད་ཀྱི་དགོང་ཚིགས་གསོལ་སྟོན་རྒྱས་པ་ཞིག་གོ་སྒྲིག་ཞུས་ཡོད་པ་དང་། སྐབས་དེར་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་དེད་དཔོན་སྐུ་ཞབས་བཀྲ་ཤིས་རྒྱལ་སོན་ལགས་དང་། དེད་དཔོན་གཞོན་པ་སྐུ་ཞབས་ཚེ་རིང་དབང་ཕྱུག་ལགས། རྒྱ་གར་གྲོས་ཚོགས་འཐུས་མི་འཇམ་དབྱངས་ཚེ་རིང་རྣམ་རྒྱལ་ལགས། དེ་བཞིན་འབྲེལ་ཡོད་ལས་བྱེད་སོགས་ཆེད་ཕེབས་གནང་ཡོད།

ཕྱི་ཚེས་ ༦ ཉིན་བཀའ་བློན་མཆོག་གིས་ལ་སྤྱི་ལས་ཁུངས་གསར་རྒྱག་གི་ལས་གཞི་ལེགས་གྲུབ་ཟིན་པ་དེ་ཉིད་དབུ་འབྱེད་དང་འབྲེལ་ས་གནས་ཀྱི་གཞུང་དང་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་རྣམས་ལ་གགསུང་བཤད་གནང་གྲུབ་མཚམས་ (Tibetan Taxi Association) ནས་གོ་སྒྲིག་ཞུས་པའི་མཛད་སྒོར་དམིགས་བསལ་སྐུ་མགྲོན་དུ་གདན་ཞུ་ལྟར་ཆེད་ཕེབས་གནང་ཡོད། སྐབས་དེར་སྐུ་མགྲོན་གཙོ་བོར་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་དེད་དཔོན་མཆོག་དང་། ཆེ་བསྟོད་སྐུ་མགྲོན་དུ་ (All Ladakh Transport Association) ཚོགས་གཙོ་རྡོ་རྗེ་དབང་ཕྱུག་ལགས་ཕེབས་ཡོད། སྐབས་དེར་ལ་སྤྱི་ཚེ་བརྟན་དབང་ཕྱུག་ལགས་ཀྱིས་བོད་མི་གླ་འཁོར་གཏོང་མཁན་རྣམས་ལ་འཕྲད་བཞིན་པའི་དཀའ་ངལ་ཁག་དང་། ས་གནས་སུ་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༤ གཏན་འབེབས་ཡོང་བའི་སྙན་སེང་ཞུས་པར་རྡོ་རྗེ་དབང་ཕྱུག་ལགས་ཀྱིས་བོད་མི་གླ་འཁོར་གཏོང་མཁན་རྣམས་ལ་འཕྲད་བཞིན་པའི་དངོས་ཡོད་དཀའ་ངལ་ཁག་གོ་བསྡུར་གནང་སྟེ་སེལ་རྒྱུའི་ཁས་ལེན་གནང་ཡོད་པ་མ་ཟད། ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་དེད་དཔོན་མཆོག་གིས་ཀྱང་བོད་མིའི་དངོས་ཡོད་དཀའ་ངལ་ཁག་གོང་རིམ་ལ་སྙན་སེང་ཞུས་ཏེ་གང་མགྱོགས་སེལ་རྒྱུའི་ཐབས་ཤེས་གང་ཡོང་གནང་རྒྱུའི་ཁས་ལེན་གནང་ཡོད། སྐབས་དེར་ནང་སྲིད་བཀའ་བློན་མཆོག་གིས་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ནས་ད་བར་ལ་དྭགས་ཁུལ་གྱི་བོད་མི་རྣམས་ལ་བློ་རྒྱ་ཡངས་པོའི་ཐོག་ནས་མཐུན་འགྱུར་རོགས་རམ་རྒྱ་ཆེ་གནང་དང་གནང་མུས་ལ་ཐུགས་རྗེ་ཆེ་ཞུས་པ་སྦྲགས་ཡི་རངས་བསྔགས་བརྗོད་ཀྱང་གནང་ཡོད།

གཞན་ཡང་ལ་སྤྱི་ལས་ཁུངས་ཀྱིས་གོ་སྒྲིག་གནང་ཐོག་བཀའ་བློན་མཆོག་གིས་ལ་དྭགས་བསོད་ནམས་གླིང་ཁུལ་གྱི་བོད་མི་རྣམས་ལ་གསུང་བཤད་གནང་ཡོད། སྐབས་དེར་ལ་སྤྱི་ཚེ་བརྟན་དབང་ཕྱུག་ལགས་ཀྱི་ལ་དྭགས་ཁུལ་གྱི་བོད་མི་ཡོངས་ཀྱི་ཚབ་ཞུས་ཏེ་བཀའ་བློན་མཆོག་ལ་ཐུགས་རྗེ་ཆེ་ཞུའི་ཕྱགས་རྟགས་ཤིག་འབུལ་ལམ་ཞུས་ཡོད་པ་བཅས། །