༄༅། །ཕྱི་ལོ་ ༢༠༢༡ ཟླ་ ༤ ཚེས་ ༢༢ ཉིན་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་གིས་རྡ་སར་ཡོད་པའི་བྱམས་པ་གླིང་རྒས་གསོ་ཁང་གི་མདུན་ཐང་དུ་ས་ཕག་གསར་རྒྱག་དང་། རྒན་འཁོགས་རྣམས་ཀྱི་ཆེད་རྒས་གསོ་ཁང་ནས་གླིང་སྐོར་བར་ཕྱག་བཟུང་ཆེད་ཀྱི་ལྕགས་རི་གསར་བཟོ། དེ་བཞིན་རྒས་གསོ་ཁང་གི་མཐའ་མཚམས་སུ་ལྕགས་ཀྱི་རྭ་བསྐོར་བཅས་ཀྱི་ལས་གཞི་ལེགས་གྲུབ་བྱུང་པ་རྣམས་དབུ་འབྱེད་གནང་ཡོད།དེ་ཡང་དབུ་འབྱེད་མཛད་སྒོའི་ཐོག་ནང་སྲིད་བཀའ་བློན་མཆོག་གིས་གཙོས་ནང་སྲིད་དྲུང་ཆེ་དང་། དྲུང་འཕར། ཟུང་དྲུང་། རྒས་གསོ་ཁང་གི་འགན་འཛིན་དང་ལས་བྱེད་རྣམས་ཕེབས་ཡོད་པ་དང་། དབུ་འབྱེད་ཀྱི་མཛད་སྒོའི་ཐོག་ནང་སྲིད་དྲུང་ཆེ་ཤོ་ཟུར་ཚེ་དབང་སྒྲོལ་མ་ལགས་ཀྱིས་འཚམས་འདྲི་དང་འབྲེལ་གསུང་བཤད་གནང་དོན། ཐོག་མའི་འཆར་གཞི་ལྟར་ན་དབུ་འབྱེད་མཛད་སྒོའི་ཐོག་བཀའ་བློན་མཆོག་གིས་ལམ་སྟོན་གསུང་བཤད་དང་། ལས་གཞི་འདི་དང་འབྲེལ་བའི་ངོ་སྤྲོད་གནང་རྒྱུ་སོགས་ཀྱི་ལས་རིམ་མང་པོ་ཞིག་ཡོད་ཀྱང་དེ་རིང་གནམ་གཤིས་ཀྱིས་རྐྱེན་དང་། ལྷག་པར་ཏོག་དབྱིབས་གཉན་རིམ་ཁྱབ་གདལ་འགྲོ་བཞིན་པའི་དུས་སྐབས་འདིར་རྒས་འཁོགས་རྣམས་ལ་སྐུ་ངལ་མི་ཡོང་བའི་ཆེད་དེ་རིང་དབུ་འབྱེད་མཛད་སྒོ་སྟབས་བདེ་ཞིག་ཚོགས་ཡོད། འདི་ལོ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་རྗེས་དྲན་གྱི་ལོར་འཁེལ་གྱི་ཡོད་པ་དང་། ༸གོང་ས་མཆོག་གིས་དུས་རྒྱུན་དུ་རྒན་རབས་རྣམས་ལ་ཐུགས་བརྩེ་བ་ཆེན་པོས་ཞབས་འདེགས་ཞུ་དགོས་པའི་བཀའ་སློབ་ལམ་སྟོན་ཡང་ཡང་ཕེབས་ཀྱི་ཡོད་སྟབས། བཀའ་བློན་མཆོག་གིས་རྒས་གསོ་ཁང་གི་གནས་སྟངས་ཡར་རྒྱས་གཏོང་ཆེད་ས་ཕྱོགས་གང་སར་ཕེབས་ཏེ་སྐུ་ངལ་འཛེམས་མེད་ཀྱིས་རོགས་དངུལ་མཁོ་སྒྲུབ་ཞུས་ཡོད། ཅེས་དང་། དེ་བཞིན་ད་ལན་དབུ་འབྱེད་མཛད་སྒོའི་ཐོག་རྒས་གསོ་ཁང་གི་མདུན་ཐང་དུ་ས་ཕག་གསར་རྒྱག་གི་ལས་གཞི་དང་། རྒན་འཁོགས་རྣམས་ཀྱི་ཆེད་རྒས་གསོ་ཁང་ནས་གླིང་སྐོར་བར་ཕྱག་བཟུང་ཆེད་ཀྱི་ལྕགས་རིང་གསར་བཟོའི་ལས་གཞི། དེ་བཞིན་མི་གང་བྱུང་དང་དོམ་ལྟ་བུའི་སེམས་ཅན་སོགས་རྒས་གསོ་ཁང་ནང་དུ་མི་ཡོང་བའི་ཆེད་རྒས་གསོ་ཁང་གི་མཐའ་མཚམས་སུ་ལྕགས་ཀྱི་རྭ་བས་བསྐོར་བའི་ལས་གཞི་བཅས་ཁྱོན་ལས་གཞི་གསུམ་སྟབས་གཅིག་ལ་དབུ་འབྱེད་གནང་གི་ཡོད་སྐོར་དང་། ལས་གཞི་འདི་དག་ཕ་རན་སི་རོགས་ཚོགས་ (Aide AL’Enfance Tibet (AET) དང་། ལོན་ཌོན་བོད་ཀྱི་ཐེབས་རྩ་གཉིས་ནས་མཐུན་འགྱུར་རོགས་དངུལ་གནང་བ་ཞིག་ཡིན་ཞེས་གསུངས་ཏེ་ཚང་མར་ཐུགས་རྗེ་ཆེ་ཞུས་ཡོད། མཛད་སྒོ་གྲུབ་རྗེས་ནང་བཀའ་བློན་མཆོག་གིས་གཙོས་འབྲེལ་ཡོད་ལས་བྱེད་རྣམས་རྒས་གསོ་ཁང་གི་གཡས་ཡོན་དུ་གཟིགས་སྐོར་ཕེབས་ཡོད་པ་བཅས། །