༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཕྱི་ལོ་ ༢༠༢༡ ཟླ་ ༤ ཚེས་ ༢༥ ཉིན་བརྙན་ཐུང་བརྒྱུད་ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༣༢ ལ་ཕེབས་པའི་འཁྲུངས་སྐར་ཉིན་མོར་འཚམས་འདྲིའི་བཀྲ་ཤིས་བདེ་ལེགས་ཞུས་ཡོད།
དེ་ཡང་དཔལ་ལྡན་སྲིད་སྐྱོང་མཆོག་གིས་ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གི་འཁྲུངས་སྐར་ལ་འཚམས་འདྲི་ཞུས་པའི་ནང་འཁོད་དོན། འཛམ་གླིང་གི་ཕྱོགས་གང་སར་གནས་པའི་བོད་རིགས་སྤུན་ཟླ་ཡོངས་ཀྱི་ཚབ་ཞུས་ཏེ་ངས་ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་ལ་༧སྐུའི་འཁྲུངས་སྐར་ཉིན་མོར་ཧ་ཅང་ཐུགས་སེམས་སྤྲོ་པོ་ཡོང་བའི་སྨོན་འདུན་ཞུ་རྒྱུ་ཡིན།
སྤྱིར་མི་ཞིག་གི་སྐྱེས་སྐར་ཉིན་མོར་ཕ་མ་དང་། གཉེན་ཉེ་དུ། གྲོགས་པོ་གྲོགས་མོ། དེ་བཞིན་གྲོང་པ་ཁྱིམ་མཚེས་སོགས་ལྷན་དུ་འཛོམས་ནས་དགའ་དགའ་སྤྲོ་སྤྲོའི་ངང་ནས་བཀྲ་ཤིས་པའི་རྟེན་འབྲེལ་ཞུ་གནང་གི་ཡོད། འོན་ཀྱང་སེམས་ཧ་ཅང་སྐྱོ་དགོས་པ་ཞིག་ལ་ལོ་ངོ་ཉེར་དྲུག་གི་རིང་ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་ལ་རྒྱ་ནག་གཞུང་གིས་འདི་ལྟ་བུའི་འགྲོ་བ་མིའི་གཞི་རྩའི་ཐོབ་ཐང་ཞིག་ཀྱང་སྤྲད་མེད། འཛམ་གླིང་གང་སར་གནས་པའི་བོད་མི་ཡོངས་དང་། ལྷག་པར་བོད་རིགས་སྤུན་ཟླ་ས་ཡ་དྲུག་གིས་ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་ལ་ཧ་ཅང་དད་གུས་དང་ཆོས་ཕྱོགས་ཀྱི་བླ་ཆེན་ཞིག་ཡིན་པ་ངོས་འཛིན་ཞུ་གི་ཡོད།
གཞིས་བྱེས་བོད་མི་ས་ཡ་དྲུག་གིས་ཀུན་གཟིགས་༧པཎ་ཆེན་རིན་པོ་ཆེ་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དང་ལྷན་༧སྐུའི་འཁྲུངས་སྐར་དང་མཇལ་ཁ་ཞུ་འདོད་ཀྱི་འདུན་པ་ཤིན་ཏུ་ཆེན་པོ་ཡོད་ནའང་གཞིས་བྱེས་བོད་མི་ཡོངས་ལ་ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དང་ལྷན་༧སྐུའི་འཁྲུངས་སྐར་སྲུང་བརྩི་དང་། མཇའ་ཁ། གསུང་ཆོས་ཞུ་རྒྱུའི་གཞི་རྩའི་ཐོབ་ཐང་ཡང་མེད།
རྒྱ་གཞུང་གིས་ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་བཙན་འཕྲོག་བྱས་ནས་གར་སོང་ཆ་མེད་དུ་གྱུར་ཡོད་པས། དེ་ནི་འགྲོ་བ་མིའི་གཞི་རྩའི་ཐོབ་ཐང་དང་འགལ་ཡོད། ངས་མཉམ་འབྲེལ་རྒྱལ་ཚོགས་དང་། འགྲོ་བ་མིིའི་ཐོབ་ཐང་གི་གནས་ཚུལ་སྙན་སྒྲོན་པ། འཛམ་གླིང་གི་གསར་འགོད་པ་བཅས་ལ་ཁྱེད་རྣམ་པ་བོད་དུ་ཕེབས་ནས་རྒྱ་གཞུང་ལ་ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་མགྱོགས་མྱུར་གློད་བཀྲོལ་གཏོང་དགོས་པའི་འབོད་སྐུལ་གནང་དགོས་པ་དང་། དེ་བཞིན་ཀུན་གཟིགས་༧པཎ་ཆེན་རིན་པོ་མཆོག་གི་སྐོར་གནས་ཚུལ་ཞིབ་ཕྲ་འགོད་དགོས་པའི་རེ་སྐུལ་ཞུ་རྒྱུ་ཡིན།
དེ་ལྟར་བྱུང་ན་ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གིས་འགྲོ་བ་མི་སྤྱི་མཚུངས་ལྟར་གཞི་རྩའི་འགྲོ་བ་མིིའི་ཐོབ་ཐང་ལོངས་སུ་སྤྱོད་ཐུབ་ཀྱི་རེད། ཇི་སྲིད་རྒྱ་གཞུང་གིས་ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་ལ་ཐོབ་ཁུངས་ཆོས་ཕྱོགས་ཀྱི་དབུ་ཁྲིད་དང་འགན་ཉམས་སུ་བཞེས་མ་འཇུག་པ་དང་། གློད་བཀྲོལ་མ་གཏང་བར་དུ་ང་ཚོས་མུ་མཐུད་འཐབ་རྩོད་བྱེད་ངེས་ཡིན། ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གི་ནང་མི་ལྷན་རྒྱས་ལ་གདུང་སེམས་མཉམ་སྐྱེ་ཞུ་རྒྱུ་ཡིན། ཞེས་གསུངས།།
