༄༅། །ཕྱི་ལོ་ ༢༠༢༡ ཟླ་ ༤ ཚེས་ ༢༡ རེས་གཟའ་མིག་དམར་ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ཨ་རིའི་གཞུང་གསར་པའི་གནད་ཡོད་མི་སྣ་ཁག་གཅིག་དང་མཇལ་འཕྲད་སླད་ཨ་རིའི་རྒྱལ་ས་ཝ་ཤིན་ཊོན་དུ་ཕེབས་འབྱོར་བྱུང་ཡོད།
དེ་ཡང་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་བོད་མིའི་སྒྲིག་འཛུགས་ནང་ལོ་བཅུ་ལྷག་ཞབས་འདེགས་ཞུས་པའི་རིང་ཨ་རིའི་བོད་ཀྱི་སྲིད་བྱུས་ཐད་བཟང་ཕྱོགས་ཀྱི་འགྱུར་བ་ཆེན་པོ་བཏང་གནང་ཡོད།
རེས་གཟའ་མིག་དམར་ཉིན་གྱི་དགོང་དྲོར་ཨ་རིའི་བོད་ཀྱི་སྐུ་ཚབ་དོན་གཅོད་ཁང་ནས་དཔལ་ལྡན་སྲིད་སྐྱོང་མཆོག་ལ་དགའ་སྐྱེལ་གྱི་དགོང་དྲོའི་གསོལ་སྟོན་ཞིག་གོ་སྒྲིག་ཞུས་ཡོད་པ་དང་། གསོལ་སྟོན་ཐོག་ཨ་རིའི་ཕྱི་སྲིད་ལས་ཁུངས་ཀྱི་མཐོ་རིམ་དཔོན་རིགས་དང་ལས་བྱེད། ཨ་རིའི་གྲོས་ཚོགས་ཀྱི་ལས་བྱེད་དང་། ཨ་རིའི་མི་འབོར་དང་། སྐྱབས་བཅོལ། གཞིས་སྤོ་བཅས་ཀྱི་ལས་དོན་ཚན་པ་དང་། ཨ་རིའི་ལྷོ་དབུས་ཨེ་ཤི་ཡ་ས་ཁུལ་གྱི་ལས་དོན་ཚན་པའི་འཐུས་མི་བཅས་ཕེབས་ཡོད།
དེ་ཡང་ཨ་རིའི་ཕྱི་སྲིད་ལས་ཁུངས་དང་ཨ་རིའི་རོགས་ཚོགས་ (USAID) ཀྱི་མཐོ་རིམ་དཔོན་རིགས་རྣམས་བྱང་ཨ་རིའི་བོད་ཀྱི་སྐུ་ཚབ་དོན་གཅོད་ཁང་དུ་འདུ་འཛོམས་གནང་བ་ཐེངས་དང་པོ་ཡིན། འདི་ལོར་ཏོག་དབྱིབས་གཉན་རིམ་ཀྱི་རྐྱེན་པས་འདུ་འཛོམས་ཀྱི་མི་གྲངས་ལ་ཚད་གཞི་ཡོད་མོད། གསོལ་སྟོན་ལ་ཕེབས་པ་རྣམས་ཀྱིས་སྤྲོ་སྣང་ལྡན་པའི་ཐོག་ཕན་ཚུན་བསམ་ཚུལ་བརྗེ་ལེན་ངང་བོད་ཟས་ལ་རོལ་ཡོད།
བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་སྐུ་མགྲོན་རྣམས་ལ་འཚམས་འདྲི་ཞུས་པ་དང་འབྲེལ་དཔལ་ལྡན་སྲིད་མཆོག་གིས་ད་བར་བོད་དོན་དང་བོད་མིའི་ཆེད་སྐུལ་ངལ་འཛེམས་མེད་ཀྱིས་ཞབས་འདེགས་ཞུས་པར་ཐུགས་རྗེ་ཞུས་ཡོད་པ་མ་ཟད། ཨ་རིའི་ཕྱི་སྲིད་ལས་ཁུངས་ཀྱི་མཐོ་རིམ་དཔོན་རིགས་རྣམས་དང་། ཨ་རིའི་རོགས་ཚོགས་ཀྱི་དཔོན་རིགས་རྣམས་ལ་ཐེངས་དང་པོ་སྣེ་ལེན་ཞུ་རྒྱུ་བྱུང་བར་དགའ་ཚོར་ཆེན་པོ་བྱུང་ཞེས་དང་། ཁོང་རྣམ་པ་སྐུ་ཚབ་དོན་གཅོད་ཁང་དུ་ཕེབས་པ་དེས་བོད་ཀྱི་གནད་དོན་ལ་ཡིད་ཆེས་གནང་གི་ཡོད་པ་དང་། སྐུ་ཚབ་དོན་གཅོད་ཁང་ལ་ཆེ་མཐོང་གནང་ཡོད་ཅེས་གསུངས།
གཞན་ཡང་ཨ་རིའི་མཐོ་རིམ་དཔོན་རིགས་འགའ་ཞིག་གིས་དཔལ་ལྡན་སྲིད་སྐྱོང་མཆོག་གིས་བོད་མིར་ཞབས་འདེགས་ཞུས་གནང་བར་ཐུགས་རྗེ་ཆེ་ཞུས་ཡོད་པ་དང་། དེ་བཞིན་མང་པོ་ཞིག་གིས་དཔལ་ལྡན་སྲིད་སྐྱོང་མཆོག་གི་འབྲེལ་བ་དམ་ཟབ་ལ་བསྔགས་བརྗོད་གནང་ཡོད་པ་མ་ཟད། ལྷག་པར་དཔལ་ལྡན་སྲིད་སྐྱོང་མཆོག་གིས་ཨ་རིའི་གཞུང་ནང་བོད་ཀྱི་གནད་དོན་གལ་གནད་དུ་འཛིན་དགོས་པའི་ཐད་ཤུགས་རྐྱེན་ཐེབས་བཅུག་པར་བསྔགས་བརྗོད་གནང་ཡོད།
དེ་བཞིན་རེས་གཟའ་ལྷག་པའི་སྔ་དྲོར་དཔལ་ལྡན་སྲིད་སྐྱོང་མཆོག་དང་། སྐུ་ཚབ་དོན་གཅོད་དངོས་གྲུབ་ཚེ་རིང་ལགས་རྣམ་གཉིས་ནས་ (Acting A/S Nancy Jackson, Acting PDAS Richard Albright, Acting A/S Thompson) བཅས་དང་ལྷན་དྲ་ལམ་བརྒྱུད་ཚོགས་འདུ་ཞིག་ཚོགས་གནང་ཡོད། ཨ་རིའི་སྲིད་འཛིན་བྷཡེ་ཌན་མཆོག་གི་སྲིད་གཞུང་གིས་རྩ་འཛིན་ལམ་སྟོན་ལྟར་ཕྱི་མི་ཐུག་འཕྲད་ཚང་མ་དྲ་ལམ་བརྒྱུད་ཚོགས་དགོས་ཀྱི་ཡོད་པ་བཅས། །
