༄༅། །ཕྱི་ལོ་ ༢༠༢༡ ཟླ་ ༤ ཚེས་ ༩ རེས་གཟའ་པ་སངས་ཉིན་ཨིན་ཡུལ་གྱི་རྒྱལ་མོ་ཨེ་ལི་ཛེ་བྷེ་ཐི་ (Queen Elizabeth) མཆོག་གི་སྐུ་ཟླ་ཕི་རན་སི་ཕི་ལི་ཕི་ (Prince Philip, Duke of Edinburgh) མཆོག་དགུང་ལོ་ ༩༩ ཐོག་སྐུ་ཚེའི་འཕེན་པ་རྫོགས་པའི་གསལ་བསྒྲགས་ཐོན་ཡོད་པ་དང་། དེ་རིང་སྟེ་ཕྱི་ལོ་ ༢༠༢༡ ཟླ་ ༤ ཚེས་ ༡༣ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཨིན་ཡུལ་གྱི་རྒྱལ་མོ་ཨེ་ལི་ཛེ་བྷེ་ཐི་མཆོག་གི་སྐུ་ཟླའི་ཤུལ་ལུས་ནང་མི་ལྟོས་བཅས་ཡོངས་ལ་ཐུགས་གསོ་གནང་བའི་ནང་འཁོད་དོན།

ཨིན་ཡུལ་གྱི་རྒྱལ་མོ་ཨེ་ལི་ཛེ་བྷེ་ཐི་མཆོག་གི་སྐུ་ཟླ་ཕི་རན་སི་ཕི་ལི་ཕི་མཆོག་སྐུ་ཚེ་མ་ཟིན་པའི་ཡིད་སྐྱོའི་གནས་ཚུལ་གོ་ཐོས་བྱུང་བས་ཧ་ཅང་བློ་ཕམ་བྱུང་། བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་ངས་རྒྱལ་མོ་ཨེ་ལི་ཛེ་བྷེ་ཐི་མཆོག་གི་སྐུ་ཟླའི་ཤུལ་ལུས་ནང་མི་ལྟོས་བཅས་ཡོངས་ལ་གདུང་སེམས་མཉམ་སྐྱེ་དང་ཐུགས་གསོ་ཞུ་རྒྱུ་ཡིན།

ཨིན་ཡུལ་གྱི་རྒྱལ་མོ་ཨེ་ལི་ཛེ་བྷེ་ཐི་མཆོག་གི་སྐུ་ཟླ་ཕི་རན་སི་ཕི་ལི་ཕི་མཆོག་གིས་ཁོར་ཡུག་དང་། ཚན་རིག འཕྲུལ་འཁོར་བཟོ་ལས། བསྐྱར་གསོ་རུང་བའི་ཐོན་ཁུངས་སོགས་ཀྱི་ཐོག་ཕྱག་ལས་གཞི་རྒྱ་ཆེ་བ་གནང་མྱོང་བ་མ་ཟད། ཉམ་ཐག་རྒྱལ་ཁབ་ཁག་གི་ནང་ཤེས་ཡོན་དང་། འཕྲོད་བསྟེན། འཐུང་ཆུ་སོགས་ཀྱི་ཆེད་དུ་ཕྱག་ལས་གནང་སྟེ་ཕྲུ་གུ་རྣམས་ཀྱི་མདུན་ལམ་སླད་དུ་གོ་སྐབས་བཟང་པོ་བསྐྲུན་གནང་ཡོད།

འཛམ་གླིང་མི་མང་གིས་ཕི་རན་སི་ཕི་ལི་ཕི་དམ་པ་དེ་ཉིད་ཀྱི་མཛད་རྗེས་དུས་རྟག་ཏུ་དྲན་ངེས་ཡིན། འདས་པོ་དམ་པ་དེ་ཉིད་ལ་ཐུགས་སྨོན་དང་། རྒྱལ་མོ་མཆོག་གི་སྐུ་ཟླའི་ཤུལ་ལུས་ནང་མི་ལྟོས་བཅས་ཡོངས་དང་ཨིན་ཡུལ་མི་མང་ལ་གདུང་སེམས་མཉམ་སྐྱེ་ཞུ་རྒྱུ་ཡིན། ཞེས་འཁོད་ཡོད།།