༄༅། །ཕྱི་ལོ་ ༢༠༢༡ ཟླ་ ༤ ཚེས་ ༨ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་རྟེན་གཞི་བྱས་པའི་འཇམ་མགོན་བླ་མ་ཙོང་ཁ་པ་ཆེན་པོའི་གདན་ས་འབྲོག་རི་བོ་ཆེ་དགའ་ལྡན་རྣམ་པར་རྒྱལ་པའི་གླིང་བླ་སྤྱིའི་འདུ་ཁང་དུ་ཕེབས་འབྱོར་སྐབས་ཤར་བྱང་གྲྭ་ཚང་གཉིས་དང་། རྙིང་མ་གྲྭ་ཚང་བཅས་ཀྱི་མཁན་སློབ་འདུས་མང་ཡོངས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།
དེ་ཡང་མཛད་སྒོའི་ཐོག་མར་དཔལ་ལྡན་སྲིད་སྐྱོང་མཆོག་གིས་༧རྒྱལ་བའི་སྐུ་པར་མཐོང་གྲོལ་རིན་པོ་ཆེར་མནྜལ་རྟེན་གསུམ་འདེགས་འབུལ་ཞུས་གྲུབ་མཚམས་དགའ་ལྡན་ཤར་རྩེའི་མཁན་རིན་པོ་ཆེ་དགེ་བཤེས་བྱང་ཆུབ་སངས་རྒྱས་མཆོག་གིས་ཕེབས་བསུ་དང་སྦྲགས་མཛད་རིམ་ངོ་སྤྲོད་ཀྱི་གསུང་བཤད་གནང་ཡོད།
དེ་ནས་དཔལ་ལྡན་སྲིད་སྐྱོང་མཆོག་གིས་གསུང་བཤད་གནང་དོན། དེ་རིང་དགའ་ལྡན་རྣམ་པར་རྒྱལ་པའི་གླིང་དུ་བཅར་རྒྱུ་བྱུང་བས་ཧ་ཅང་སྐལ་བ་བཟང་པོ་ཡིན་བསམ་གྱི་ཡོད། སྐྱབས་རྗེ་མཁན་རིན་པོ་ཆེ་མཆོག་གིས་བཀའ་ཤག་ནས་ལོ་བཅུའི་རིང་ཕྱག་ལས་གནང་བའི་སྐོར་ལ་བསྔགས་བརྗོད་དང་ཐུགས་སྨོན་གནང་བར་ཐུགས་རྗེ་ཆེ་ཞུ་རྒྱུ་ཡིན། དེ་བཞིན་སྐྱབས་རྗེ་མཁན་རིན་པོ་ཆེ་མཆོག་གིས་དབུས་སྐྱབས་གནས་དགེ་འདུན་གྱི་སྡེ། གྲྭ་ཚང་ཁག་གི་ཕྱག་མཛོད། ཁྲིམས་བདག་དགེ་བསྐོས། དབུ་མཛད་སོགས་རྣམ་པ་ཚང་མར་ངས་བཀའ་ཤག་གི་ཚབ་ཞུས་ཏེ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། ལྷོ་ཕྱོགས་གཞིས་ཆགས་ཁག་དང་ལྷག་པར་དགོན་སྡེ་ཁག་ལ་བཅར་དགོས་པའི་དམིགས་ཡུལ་གཙོ་བོ་ནི། གནས་མཇལ་གྱིས་མཚོན་རང་ཉིད་ཀྱི་འདོད་པ་ཡོད་པ་དེ་དག་འགྲུབ་ས་རེད་བསམ་ནས་བཅར་བ་ཡིན།
ངག་དབང་ཆོས་འཕེལ་ལགས་ཀྱིས་དགའ་ལྡན་དགོན་པའི་ལོ་རྒྱུས་སྐོར་གློག་བརྙན་ཡིད་སྐྱོ་བ་དང་སེམས་འགུལ་ཐེབས་པ་ཞིག་བཟོས་འདུག རྒྱ་ནག་གཞུང་གིས་བོད་ནང་དགོན་སྡེ་ཁག་གཏོར་བཤིག་བཏང་རྗེས། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་སྦག་སའི་དགེ་འདུན་པ་མི་ཐོག་རྒན་པ་རྣམ་པས་སྐུ་ལས་བསྐྱོན་པའི་བཀའ་དྲིན་ལ་བརྟེན་ནས་རྒྱ་གར་ནང་གདན་ས་ཁག་བསྐྱར་གསོ་གནང་ཐུབ་པ་བྱུང་ཡོད་པ་མ་ཟད། བོད་བརྒྱུད་ནང་བསྟན་འཛམ་གླིང་ཡོངས་ལ་དར་སྤེལ་གནང་ཐུབ་ཡོད། དེ་ལ་བརྟེན་ནས་ཕྱི་རྒྱལ་བོད་དོན་རྒྱབ་སྐྱོར་བ་མང་པོ་ཞིག་ནང་པ་ཆགས་ཡོད། ནང་པ་ཡིན་པའི་བོད་དོན་རྒྱབ་སྐྱོར་བ་རྣམས་ཧ་ཅང་བརྟན་པོ་འདུག སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་སྦག་སའི་དགེ་འདུན་པ་མི་ཐོག་རྒན་པས་སྐུ་ལས་བསྐྱོན་ཏེ་ཆོས་སྲིད་གཉིས་ཀའི་ཐོག་རླབས་ཆེན་གྱི་མཛད་རྗེས་བཞག་གནང་ཡོད།
དཔལ་འབྱོར་གྱི་ཐད་ནས་ཞུ་ན་གདན་ས་ཁག་ཚང་མ་རང་ཁ་རང་གསོ་གནང་ནས་འཚོ་བཞིན་ཡོད་སྟབས། བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ནས་དགོན་སྡེ་ཁག་ལ་འགྲོ་གྲོན་ཉུང་བ་གཏོང་གི་ཡོད། དེར་བརྟེན་བོད་མིའི་སྒྲིག་འཛུགས་ནས་ཤེས་རིག་དང་། འཕྲོད་བསྟེན། དགུང་ལོ་བགྲེས་པ། ཉམ་ཐག་སོགས་ལ་འགྲོ་གྲོན་མང་བ་གཏོང་ཐུབ་ཀྱི་ཡོད། དགོན་སྡེ་ཁག་རང་ཁ་རང་གསོ་བྱུང་བར་བརྟེན་བོད་མིའི་སྒྲིག་འཛུགས་ལ་ཕན་ཐོགས་ཆེན་པོ་བྱུང་ཡོད། ངས་བཀའ་ཤག་གི་ཚབ་ཞུས་ཏེ་དགའ་ལྡན་རྣམ་པར་རྒྱལ་པའི་གླིང་གི་མཁན་ལས་ཟུར་རྣམ་པ་དང་དགེ་འདུན་པ་ཡོངས་ལ་ཐུགས་རྗེ་ཆེ་ཞུ་རྒྱུ་ཡིན། ཞེས་དང་། 
ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་ལྔ་དང་ལྔ་བཅུའི་འཆར་སྣང་སྐོར་དང་འབྲེལ་ནས་གསུང་དོན། ལོ་རྒྱུས་ཀྱི་ཐོག་ནས་བོད་ནམ་ཡང་རྒྱ་ནག་གི་ཆ་ཤས་སུ་ཆགས་མྱོང་མེད་པ་དང་། བོད་མིའི་སྒྲིག་འཛུགས་ཀྱི་ངོས་ནས་དབུ་མའི་ལམ་གྱི་སྲིད་བྱུས་བརྒྱུད་བོད་མི་ཡོངས་ལ་མིང་དོན་མཚུངས་པའི་རང་སྐྱོང་ཐོབ་ཐབས་སུ་བོད་དོན་རྒྱབ་སྐྱོར་བ་གང་མང་འཚོལ་ཐབས་གནང་དང་གནང་བཞིན་ཡོད། ཨ་རིའི་གཞུང་གིས་ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་གཏན་འབེབས་གནང་ཡོད། དེའི་ནང་བོད་མིའི་བླ་ན་མེད་པའི་དབུ་འཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུའི་ཡང་སྲིད་ངོས་འཛིན་ཐག་གཅོད་བྱ་རྒྱུའི་འགན་དབང་ནི་མགོན་པོ་གང་ཉིད་མཆོག་དང་བོད་མིར་ཡོད་པ་ལས་རྒྱ་ནག་གཞུང་ལ་ཐེ་བྱུས་བྱ་དབང་མེད་སྐོར་དང་། དེ་བཞིན་དབུ་མའི་ལམ་གྱི་སྲིད་བྱུས་དང་། བོད་མཐོ་སྒང་གི་ཁོར་ཡུག་གི་གལ་ཆེན་རང་བཞིན། བོད་མིར་རོགས་དངུལ་བཀའ་འཁྲོལ་ཐོབ་ཡོད་པ་སོགས་བཀོད་ཡོད། ཉི་ཧོང་ནང་འཛམ་གླིང་གི་གྲོས་ཚོགས་བོད་དོན་རྒྱབ་སྐྱོར་བ་ཆེ་ཤོས་བཙུགས་ཡོད། ཅེས་སོགས་ཀྱི་སྐོར་གསུངས་ཡོད་པ་བཅས།། 
