༄༅། །ཕྱི་ལོ་ ༢༠༢༡ ཟླ་ ༤ ཚེས་ ༦ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་སྔ་འགྱུར་རྙིང་མའི་བཤད་གྲྭ་ཐེག་མཆོག་རྣམ་གྲོལ་བཤད་སྒྲུབ་དར་རྒྱས་གླིང་དུ་གནས་གཟིགས་དང་། གྲྭ་བཙུན་རྣམས་ལ་གསུང་བཤད་གནང་སྟེ་སྦེལ་ཀོབ་ལུགས་བདེ་གཉིས་ཀྱི་བོད་མིའི་གཞིས་ཆགས་སུ་གཞུང་འབྲེལ་ཐུགས་རྗེ་ཆེ་ཞུའི་འཚམས་གཟིགས་ལེགས་པར་གྲུབ་ཡོད།
དེ་ཡང་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་སྔ་འགྱུར་རྙིང་མའི་བཤད་གྲྭ་ཐེག་མཆོག་རྣམ་གྲོལ་བཤད་སྒྲུབ་དར་རྒྱས་གླིང་ཐོག་མར་གྲུབ་དབང་པདྨ་ནོར་བུ་སྐུ་ཕྲེང་གསུམ་པ་མཆོག་གིས་ཕྱག་བཏབ་གནང་བ་དང་། དགོན་པའི་ཤེས་ཡོན་སོགས་གང་ཅིའི་ཐད་ཡར་རྒྱས་ཧ་ཅང་ཆེན་པོ་ཕྱིན་པར་ཡི་རང་བསྔགས་བརྗོད་དང་འབྲེལ་རྣམ་གྲོལ་གླིང་དུ་ཕེབས་དགོས་དོན་གཙོ་བོ་ནི། སྐབས་ ༡༥ པའི་བཀའ་ཤག་གི་ལས་ཡུན་གཙང་ལ་ཉེ་བར་བརྟེན་ཐོན་མཇལ་སླད་རྒྱ་གར་ལྷོ་ཕྱོགས་ཁུལ་གྱི་བཙན་བྱོལ་བོད་མིའི་གཞིས་ཆགས་ཁག་ཏུ་གཞུང་འབྲེལ་ཕྱོགས་ཕེབས་གནང་བའི་ལས་རིམ་གྱི་ཆ་ཤས་ཞིག་ཡིན་སྐོར་དང་། འདས་པའི་ལོ་ངོ་བཅུའི་ནང་ལོ་རྒྱུས་རང་བཞིན་ལྡན་པའི་ཕྱི་ལོ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་ལ་ཨ་རི་གཞུས་གིས་ཁྲིམས་སུ་གཏན་འབེབས་གནང་བས་གཙོས་བོད་མིའི་སྒྲིག་འཛུགས་ཀྱི་ལས་ཁུངས་ཁག་གི་ལས་དོན་དང་རྒྱལ་སྤྱིའི་འབྲེལ་ལམ་སོགས་གང་ཅིའི་ཐད་གང་ལེགས་བྱུང་ཡོད་སྐོར།
དེ་བཞིན་དཔལ་ལྡན་སྲིད་སྐྱོང་མཆོག་གིས་ད་ལན་ཨ་རི་གཞུང་གིས་ཁྲིམས་སུ་གཏན་འབེབས་གནང་བའི་ནང་ཨ་རི་གཞུང་གིས་བོད་མིའི་སྒྲིག་འཛུགས་ལ་ངོས་འཛིན་དང་། བོད་མིའི་སྒྲིག་འཛུགས་ཀྱི་འགོ་ཁྲིད་སྲིད་སྐྱོང་མཆོག་ཡིན་པ་ངོས་འཛོན་གནང་ཡོད་པའི་གལ་ཆེའི་རང་བཞིན་ཐོག་གསུང་བཤད་གནང་བ་དང་འབྲེལ་ད་རེས་གཏམ་བཤད་གནང་མཁན་གྱི་སྲིད་སྐྱོང་ནི་བོད་མིས་ངོས་འཛིན་ཡོད་པའི་སྲིད་སྐྱོང་ཙམ་མ་ཡིན་པར་ཨ་རི་གཞུང་ནས་ཀྱང་ངོས་འཛིན་ཡོད་པའི་སྲིད་སྐྱོང་ཞིག་ཡིན་ཞེས་དང་། འདས་པའི་ལོ་ངོ་བཅུའི་ནང་བཙན་བྱོལ་བོད་མིའི་ཤེས་ཡོན་དང་། དཔལ་འབྱོར། ཆབ་སྲིད། འཕྲོད་བསྟེན་སོགས་ཀྱི་ཐད་དེ་སྔ་སྲིད་སྐྱོང་མཆོག་གིས་ཁས་ལེན་གནང་བ་ལས་ལྷག་གྲུབ་འབྲས་དངོས་སུ་ཐོན་ཡོད་སྐོར།
དེ་བཞིན་ཏོག་དབྱིབས་གཉན་རིམས་ཀྱི་ཛ་དྲག་དུས་སྐབས་སུ་ཏོག་དབྱིབས་གཉན་རིམས་སྔོན་འགོག་དང་འབྲེལ་བའི་ལས་དོན་ཇི་སྤེལ་དང་། ཁྱིམ་སྡོད་བཀའ་རྒྱའི་སྐབས་བཙན་བྱོལ་བོད་མི་ཉམ་ཐག་རྣམས་ལ་རོགས་རམ་གནང་ཕྱོགས་ཐད་བོད་མིའི་སྒྲིག་འཛུགས་ནས་ཡར་ཐོན་ཅན་གྱི་རྒྱལ་ཁབ་འགའ་ལས་ལྷག་གནང་ཐུབ་པ་བྱུང་ཡོད་སྐོར་དང་། གོ་ལ་ཧྲིལ་པོར་ཏོག་དབྱིབས་གཉན་རིམས་ཁྱབ་གདལ་འགྲོ་བཞིན་པའི་སྐབས་དང་། ལྷག་པར་ཧིན་བོད་ས་འཚམས་སུ་རྒྱ་དཀར་ནག་གཉིས་རྩོད་རྙོག་བྱུང་བའི་སྐབས་རྒྱ་གར་གྱི་བརྙན་འཕྲིན་ཁག་བརྒྱུད་བོད་དོན་ཁྱབ་བསྒྲགས་གནང་ཐུབ་པ་སོགས་དམིགས་བསལ་གོ་སྐབས་དམ་འཛིན་གནང་ཐུབ་ཡོད་སྐོར་སོགས་གསུངས་པ་མ་ཟད། དཔལ་ལྡན་སྲིད་སྐྱོང་མཆོག་གིས་སྤོབས་པ་ཆེན་པོའི་སྲིད་སྐྱོང་གི་ལས་ཡུན་རིང་ཕྱག་ལས་ཧུར་ཐག་གནང་ཡོད་ལ་མ་འོངས་པར་བོད་མིའི་སྒྲིག་འཛུགས་ཀྱི་སྲིད་སྐྱོང་སུ་ཕེབས་པ་ཡིན་ནའང་སྤོབས་སེམས་ཆེན་པོའི་ངང་རྩིས་སྤྲོད་ཞུ་རྒྱུ་ཡིན་ཞེས་གསུངས།
མཐར་རྣམ་གྲོལ་གླིང་འདུས་སྤྱིའི་ཚབ་གནང་སྟེ་རྣམ་གྲོལ་གླིང་གི་དབུ་འཛིན་མཆོག་སྤྲུལ་གྱང་ཁང་རིན་པོ་ཆེ་མཆོག་གིས་ཐུགས་རྗེ་ཆེ་ཞུའི་གཟེངས་བསྟོད་གསོལ་རས་བཅས་འབུལ་གནང་ཡོད། །
