ཕྱི་ལོ་ ༢༠༢༡ ཟླ་ ༤ ཚེས་ ༦ རེས་གཟའ་མིག་དམར། 
༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཕྱི་ལོ་ ༢༠༢༡ ཟླ་ ༤ ཚེས་ ༥ ཉིན་རྒྱ་གར་ལྷོ་ཕྱོགས་སྦེལ་ཀོབ་ལུགས་ཟུང་བསམ་གྲུབ་གླིང་བོད་མིའི་གཞིས་ཆགས་ཀྱི་མཉམ་འབྲེལ་ཚོགས་ཁང་ནང་སྦེལ་ཀོབ་ཁུལ་གྱི་བོད་པའི་སློབ་ཕྲུག་རྣམས་ལ་གསུང་བཤད་གནང་ཡོད།
དེ་ཡང་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ལུགས་བསམ་བོད་མིའི་མཉམ་འབྲེལ་ཚོགས་ཁང་ནང་ཕེབས་འབྱོར་སྐབས་སྦེལ་ཀོབ་ས་གནས་བོད་མི་སེར་སྐྱ་མི་མང་རྣམས་ནས་ཕེབས་བསུའི་སྣེ་ལེན་གཟབ་རྒྱས་ཞུས་གྲུབ་མཚམས་དཔལ་ལྡན་སྲིད་སྐྱོང་མཆོག་གིས་༧རྒྱལ་བའི་སྐུ་པར་མཐོང་གྲོལ་རིན་པོ་ཆེར་མཇལ་དར་ཕུལ་བ་དང་འབྲེལ་སྣང་གསལ་མར་མེ་ཞལ་ཕྱེ་གནང་ཡོད།
དེ་རྗེས་དཔལ་ལྡན་སྲིད་སྐྱོང་མཆོག་གིས་སློབ་ཕྲུག་རྣམས་ལ་གསུང་བཤད་གནང་དོན། ལྷོ་སྤྱི་དང་ལྷོ་སྤྱི་ཟུར་པ་རྣམ་པ། ས་གནས་འགོ་འཛིན་རྣམ་པ། དེ་བཞིན་སློབ་གྲྭ་ཁག་གི་འགན་འཛིན་དང་སློབ་སྤྱི། དགེ་རྒན། ལས་བྱེད། བརྩེ་བའི་སློབ་ཕྲུག་རྣམ་པ་བཅས་ལ་ངས་བཀའ་ཤག་གི་ཚབ་ཞུས་ཏེ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། ངའི་ལས་ཡུན་ལོ་བཅུ་གཙང་ལ་ཉེ་བའི་སྐབས་བཙན་བྱོལ་བོད་མིའི་གཞིས་ཆགས་ཁག་ཏུ་ཐུགས་རྗེ་ཆེ་ཞུ་ཆེད་སླེབས་པ་ཡིན། རྣམ་རྒྱུན་ང་ས་ཕྱོགས་གང་དུ་ཕྱིན་ཡང་སློབ་ཕྲུག་ཚོར་ཐུག་འདོད་ཡོད། དེར་བརྟེན་ཁྱེད་རང་ཚོར་ཐུག་ན་བསམ་བྱུང་། རྣམ་པ་ཚོར་ཐུག་ནས་ཧ་ཅང་དགའ་པོ་བྱུང་། ན་ནིང་ཕྱི་ཟླ་ ༡༡ དང་ ༡༢ ནང་ང་ཨ་རིར་སླེབས་པའི་སྐབས་ཨ་རིའི་ཕྱི་སྲིད་ལས་ཁུངས་དང་ཕོ་བྲང་དཀར་པོའི་ནང་ཕྱིའི་སྐུ་མགྲོན་ཡོང་ཆོག་གི་མི་འདུག འོན་ཀྱང་ཨ་རིའི་གཞུང་གིས་དམིགས་བསལ་གནང་ནས་ཨ་རིའི་ཕྱི་སྲིད་ལས་ཁུངས་དང་ཕོ་བྲང་དཀར་པོའི་ནང་ཡོང་བཅུག་ཡོད།
གཅིག་བྱས་ན་ཐུགས་རྗེ་ཆེ་ཞུའི་ལས་རིམ་འདི་ཚར་བ་དང་ཨ་རིར་འགྲོ་རྒྱུ་ཡིན། ཨ་རིའི་གཞུང་ནས་ཨ་རིའི་གཞུང་གི་ལས་ཁུངས་ཁག་གི་ནང་ཕྱིའི་སྐུ་མགྲོན་ཡོང་ཆོག་གི་མེད་པའི་བཀོད་ཁྱབ་བཏང་གནང་འདུག བོད་མིའི་སྒྲིག་འཛུགས་ཀྱི་སྲིད་སྐྱོང་ཡོང་གི་ཡོད་སྟབས་ཨ་རིའི་གཞུང་གིས་དམིགས་བསལ་གནང་ངེས་རེད། ལོ་བཅུའི་སྔོན་ལ་འཛམ་གླིང་གི་རྒྱབ་ཁབ་ཁག་གིས་བོད་མིའི་སྒྲིག་འཛུགས་ངོས་ལེན་གནང་གི་མེད། ཨ་རིའི་གྲོས་ཚོགས་གོང་འོག་གཉིས་ནས་ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་གཏན་འབེབས་གནང་བ་དེར་ཕྱི་ལོ་ ༢༠༢༠ ཟླ་ ༡༢ ཚེས་ ༢༧ ཉིན་ཨ་རིའི་སྲིད་འཛིན་སྐུ་ཞབས་ཌོ་ནལ་ཊམ་ (Donald Trump) མཆོག་གིས་མཚན་རྟགས་བཀོད་དེ་ཁྲིམས་སུ་གཏན་འབེབས་གནང་ཡོད།
ཁྲིམས་འཆར་དེའི་ནང་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་དང་བོད་མིའི་བླ་སྤྲུལ་ངོས་འཛིན་གྱི་འགན་དབང་མགོན་པོ་གང་ཉིད་མཆོག་དང་བོད་མིར་ཡོད་པ་ལས་རྒྱ་ནག་གཞུང་གིས་ཐེ་བྱུས་བྱ་མི་ཆོག་པ་བཀོད་ཡོད་པ་མ་ཟད། བོད་མིའི་སྒྲིག་འཛུགས་ཀྱི་ངོས་ནས་འཛམ་གླིང་གང་སར་གནས་པའི་བོད་མིའི་མངོན་འདོད་སྒྲུབ་བཞིན་པ་དང་། བོད་མིའི་སྒྲིག་འཛུགས་ཀྱི་འགོ་ཁྲིད་སྲིད་སྐྱོང་མཆོག་ཡིན་པ་ངོས་འཛིན་དང་། དེ་བཞིན་བོད་མཐོ་སྒང་གི་ཁོར་ཡུག་དང་ཆུའི་འབྱུང་ཁུངས་ལ་སྲུང་སྐྱོབ་གནང་རྒྱུ། གཞིས་བྱེས་བོད་མི་རྣམས་ལ་རོགས་དངུལ་བཀའ་འཁྲོལ་གནང་ཡོད། གཞན་ཡང་བོད་ཀྱི་རྒྱལ་ས་ལྷ་སར་ཨ་རིའི་གཞུང་ཚབ་ཁང་གི་ཡན་ལག་འཛུགས་དགོས་པ་སོགས་འཁོད་ཡོད། མ་འོངས་པར་ཁྱེད་རང་ཚོ་ཨ་རིའི་གཞུང་གིས་ངོས་ལེན་ཡོད་པའི་བོད་མིའི་སྒྲིག་འཛུགས་ཀྱི་སྲིད་སྐྱོང་གི་ཞབས་སྟེགས་ལ་ལང་དགོས་པ་མ་ཟད། སྤྱི་འཐུས་ལའང་ལང་དགོས། ཆབ་སྲིད་ཀྱི་གནས་བབ་ཐོག་ནས་ང་ཚོ་སྐྱབས་བཅོལ་བ་ཆགས་ཡོད་པ་དེ་བདེན་པ་རེད། འོན་ཀྱང་ཨ་རི་བ་དང་རྒྱ་གར་བ་སོགས་ཡིན་ནའང་རེད། ང་ཚོ་ཚང་མ་མི་ཡིན་པ་གཅིག་པ་རེད། མ་འོངས་པར་རྣམ་པ་ཚོས་བོད་དོན་སྐོར་གདེང་ཚོད་ལྡན་པའི་སྒོ་ནས་བཤད་དགོས་པ་དང་། བོད་དོན་སྐོར་བཤད་པར་རྣམ་པ་ཚོས་སློབ་སྦྱོང་ཧུར་བརྩོན་གནང་དགོས།
རྣམ་པ་ཚོས་མ་འོངས་པར་ཕྱི་རྒྱལ་མཐོ་སློབ་ཁག་གི་ནང་སློབ་འཇུག་ཆེད་སྙན་ཞུ་འབུལ་སྐབས་རང་ཉིད་མཐོ་སློབ་ནང་འཛུལ་ཞུགས་བྱ་དགོས་པའི་དམིགས་ཡུལ་ཁ་གསལ་འབྲི་དགོས་པ་མ་ཟད། མཐོ་སློབ་ནང་འཛུལ་ཞུགས་བྱས་མྱོང་མཁན་རྣམས་ལ་བཀའ་འདྲི་ཞུ་དགོས། དེ་བཞིན་ལུས་སེམས་གཉིས་ཀ་བདེ་ཐང་ཡིན་པའི་སྐོར་དང་། རང་ཉིད་འཛུལ་ཞུགས་བྱ་འདོད་པའི་མཐོ་སློབ་ཁང་གི་དགེ་རྒན་རྣམ་པས་དེབ་ག་རེ་བྲིས་ཡོད་པ་དང་། ཁོང་རྣམ་པའི་མཚན་སྙན་ཞུའི་ནང་འཁོད་ཐུབ་པ་བྱ་དགོས། ཞེས་སོགས་གསུངས།། 
