༄༅། །ཕྱི་ལོ་ ༢༠༢༡ ཟླ་ ༤ ཚེས་ ༥ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་སྦེལ་ཀོབ་བོད་མིའི་གཞིས་ཆགས་སུ་ཕེབས་འབྱོར་སྐབས་ས་གནས་ཀྱི་གཞུང་དང་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་དང་།  མི་མང་སོགས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།

དེ་ཡང་དཔལ་ལྡན་སྲིད་སྐྱོང་མཆོག་གིས་ཐོག་མར་བོད་ཁྱིམ་དང་སཾ་བྷོ་ཊའི་སློབ་ཕྲུག་རྣམས་ལ་གསུང་བཤད་གནང་རྗེས་ཉིན་རྒྱབ་དགོན་སྡེ་ཁག་ལ་གནས་གཟིགས་དང་ཕྱི་དྲོར་སེ་ར་བླ་སྤྱིའི་སྒོ་མཆོར་མདུན་དུ་སེ་རའི་དགེ་འདུན་པ་རྣམས་ལ་གསུང་བཤད་གནང་ཡོད། ལས་རིམ་གྱི་ཐོག་མར་སེར་བྱེས་མཁན་རིན་པོ་ཆེ་མཆོག་གིས་འཚམས་འདྲིའི་གསུང་བཤད་གནང་གྲུབ་མཚམས་དཔལ་ལྡན་སྲིད་སྐྱོང་མཆོག་གིས་འཚམས་འདྲི་དང་འབྲེལ་གསུང་བཤད་གནང་དོན། སྐབས་བཅོ་ལྔ་པའི་བཀའ་ཤག་གི་ལས་དུས་གཙང་ལ་ཉེ་བའི་སྐབས་འདིར་ཕྲན་རང་རྣམ་པ་ཚོ་ལ་ཐུགས་རྗེ་ཆེ་ཞུ་ཆེད་བཅར་བ་ཡིན། རྣམ་པ་ཚོས་ང་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། བོད་ཀྱི་རྩ་དོན་ཆེད་ཞབས་འདེགས་བསྒྲུབ་རྒྱུའི་གོ་སྐབས་གནང་བར་ཐུགས་རྗེ་ཆེ་ཞུ་རྒྱུ་ཡིན།རང་ངོས་ནས་འདས་པའི་ལོ་ངོ་བཅུའི་རིང་དཀའ་ལས་བརྒྱབ་པ་ཡིན། བོད་མི་སུ་འདྲ་ཞིག་ཡིན་རུང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཞབས་ཕྱི་ཞུ་འདོད་ཡོད། རྣམ་པ་ཚོས་ང་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཞབས་ཕྱི་ཞུ་རྒྱུའི་གོ་སྐབས་བཟང་པོ་གནང་བ་དེ་རྩ་ཆེན་པོ་བརྩིས་ཏེ་༸གོང་ས་མཆོག་གི་བཀའ་དགོངས་གཞིར་བཟུང་ཞབས་ཕྱི་ཞུ་རྒྱུར་ཉིན་མཚན་དུས་དྲུག་བསམ་བློ་བཏང་ནས་དཀའ་ལས་བརྒྱབ་སྟེ་ཞབས་ཕྱི་ཧུར་ཐག་ཞུས་ཡོད། ཅེས་དང་།དེ་བཞིན་དཔལ་ལྡན་སྲིད་སྐྱོང་མཆོག་གིས་ཕྱི་ལོ་ ༢༠༢༠ ལོའི་ཨ་རིའི་བོད་དོན་སྲིད་བྱུས་དང་རྒྱབ་སྐྱོར་ཀྱི་ཁྲིམས་ཇི་ལྟར་གཏན་འབེབས་བྱུང་ཚུལ་དང་། དེའི་ནང་དོན་སྙིང་བསྡུས། རྒྱ་གར་དང་། ཉི་ཧོང་། ཨོ་སི་ཀྲོ་ལི་ཡ། ཨ་རི་བཅས་རྒྱལ་ཁབ་བཞིའི་བདེ་སྲུང་འབྲེལ་མོལ་ (Quadrilateral Security Dialogue (Quad)) ཞེས་པའི་སྐོར་གསུངས་པ་མ་ཟད། བོད་ཀྱི་གསར་འགྱུར་ལས་ཁང་གསར་བཟོ་དང་། བོད་ཀྱི་འགྲེམས་སྟོན་ཁང་གསར་རྒྱག   གངས་སྐྱིད་ཁུལ་གྱི་ལས་ཁུངས་ཚང་མ་བོད་བཟོ་ལྟར་བཟོས་པ། དཔལ་འབྱོར་ལས་ཁུངས་ཀྱི་བུན་གཡར་ལས་གཞི་སོགས་ཀྱི་སྐོར་ཞིབ་ཕྲའི་འགྲེལ་བརྗོད་གནང་ཡོད་པ་བཅས། །