༄༅། །འདི་གའི་ཆེད་གཉེར་གསར་འགོད་པ་བསྟན་འཛིན་དབང་ཕྱུག་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༡ ཟླ་ ༤ ཚེས་ ༤ ཉིན་གྱི་སྔ་དྲོར་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ཧུན་སུར་རབ་རྒྱས་གླིང་བོད་མིའི་གཞིས་ཆགས་སུ་ཕེབས་ཐོན་མ་གནང་གོང་ཀོ་ལེ་གྷལ་སཾ་བྷོ་ཊ་སློབ་གྲྭའི་དགེ་ལས་སློབ་ཕྲུག་རྣམས་དང་ཐུགས་འཕྲད་ཀྱིས་ཆུ་ཚོད་གཅིག་ཙམ་རིང་གསུང་བཤད་དང་དྲི་བར་ལན་འདེབས་གནང་སོང་།
དེ་ཡང་དཔལ་ལྡན་སྲིད་སྐྱོང་མཆོག་སཾ་བྷོ་ཊ་སློབ་གྲྭར་ཕེབས་འབྱོར་སྐབས་སློབ་སྤྱིས་གཙོས་པའི་དགེ་ལས་སློབ་ཕྲུག་དང་ཕ་མ་བཅས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཏེ་མཛད་སྒོ་དབུ་འཛུགས་ཀྱི་ཐོག་མར་སློབ་གྲྭའི་སློབ་སྤྱི་བསྟན་འཛིན་ངག་སྒྲོན་ལགས་ཀྱིས་ལས་བསྡོམས་སྙིང་བསྡུས་ཤིག་སྒྲོགས་སྦྱང་གནང་གྲུབ་མཚམས་དཔལ་ལྡན་སྲིད་སྐྱོང་མཆོག་གིས་གསུང་བཤད་གནང་ཡོད།
སྐབས་དེར་དཔལ་ལྡན་སྲིད་སྐྱོང་མཆོག་གིས་གསུང་དོན། སློབ་ཕྲུག་ཅིག་གི་སློབ་སྦྱོང་ཡག་པོ་ཡོང་བར་ཆ་རྐྱེན་ལྔ་མེད་དུ་མེད་རུང་བ་ཡིན། དང་པོ་དེ་འཛིན་སྐྱོང་བཀའ་ཤག་གིས་ཤེས་ཡོན་དང་འབྲེལ་བའི་མཐུན་རྐྱེན་སྦྱོར་སྤྲོད་བྱེད་དགོས་པ་དང་། གཉིས་པ་མཐུན་རྐྱེན་དེ་དག་སློབ་གྲྭའི་སློབ་སྤྱི་གཙོས་པའི་དགེ་རྒན་རྣམས་ཀྱིས་ཕྲུ་གུར་ལོངས་སུ་སྤྱོད་ཐུབ་པ་བྱེད་དགོས། གསུམ་པ་དགེ་རྒན་གྱིས་སློབ་འཁྲིད་གནང་སྟངས། བཞི་པ་ཕྲུ་གུ་རང་ཉིད་ཀྱིས་འབད་བརྩོན་བྱེད་དགོས། ལྔ་པ་ཕ་མས་ཕྲུ་གུའི་ཤེས་ཡོན་ཐོག་འགན་འཁུར་གནང་དགོས་པ་བཅས་ཡིན་པས་ཆ་རྐྱེན་དེ་དག་འཛོམས་པ་ཡིན་ན་ཤེས་ཡོན་གྱི་གནས་སྟངས་ཡར་རྒྱས་ཡོང་ངེས་ཡིན། སྐབས་རེ་ཆ་རྐྱེན་ལྔ་པ་སྟེ་ཕ་མའི་འགན་འཁུར་ཐད་ཕྲན་བུའི་འཐུས་ཤོར་འགྲོ་ཡི་ཡོད་པའི་རྣམ་པ་ཞིག་འཐོན་བཞིན་འདུག་པས་དེ་རིང་སློབ་ཕྲུག་རྣམས་དང་མཉམ་དུ་ཕ་མ་ཚོའང་ཕེབས་རོགས་ཞུ་དགོས་བྱུང་ཞེས་དང་། ཕྲུ་གུ་ཚོས་ཕ་མར་མིག་དཔེ་ལྟ་རྒྱུ་དེ་རང་བཞིན་གྱི་འགྲོ་སྟངས་ཡིན་པས་ཕ་མ་རྣམས་ཀྱིས་དུས་རྒྱུན་དུ་ཀུན་སྤྱོད་ཡག་པོ་གནང་དགོས་པ་ནི་ཤིན་ཏུ་གལ་ཆེན་པོ་ཡིན། ཞེས་གསུངས། 
གཞན་ཡང་དཔལ་ལྡན་སྲིད་སྐྱོང་མཆོག་གིས་བཀའ་ཤག་སྐབས་གཉིས་ཀྱི་རིང་ཤེས་ཡོན་ནི་ལས་དོན་ཚང་མའི་ནང་ནས་གལ་ཆེ་ཤོས་བཟུང་ཡོད་པ་བཞིན་ཤེས་ཡོན་དང་འབྲེལ་བའི་ལས་འཆར་གང་མང་སྤེལ་ཐུབ་པ་བྱུང་ཡོད། སྤྱི་ཡོངས་ནས་ཤེས་ཡོན་གྱི་གནས་སྟངས་ཡར་རྒྱས་གང་ལ་གང་ཙམ་ཕྱིན་ཡོད་པ་དང་། ན་ནིང་ལོ་ནས་འཛིན་རིམ་བཅུ་པའི་སློབ་མ་ཚོས་ཡིག་རྒྱུགས་ཀྱི་བརྒྱ་ཆ་ ༩༥ བླངས་ཐུབ་མཁན་བྱུང་ཡོད། 
དགེ་རྒན་དང་ཕ་མ་རྣམས་ཀྱིས་ང་ཚོ་སྐྱབས་བཅོལ་བའི་གནས་བབ་དང་འབྲེལ་ནས་ཕྲུ་གུར་བསླབ་བྱ་སྐྱོན་སྐབས་ཕྲུ་གུའི་སེམས་ཁམས་སྐོར་དོ་སྣང་གནང་དགོས། ང་ཚོ་ཆབ་སྲིད་ཀྱི་གནས་སྟངས་ཐོག་ནས་སྐྱབས་བཅོལ་ཆགས་ཡོད་ནའང་གཞི་རྩིའི་ཐོག་ནས་མི་ཚང་མ་ལ་ནུས་པ་དང་འཇོན་ཐང་གཅིག་མཚུངས་ཡོད། སོ་སོས་དཀའ་ལས་རྒྱག་ཐུབ་ན་གནས་སྟངས་ཞན་པོ་ག་ཚོད་ཡོད་ནའང་གྲུབ་འབྲས་འཐོན་རྒྱུ་ཡིན་པ་ངེས་པ་རེད། ཅེས་སོགས་ཀྱི་གསུང་བཤད་གནང་སྟེ་སློབ་ཕྲུག་རྣམས་ཀྱི་དྲི་བར་ལན་འདེབས་གནང་ཡོད་པ་བཅས། །
