༄༅། །འདི་གའི་ཆེད་གཉེར་གསར་འགོད་པ་བསྟན་འཛིན་དབང་ཕྱུག་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༡ ཟླ་ ༠༤ ཚེས་ ༠༣ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་རྒྱ་གར་ལྷོ་ཕྱོགས་ཁུལ་གྱི་བོད་མིའི་གཞིས་ཆགས་ཁག་ཏུ་ཐུགས་རྗེ་ཆེ་ཞུའི་གཞུང་འབྲེལ་འཚམས་གཟིགས་ཀྱི་ཐོག་མར་ཀོ་ལེ་གྷལ་དོན་ལྡན་གླིང་བོད་མིའི་གཞིས་ཆགས་སུ་ཕེབས་གནང་བ་དང་ཆབས་ཅིག་ས་གནས་སུ་༸རྒྱལ་བའི་བཀའ་དྲིན་རྗེས་དྲན་གྱི་མཛད་སྒོར་མཉམ་ཞུགས་གནང་སོང་། 
དེ་ཡང་གོང་ཚེས་ཉིན་གྱི་ཕྱེད་ཡོལ་ཚོུད་ ༡༢།༣༠ ཙམ་ལ་དཔལ་ལྡན་སྲིད་སྐྱོང་མཆོག་དོན་ལྡན་གླིང་བོད་མིའི་གཞིས་ཆགས་སུ་ཕེབས་འབྱོར་སྐབས་ས་གནས་ཀྱི་གཞུང་དང་གཞུང་འབྲེལ་མིན་པའི་ལས་ཀྱི་སྣེ་མོ་བ་དང་། སེར་སྐྱ་མི་མང་ཡོངས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།
ཉིན་གུང་ཞལ་ལག་གྲུབ་རྗེས་ས་གནས་འགོ་འཛིན་ལས་ཁུངས་ནས་སྲུང་བརྩི་ཞུ་བཞིན་པའི་༸རྒྱལ་བའི་བཀའ་དྲིན་རྗེས་དྲན་གྱི་མཛད་སྒོར་མཉམ་ཞུགས་ཀྱིས་མང་ཚོགས་ལ་གསུང་བཤད་གནང་ཡོད། ལས་རིམ་གྱི་ཐོག་མར་ཀོ་ལེ་གྷལ་དོན་ལྡན་གླིང་བོད་མིའི་གཞིས་ཆགས་ཀྱི་ས་གནས་འགོ་འཛིན་དགེ་ལེགས་འབྱུང་གནས་ལགས་ཀྱིས་ལས་བསྡོམས་སྙིང་བསྡུས་ཤིག་སྒྲོགས་སྦྱང་དང་། ཉེ་ཆར་གྲུབ་ཟིན་པའི་ལས་འཆར་ཁག དེ་བཞིན་འགྲོ་མུས་ཡིན་པའི་ལས་འཆར་ཁག་ཅིག་གི་སྐོར་ངོ་སྤྲོད་གནང་གྲུབ་མཚམས་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་གསུང་བཤད་གནང་དོན། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༡༡༣ བར་བཞུགས་རྒྱུའི་ཞལ་བཞེས་ཐོབ་པ་ནི་སྐལ་པ་བཟང་པོ་ཞིག་ཡིན་པ་དང་། བླ་མའི་སྐུ་ཚེ་ཡུན་རིང་བརྟན་དང་མི་བརྟན་གཙོ་བོ་བླ་སློབ་ཀྱི་དམ་ཚིགས་གཙང་མ་ཡོད་མིན་ལ་རག་ལུས་ཡོད།
ས་གནས་ནས་༸རྒྱལ་བའི་བཀའ་དྲིན་རྗེས་དྲན་ཞུ་ཆེད་མཛད་སྒོ་གྲ་རྒྱས་པོ་བྱུང་འདུག་པ་མ་ཟད། ས་གནས་ནས་སྤྱི་མོས་ཐོག་གྲོས་ཆོད་བཞག་སྟེ་༸རྒྱལ་བ་དགྱེས་པའི་མཆོད་སྤྲིན་སླད་སྒྲོལ་དཀར་ཡིད་བཞིན་འཁོར་ལོའི་སྐུ་བརྙན་ ༡༡༣ དང་། དེ་བཞིན་སྤྱན་རས་གཟིགས་ཀྱི་སྐུ་བརྙན་གཅིག་བཅས་གསར་བཞེངས་གནང་བར་ངས་བཀའ་ཤག་གི་ཚབ་ཞུས་ཏེ་མི་མང་ཡོངས་ལ་ཡི་རང་བསྔགས་བརྗོད་ཡོད་ལ་དེ་ལུགས་༸རྒྱལ་བའི་གཟིམ་ཆུང་མཇལ་བཅར་ཞུ་སྐབས་སྙན་སེང་ཞུ་རྒྱུ་ཡིན་པས་ཐུགས་དགྱེས་ཚོར་ཆེན་པོ་བྱུང་བའི་རེ་བ་ཡོད། 
བཀའ་ཤག་སྐབས་གཉིས་ཀྱི་རིང་རྒྱ་གར་ལྷོ་ཕྱོགས་ཁུལ་གྱི་བོད་མིའི་གཞིས་ཆགས་ཁག་ལྔའི་ནང་འཛུགས་སྐྲུན་དང་འབྲེལ་བའི་ལས་གཞི་སྣ་མང་གྲུབ་ཐུབ་ཡོད་པ་དང་། སྐབས་སུ་བབ་པའི་ཀོ་ལེ་གྷལ་དང་འབྲེལ་ལྷོ་སྤྱི་ལས་ཁུངས་ཀྱིས་གཙོས་འབྲེལ་ཡོད་རྣམས་ནས་སྐུ་ངལ་རིམ་པར་བསྐྱོན་པའི་འབྲས་བུར་ཀར་ན་ཊ་ཀའི་མངའ་གཞུང་ནས་ལམ་བཟོའི་ལས་གཞིའི་ཆེད་རོགས་དངུལ་ཞིག་བཀའ་འཁྲོལ་ཐོབ་པ་བྱུང་ཡོད། ས་གནས་མང་ཚོགས་ཀྱི་འཕྲོད་བསྟེན་ཆེད་གཞིས་ཆགས་ཁག་གི་ནང་ (Open Gym) ཡོད་པའི་ཐོག་བཀའ་ཤག་གི་མ་དངུལ་ནས་འབུམ་ ༥༥ དང་རོགས་དངུལ་བཅས་ལ་བརྟེན་ནས་ཀོ་ལེ་གྷལ་དོན་ལྡན་གླིང་བོད་མིའི་གཞིས་ཆགས་ལའང་ (Indoor Gym) ཞིག་གསར་རྒྱག་ཞུ་ཐུབ་པ་བྱུང་ཡོད། དེ་བཞིན་མི་མང་ཚོགས་ཁང་གསར་རྒྱག་གི་ལས་གཞི་ཀྱང་འགྲོ་མུས་ཡིན་སྟབས། སྤྱི་ཡོངས་ནས་ཡར་རྒྱས་གང་ལ་གང་ཙམ་ཕྱིན་ཡོད། ཅེས་དང་། 
གཞན་ཡང་དཔལ་ལྡན་སྲིད་སྐྱོང་མཆོག་གིས་ནང་ཁུལ་དམ་ཚིག་རྡོག་རྩ་གཅིག་སྒྲིལ་དང་མཐུན་ལམ་དགོས་རྒྱུ་ནི་ཤིན་ཏུ་གལ་ཆེན་པོ་ཡིན་པ་དང་། ཀོ་ལེ་གྷལ་ས་གནས་དེ་བཞིན་ཡོངས་གྲགས་སུ་ཆོལ་ཁ་ཆོས་ལུགས་ཀྱི་ཐེན་འཁྱེར་མེད་པ་དང་། ནང་ཁུལ་མཐུན་ལམ་ཡོད་པ། གཞིས་ཆགས་རྣམས་སྙོམས་ཆུང་ཡིན་པར་ངོས་འཛིན་ཞུ་བཞིན་ཡོད་པས་མངགས་བརྗོད་དང་འབྲེལ་མུ་མཐུད་དེ་ལྟར་གནས་དགོས་པའི་ལམ་སྟོན་ཡང་གནང་སོང་།
མཐར་དཔལ་ལྡན་སྲིད་སྐྱོང་མཆོག་གིས་ད་ལན་ས་གནས་སུ་ཡོང་དགོས་དོན་གཙོ་བོ་ནི་སྲིད་སྐྱོང་གི་ལས་ཡུན་གཙང་ལ་ཉེ་བར་བརྟེན་འདས་པའི་ལོ་ངོ་བཅུའི་རིང་མང་ཚོགས་ཀྱི་རྒྱབ་སྐྱོར་ལ་བརྟེན་ནས་ཞབས་ཕྱི་ཞུ་རྒྱུའི་གོ་སྐབས་ཐོབ་པར་ཐུགས་རྗེ་ཆེ་ཞུ་རྒྱུ་ཡིན་ཞེས་དང་། མང་ཚོགས་ཀྱི་རེ་བ་བཅོལ་བ་བཞིན་དཀའ་ལས་བརྒྱབ་ཡོད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཐུག་མཉེས་པོ་དང་དགའ་པོ་གནང་གི་ཡོད་ཅེས་སྤོབས་པ་ཐོན་པོའི་ཐོག་ནས་ཞུ་ཐུབ་ཀྱི་འདུག དེ་བཞིན་འདས་པའི་ལོ་བཅུའི་ནང་ཤེས་ཡོན་དང་དཔལ་འབྱོར། ཆབ་སྲིད་གང་ཅིའི་ཐད་ནས་ཡར་རྒྱས་ཕྱིན་པའི་ཐོག་བོད་མིའི་སྒྲིག་འཛུགས་ས་བརྟན་ཡོང་ཆེད་གྲུབ་འབྲས་ལེགས་སོན་བྱུང་ཡོད། ཅེས་སོགས་ཀྱི་གསུང་བཤད་གནང་།
དེ་ནས་ཀོ་ལེ་གྷལ་དོན་ལྡན་གླིང་ས་གནས་འགོ་འཛིན་དགེ་ལེགས་འབྱུང་གནས་ལགས་ཀྱིས་མི་མང་ཡོངས་ཀྱི་ཚབ་ཞུས་ཏེ་དཔལ་ལྡན་སྲིད་སྐྱོང་མཆོག་ལ་ཐུགས་རྗེ་ཆེ་ཞུའི་ཕྱག་འཁྱེར་ཞིག་དང་སྐུ་ཐང་ཞིག་ཕུལ་སོང་། མཛད་སྒོའི་ཐོག་༸རྒྱལ་བའི་བཀའ་དྲིན་རྗེས་དྲན་གྱི་ལས་རིམ་དང་འབྲེལ་སློབ་ཕྲུག་དང་ས་གནས་ལྷ་མོ་ཚོགས་པ། དེ་བཞིན་གྲོང་སྡེ་སོ་སོའི་ངོས་ནས་གཞས་སྣ་ཁག་གཅིག་གཟིགས་འབུལ་ཞུས་པ་དང་། མཛད་སྒོ་གྲུབ་རྗེས་དཔལ་ལྡན་སྲིད་སྐྱོང་མཆོག་གིས་ (Indoor Gym) དང་མི་མང་ཚོགས་ཁང་གསར་རྒྱག་གི་ལས་གཞི་འགྲོ་བཞིན་པ་དེར་འཚམས་གཟིགས་གནང་ཡོད་པ་བཅས། །
