༄༅། །འདི་གར་ཐའེ་ཝན་བོད་ཀྱི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༡ ཟླ་ ༤ ཚེས་ ༢༢ སྔ་དྲོ་ཐེ་ཝན་བོད་ཀྱི་སྐུ་ཚབ་དོན་ཁང་གི་ནང་ཆོས་འཛིན་གྲྭའི་ནང་བཀའ་ཟུར་༸སྐྱབས་རྗེ་ཀིརྟི་རིན་པོ་ཆེ་མཆོག་གི་སྐུ་ཚེའི་ལོ་རྒྱུས་༼མི་ཚེ་གཅིག་ལ་སྐྱེ་བ་གསུམ།༽ཞེས་པའི་རྒྱ་ཡིག་དཔེ་དེབ་འདི་བཞིན་ཐེ་ཝན་དོན་གཅོད་གསར་རྙིང་གཉིས་དང་། དོན་ཁང་གི་ཆོས་དགེ་དགེ་བཤེས་འཇམ་དཔལ་ཆོས་འཛིན་ལགས་བཅས་ནས་དབུ་འབྱེད་གནང་བ་རེད།ཐོག་མར་དོན་གཅོད་ཟླ་བ་ཚེ་རིང་ལགས་ཀྱིས་བཀའ་ཟུར་༸སྐྱབས་རྗེ་ཀིརྟི་རིན་པོ་ཆེ་མཆོག་དང་དཔེ་དེབ་སྐོར་ངོ་སྤྲོད་གནང་། དེ་ནས་གངས་ལྗོངས་དཔེ་སྐྲུན་ཁང་གི་འགན་འཛིན་ལྕམ་ལེའི་གཡུས་ཉིང་ལགས་ནས་དཔེ་དེབ་པར་སྐྲུན་གནང་དགོས་པའི་དམིགས་ཡུལ་ངོ་སྤྲོད་གནང་རྗེས། ༸སྐྱབས་རྗེ་ཀིརྟི་རིན་པོ་ཆེ་མཆོག་གིས་དཔེ་དེབ་འདིའི་མིང་ལ་མི་ཚེ་གཅིག་ལ་སྐྱེ་བ་གསུམ་ལེན་སྟངས་སྐོར་ངོ་སྤྲོད་སྙིང་བསྡུས་དང་། ལྷག་པར་སྐྱེ་བ་གཉིས་པ་ལྟ་བུ་བོད་ཀྱི་རྒྱལ་ས་ལྷ་སར་རྒྱ་དམར་དམག་གིས་དྲག་གནོན་སྐབས་མེ་སྒྱོགས་སུམ་བརྒྱ་ལྷག་བརྒྱབ་པའི་གནས་སྟངས་དངོས་སུ་མིག་མཐོང་བྱུང་བ་སོགས་ངོ་སྤྲོད་གནང་རྗེས་མཐའ་མར་བཀའ་སློབ་གནང་དོན། ད་ལོ་བརྒྱད་ཅུར་སླེབས་པས་སྐྱེ་བ་བཞི་པ་སྟེ་ཕལ་ཆེར་འཆི་ལ་ཉེ་བས་འགྱོད་པ་མེད་པའི་ངང་གནས་ཡོད།དེབ་འདིའི་ནང་ངའི་མི་ཚེའི་ལོ་རྒྱུས་དང་འབྲེལ་བའི་པར་རིས་མང་པོ་ཡོད་པ་རེད། མི་ཚེ་རིང་པོ་འདིར་ཕྱི་མིག་བལྟ་དུས་ཡག་པོ་བྱུང་འདུག བོད་སྤྱི་པའི་དོན་དག་ཐོག་དཀའ་ལས་བརྒྱབ་མཁན་ཞིག་དང་། ཧུར་ཐག་འབད་ཐག་བྱས་ཡོད་དུས་དགའ་བ་སྒོམ་དགོས་པ་ཞིག་མ་གཏོགས། འགྲིག་མི་འདུག་བསམ་པ་ཞིག་བྱུང་མི་འདུག ངས་མཐའ་མ་བསླབ་བྱ་ལ་ངའི་མི་ཚེ་འདི་ལྷག་བསམ་རྣམ་དག་གིས་མི་ཚེ་སྐྱེལ་བ་ཡིན་དུས། མཐའ་མ་འདི་ལ་སེམས་པ་སྐྱིད་པོ་ཡོང་འདུག་ཅེས་སོགས་གསུངས།མཇུག་ཏུ་དོན་ཁང་གི་ལས་བྱེད་དང་། གངས་ལྗོངས་དཔེ་སྐྲུན་ཁང་གི་འབྲེལ་ཡོད། རྩོམ་པ་པོ་ལིའི་ཅང་ལིན་ལགས་བཅས་ལ་ཐུགས་རྗེ་ཆེ་ཞུས་གནང་། མི་ཚེ་གཅིག་ལ་སྐྱེ་བ་གསུམ་ཞེས་པའི་རྒྱ་ཡིག་དཔེ་དེབ་འདི་བཞིན་གངས་ལྗོངས་དེབ་ཕྲེང་ ༤༢ པ་དེ་ཡིན་ཞིང་། རྒྱ་ཡིག་གི་ནང་དོན་ཤོག་གྲངས་ཉིས་བརྒྱ་ལྷག་དང་། ཀིརྟི་རིན་པོ་ཆེའི་སྐུ་ཚེའི་ལོ་རྒྱུས་དང་འབྲེལ་བའི་ཚོན་ཁྲ་ཅན་གྱི་པར་རིས་ཁྱོན་གྲངས་ ༡༨༤ དེ་བཞིན་ཀིརྟི་ཚང་དང་ཐུན་མོང་མ་ཡིན་པའི་འབྲེལ་ཡོད་དགོན་སྡེ་ཁག་གི་པར་རིས་ལག་སོན་བྱུང་བ་གྲངས་ ༤༣ བཅས་བཀོད་ཡོད་པ་རེད། །