ཕྱི་ལོ་ ༢༠༢༡ ཟླ་ ༤ ཚེས་ ༢ རེས་གཟའ་པ་སངས། 
༄༅། །ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ཉི་ཧོང་གི་གཞུང་འཛིན་གུ་ཡངས་མང་གཙོ་ཆབ་སྲིད་ཚོགས་པའི་ (Liberal Democratic Party) སྤྱི་ཁྱབ་ལས་ཁུངས་སུ་གུ་ཡངས་མང་གཙོ་ཆབ་སྲིད་ཚོགས་པའི་འགྲོ་བ་མིའི་ཐོབ་ཐང་ཚོགས་ཆུང་ལ་ད་ལྟའི་བོད་ནང་གི་གནས་སྟངས་སྤྱིའི་སྐོར་འགྲེལ་བརྗོད་གནང་ཡོད།
དེ་ཡང་གུ་ཡངས་མང་གཙོ་ཆབ་སྲིད་ཚོགས་པའི་ཕྱི་སྲིད་ཚོགས་ཆུང་གི་ཚོགས་གཙོ་དང་ཉི་ཧོང་གྲོས་ཚོགས་འཐུས་མི་སྐུ་ཞབས་སཱ་ཊོ་མ་ས་ཧི་ས་ (Sato Masahisa) མཆོག་གིས། གུ་ཡངས་མང་གཙོ་ཆབ་སྲིད་ཚོགས་པའི་སྤྱི་ཁྱབ་ལས་ཁུངས་སུ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་ཚབ་ཅིག་གིས་བོད་ཀྱི་གནད་དོན་སྐོར་འགྲེལ་བརྗོད་གནང་བ་ཐོག་མ་ཆགས་ཡོད་པ་མ་ཟད། དེས་ཉི་ཧོང་གི་གྲོས་ཚོགས་འཐུས་མི་རྣམ་པར་བོད་དོན་སྐོར་གོ་རྟོགས་དང་བོད་དོན་རྒྱབ་སྐྱོར་ལས་འགུལ་སྤེལ་ཕྱོགས་སྐོར་གྱི་འཆར་གཞི་ལ་རམ་འདེགས་གནང་ཡོད། ཅེས་དང་།
རྒྱ་ནག་གིས་བོད་ནང་ཡར་རྒྱས་ཀྱི་སྲིད་བྱུས་ཞེས་པ་ལག་བསྟར་བྱེད་བཞིན་པ་དེས་བོད་མི་རིགས་ཀྱི་ངོ་བོ་དང་རིག་གཞུང་སོགས་རྒྱ་ནག་ནང་འཐིམ་འཇུག་གི་ཡོད་ཅེས་གསུངས། གཞན་ཡང་ཁོང་གིས་ཕྱི་ལོ་ ༢༠༢༠ ལོའི་ཨ་རིའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་དང་འབྲེལ་ནས་གསུང་དོན། ཉི་ཧོང་གཞུང་གིས་བོད་ནང་གནས་ཚུལ་ཅི་ཞིག་འབྱུང་བཞིན་པའི་སྐོར་མཁྱེན་དགོས་པ་མ་ཟད། ཉི་ཧོང་གིས་རྒྱ་ནག་གཞུང་དང་ཕྱི་འབྲེལ་ལངས་ཕྱོགས་སྐོར་བསྐྱར་ཞིབ་གནང་དགོས་པ་སོགས་ཀྱི་སྐོར་གསུངས།
ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ཉི་ཧོང་གི་གཞུང་འཛིན་གུ་ཡངས་མང་གཙོ་ཆབ་སྲིད་ཚོགས་པའི་འགྲོ་བ་མིའི་ཐོབ་ཐང་ཚོགས་ཆུང་ལ་བོད་ཀྱི་གནད་དོན་སྐོར་འགྲེལ་བརྗོད་གནང་སྐབས་གསུང་དོན། བོད་ནང་རིག་གནས་གསར་བརྗེའི་རྣམ་པ་གསར་པ་ཞིག་ཁྱབ་བཞིན་ཡོད། རྒྱ་ནག་གཞུང་གིས་བོད་ཀྱི་ས་ཁུལ་གང་སར་ཉེན་རྟོག་པའི་ལས་ཁུངས་བཙུགས་ཏེ་བོད་མི་རྣམས་ལ་དམ་བསྒྲགས་དང་ཕྱི་རྒྱལ་ཡུལ་གྲུ་ཁག་ལ་འབྲེལ་བ་གནང་འཇུག་གི་མེད། ད་ལྟའི་ཆར་བོད་ནི་ཉེན་རྟོག་པའི་རྒྱལ་ཁབ་ལྟ་བུ་ཆགས་ཡོད། ཅེས་དང་།
རྒྱ་གཞུང་གིས་དབུལ་སྐྱོར་ལས་གཞི་ཟེར་བར་ཁ་གཡར་ནས་བོད་ཀྱི་ངོ་བོ་དང་། ཆོས། རིག་གཞུང་། སྐད་ཡིག་བཅས་པ་རྩ་གཏོར་གྱི་སྲིད་བྱུས་སྤེལ་བཞིན་ཡོད། ཨ་རིའི་གཞུང་གིས་ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་གཏན་འབེབས་གནང་བར་རྒྱབ་སྐྱོར་དང་། དེ་བཞིན་ཉི་ཧོང་གཞུང་གིས་བོད་ནང་ཕར་འགྲོ་ཚུར་འོང་གི་ཁྲིམས་ཤིག་གཏན་འབེབས་གནང་དགོས་པའི་རེ་སྐུལ་གནང་ཡོད།
ཕྱོགས་མཚུངས་ཨརྱ་ཚེ་དབང་རྒྱལ་པོ་ལགས་ཀྱིས་ཉི་ཧོང་གཞུང་ལ་བོད་མིའི་འཐབ་རྩོད་ནི་རང་དབང་དང་། དྲང་བདེན། མང་གཙོ། འཚེ་མེད་ཞི་བ། འགྲོ་བ་མིའི་ཐོབ་ཐང་བཅས་ཀྱི་སྐོར་ཡིན་སྟབས་ཉི་ཧོང་གཞུང་གིས་བོད་ཀྱི་གནད་དོན་ནི་རྒྱལ་སྤྱིའི་གནད་དོན་ཡིན་པར་ངོས་འཛིན་གནང་དགོས་པའི་རེ་སྐུལ་ཞུས་ཡོད་པ་མ་ཟད། བོད་པའི་སློབ་ཕྲུག་ཚོས་ཉི་ཧོང་ནང་ཤེས་ཡོན་འདྲ་མིན་ཐོག་སློབ་སྦྱོང་གནང་སླད་ཉི་ཧོང་གི་ཕྱི་རྒྱལ་ཡར་རྒྱས་རོགས་དངུལ་ (Overseas Development Aid) བརྒྱུད་ཁོང་ཚོར་སློབ་ཡོན་གནང་དགོས་པའི་རེ་སྐུལ་ཞུས་ཡོད།
དེ་རྗེས་ཉི་ཧོང་གི་གྲོས་ཚོགས་འཐུས་མི་ཁག་གཅིག་གིས་རྒྱ་ནག་གཞུང་གིས་བོད་ནང་དམ་བསྒྲགས་བྱེད་བཞིན་པ་དང་། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་ཀྱི་གནད་དོན། བོད་མིའི་སྒྲིག་འཛུགས་སོགས་ཀྱི་སྐོར་བཀའ་འདྲི་གནང་བར་ཨརྱ་ཚེ་དབང་རྒྱལ་པོ་ལགས་ཀྱིས་ལན་འདེབས་གནང་ཡོད། བོད་ནང་གི་གནས་སྟངས་སྤྱིའི་སྐོར་འགྲེལ་བརྗོད་གནང་གྲུབ་རྗེས་ཨརྱ་ཚེ་དབང་རྒྱལ་པོ་ལགས་ཀྱིས་ཉི་ཧོང་གི་གསར་ཁང་གྲགས་ཅན་ཨན་ཨེ་ཆི་ཀེ་ (NHK) དང་། ཇི་ཇི། (Jiji press) ཀེ་ཡོ་ཌོ། (Kyodo) ཡོ་མིའུ་རི་ཤིམ་པུན། (Yomiuri Shimbun) ཨ་ས་ཧི་ཤིམ་པུན། (Asahi Shimbun) བཅས་ཀྱི་གསར་འགོད་པ་རྣམས་ལ་བོད་ཀྱི་གནད་དོན་སྐོར་འགྲེལ་བརྗོད་གནང་ཡོད།
ཉི་ཧོང་དོན་ཁང་གིས་ཉི་ཧོང་གི་གྲོས་ཚོགས་འཐུས་མི་རྣམ་པ་དང་གསར་འགོད་པ་བཅས་ལ་ད་ལྟའི་བོད་ནང་གི་གནས་སྟངས་སྐོར་ཡིག་ཆ་འགྲེམས་སྤེལ་དང་། དེ་བཞིན་བོད་མིའི་སྒྲིག་འཛུགས་ཀྱི་དབུ་མའི་ལམ་གྱི་སྲིད་བྱུས་དང་ཀུན་གཟིགས་པཎ་ཆེན་རིན་པོ་ཆེའི་སྐོར་དཔེ་དེབ་འགྲེམས་སྤེལ་གནང་ཡོད་པ་བཅས།།
