༄༅། །ཕྱི་ལོ་ ༢༠༢༡ ཟླ་ ༤ ཚེས་ ༡༤ ཉིན་ཀརྨ་སེང་གེ་ལགས་ཀྱིས་ཨོསྟྲེ་ལི་ཡཱ་དང་། ནིའུ་ཛི་ལེནྜ། ལྷོ་ཤར་ཨེ་ཤི་ཡ་ཁུལ་གྱི་སྐུ་ཚབ་དོན་གཅོད་ཀྱི་ལས་ཁུར་འགོ་འཛུགས་གནང་ཡོད།
སྐུ་ཚབ་དོན་གཅོད་གསར་རྙིང་དབར་རྩིས་སྤྲོད་རྩིས་ལེན་གྱི་སྤྲོད་དཔང་དུ་བཀའ་ཟུར་ཇོ་དཔལ་དཔལ་འབྱོར་ཚེ་རིང་མཆོག་དངོས་སུ་ཕེབས་ཡོད་པ་དང་། ཕྱི་འབྲེལ་དྲུང་ཆེ་ཀརྨ་ཆོས་དབྱིངས་ལགས་ཀྱིས་དྲ་ལམ་བརྒྱུད་དོན་གཅོད་གསར་རྙིང་དབར་རྩིས་སྤྲོད་རྩིས་ལེན་གྱི་སྤྲོད་དཔང་གནང་ཡོད།
དེ་ཡང་སྐུ་ཚབ་དོན་གཅོད་གསར་རྙིང་དབར་རྩིས་སྤྲོད་རྩིས་ལེན་གྱི་མཛད་སྒོ་སྟབས་བདེ་ཞིག་ཚོགས་ཡོད་པ་དང་། སྐབས་དེར་སྐུ་ཚབ་དོན་གཅོད་ཁང་གི་འགན་འཛིན་ལྷན་ཚོགས་ཀྱི་ཚོགས་མི་རྣམ་པ་དང་། བོད་རིགས་སྤྱི་མཐུན་ཚོགས་པ་ཁག་གི་ཚོགས་གཙོ་དང་སྐུ་ཚབ་སོགས་ཀྱིས་དོན་གཅོད་གསར་པ་ཀརྨ་སེང་གེ་ལགས་ལ་འཚམས་འདྲི་མཇལ་དར་དང་། དོན་གཅོད་ཟུར་པ་མཚོ་འགོ་ལྷག་པ་ལགས་ལ་ཐུགས་རྗེ་ཆེ་ཞུའི་མགུལ་དར་ཕུལ་ཡོད།
སྤྱིར་སྐུ་ཚབ་དོན་གཅོད་གསར་པ་ཀརྨ་སེང་གེ་ལགས་ནི་དེ་སྔ་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་དྲུང་ཆེ་ཡིན་ཞིང་། དོན་གཅོད་ཟུར་པ་མཚོ་འགོ་ལྷག་པ་ལགས་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་དྲུང་ཆེར་བསྐོ་གཞག་གནང་ཡོད་པ་བཅས། །
