༄༅། །དེང་སྐབས་རང་རེའི་སྤྱི་ཚོགས་ནང་དངོས་ཡོད་ཀྱི་གནས་ཚུལ་ཇི་ཡིན་མ་དཔྱད་པར་ཧོལ་རྒྱུག་གིས་གཞན་ལ་སྐྱོན་འཛུགས་དང་ཟུར་ཟ་བྱེད་བཞིན་པའི་ཉེར་ལེན་གྱིས་ནང་ཁུལ་ཆིག་སྒྲིལ་ལ་གནོད་པ་དང་ནུས་པ་མཉམ་སྤུངས་ཀྱི་ལས་དོན་ཁག་རང་བཞིན་གྱིས་འགྲུབ་མ་ཐུབ་པའི་གནས་སྟངས་ཆགས་ཀྱི་ཡོད་སྟབས། ཚང་མས་རྡོག་རྩ་གཅིག་སྒྲིལ་གྱི་ནུས་པ་གནོད་གཞིའི་བྱ་ལས་དེ་རིགས་རྩ་བ་ནས་མ་སྤེལ་རོགས་ཞེས་འབོད་སྐུལ་ཞུ་རྒྱུ་དང་། ཆབས་ཅིག་ད་ལམ་སྤྱི་ཚོགས་དྲྭ་ལམ་དུ་ཆབ་སྲིད་བཙོན་ཟུར་གྲགས་ཅན་ཁག་ཅིག་ལའང་སྐྱོན་འཛུགས་བྱས་པའི་གནས་ཚུལ་བྱུང་ཡོད་པར་བློ་ཕམ་དང་བཅས། ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་དང་། ངག་དབང་གསལ་སྒྲོལ་ལགས། མགོ་ལོག་འཇིགས་མེད་ལགས། ཉི་མ་ལྷ་མོ་ལགས་ཀྱིས་གཙོས་པའི་ཆབ་སྲིད་བཙོན་ཟུར་རྣམས་ནི་རྒྱ་གཞུང་གི་བཙན་གནོན་དང་མཚོན་ཆའི་འོག་ནས་རང་སྲོག་ཚུན་བློས་བཏང་གིས་རང་དབང་སླར་གསོའི་འཐབ་རྩོད་གནང་མཁན་རྒྱལ་གཅེས་པ་ཤ་སྟག་ཡིན། ཁོང་རྣམ་པར་ཆེ་མཐོང་བརྩི་བཀུར་བྱེད་དགོས་པ་ལས་ཟུར་ཟ་སྐྱོན་བརྗོད་དང་གཞི་མེད་ཉེས་འཛུགས་ཀྱི་གཏམ་གླེང་རིགས་སྤེལ་བ་གཏན་ནས་མ་འོས་པ་མ་ཟད། དགྲ་དགའ་གཉེན་སྡུག་གནས་སུ་འགྱུར་ཉེན་ཆེ་བས། དེ་རིགས་མི་ཡོང་བ་རང་རིགས་རྩམ་ཟན་ཡོངས་ལ་འགན་འཁྲི་ཡོད་སྟབས། ཚང་མས་སྣང་མེད་དུ་མ་བཞག་པར་ནང་ཁུལ་ཐལ་ཆའི་གཏམ་གླེང་རིགས་ནམ་ཡང་མ་སྤེལ་རོགས་ཞེས་བཀའ་ཕེབས་སོང་བའི་འབོད་སྐུལ་གསལ་བསྒྲགས་སུ། བཀའ་དྲུང་ཡིག་ཚང་ནས་ཕྱི་ལོ་ ༢༠༢༡ ཟླ་ ༤ ཚེས་ ༩ ལ།།
གསར་གནས།
འབྲེལ་གནས།
