ཕྱི་ལོ་ ༢༠༢༡ ཟླ་ ༣ ཚེས་ ༤ རེས་གཟའ་ཕུར་བུ།༄༅། །ཕྱི་ལོ་ ༢༠༢༡ ཟླ་ ༣ ཚེས་ ༣ ཉིན་ཨ་རིའི་ནང་རྟེན་གཞི་བྱས་པའི་རང་དབང་ཁང་པ་ཞེས་པས་ཕྱི་ལོ་ ༢༠༢༠ ལོར་རྒྱལ་སྤྱིའི་འགྲོ་བ་མིའི་ཐོབ་ཐང་གི་གནས་བབ་ལ་ཞིབ་འཇུག་མཐིལ་ཕྱིན་བྱས་ཏེ་སྙན་ཐོ་བཏོན་པའི་ནང་བོད་ནི་འཛམ་གླིང་སྟེང་རང་དབང་གི་ཚད་གཞི་ཆེས་དམའ་ཤོས་ཡིན་པ་བཀོད་འདུག 

དེ་ཡང་ཕྱི་ལོ་ ༢༠༢༡ ལོའི་རང་དབང་ཁང་པས་སྙན་ཐོའི་ནང་འཁོད་པ་ལྟར་ན། འཛམ་གླིང་ནང་བོད་དང་སི་རི་ཡ་གཉིས་འགྲོ་བ་མིའི་རང་དབང་གི་ཚད་གཞི་ཆེས་དམའ་ཤོས་ཡིན་པ་བཀོད་ཡོད་པ་མ་ཟད། རྒྱལ་སྤྱིའི་རང་དབང་གི་གྲངས་ཚད་བང་རིམ་ལྟར་ན་འདས་པའི་ལོ་ངོ་དྲུག་གི་ནང་བོད་ཀྱི་རང་དབང་གི་གྲངས་ཚད་ནི་བརྒྱ་ནས་གཅིག་ཡིན་པ་འཁོད་ཡོད། 

བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས། རང་དབང་ཁང་པས་སྙན་ཐོ་བཏོན་པར་དགའ་བསུ་ཞུས་པ་དང་འབྲེལ་འདས་པའི་ལོ་ངོ་དྲུག་གི་ནང་བོད་ཀྱི་རང་དབང་གི་གྲངས་ཚད་ནི་བརྒྱ་ནས་གཅིག་ཡིན་སྟབས། དེས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཛ་དྲག་ཅན་དུ་གྱུར་པ་སྟོན་གྱི་ཡོད། ཅེས་དང་། སི་རི་ཡའི་རང་དབང་གི་གྲངས་ཚད་ནི་ཀླད་ཀོར་ནས་གཅིག་ཆགས་ཡོད་པས་ཅུང་ཙམ་ཡར་རྒྱས་ཕྱིན་ཡོད་པ་དང་། རྒྱ་ནག་གིས་བོད་ནང་མུ་མཐུད་འགྲོ་བ་མིའི་ཐོབ་ཐང་རྩིས་མེད་རྡོག་རོལ་བཏང་དང་གཏོང་བཞིན་པར་བརྟེན་བོད་ཀྱི་འགྲོ་བ་མིའི་ཐོབ་ཐང་གི་གནས་སྟངས་མུ་མཐུད་ཛ་དྲག་ཅན་དུ་གྱུར་དང་འགྱུར་བཞིན་ཡོད། ཅེས་གསུངས།

རང་དབང་ཁང་པས་མི་འགྱང་བར་བོད་ཀྱི་རང་དབང་གི་གནས་བབ་སྐོར་སྙན་ཐོ་རྒྱས་པ་ཞིག་རང་དབང་ཁང་པའི་དྲ་ཚིགས་སྟེང་འགོད་གནང་རྒྱུ་ཡིན་འདུག་པ་བཅས།།