ཕྱི་ལོ་ ༢༠༢༡ ཟླ་ ༣ ཚེས་ ༡༡ རེས་གཟའ་ཕུར་བུ། ༄༅། །ཕྱི་ལོ་ ༢༠༢༡ ཟླ་ ༣ ཚེས་ ༡༠ ཉིན་ཨིན་ཡུལ་གྲོང་སྡེ་གྷི་རིན་ཝིཆ་ (Greenwich) ཞེས་པའི་གྲོང་སྡེ་སྤྱི་ཁྱབ་ལས་ཁུངས་ནས་རྒྱལ་ས་ལོན་ཌོན་གྱི་ལྷོ་ཤར་ངོས་སུ་ཆགས་པའི་ཝུལ་ཝིཆ་ (Woolwich) གྲོང་སྡེའི་ཚོགས་ཁང་གི་མདུན་ཐང་དུ་བོད་ཀྱི་རྒྱལ་དར་སྒྲེང་འཛུགས་ཀྱི་ལམ་ནས་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༢ སྲུང་བརྩི་ཞུས་འདུག
སྐབས་དེར་གྲོང་སྡེ་སྤྱི་ཁྱབ་པ་ལྕམ་སྐུ་ལིན་ཌ་བྲཌ་ (Linda Bird) མཆོག་དང་།  སྐུ་ཞབས་ཌེ་ཝིཌ་གྷར་ཌ་ནར་ (David Gardner) མཆོག ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས། གཞན་ཡང་ས་གནས་བོད་མི་བཅས་མཉམ་ཞུགས་གནང་ཡོད།
སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ཀྱིས་གྲོང་སྡེ་སྤྱི་ཁྱབ་པ་མཆོག་དང་སྐུ་ཞབས་ (David Gardner) མཆོག་རྣམ་གཉིས་ལ་གསུམ་བཅུའི་དུས་དྲན་ཉིན་བོད་ཀྱི་རྒྱལ་དར་སྒྲེང་འཛུགས་ཀྱི་ལམ་ནས་བོད་དོན་དང་བོད་མིར་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཡོད།
དེ་ནས་གྲོང་སྡེ་སྤྱི་ཁྱབ་པ་ལྕམ་སྐུ་ལིན་ཌ་བྲཌ་མཆོག་གིས་ས་གནས་བོད་མིར་འཚམས་འདྲི་དང་སྦྲགས་གསུང་དོན། བོད་ཀྱི་བདེན་པའི་འཐབ་རྩོད་དང་། འཛམ་གླིང་ནང་སྡུག་སྦྱོང་མནར་གཅོད་མྱོང་བཞིན་པའི་སྐྱེ་བོ་རྣམས་ལ་རྒྱབ་སྐྱོར་གནང་རྒྱུ་ཧ་ཅང་གལ་ཆེན་པོ་རེད། ངས་གྷིརན་ཝིཆ་གྲོང་སྡེ་སྤྱི་ཁྱབ་ལས་ཁུངས་ནས་བོད་དོན་དང་བོད་མིར་མུ་མཐུད་རྒྱབ་སྐྱོར་གནང་རྒྱུ་ཡིན་ཞེས་གསུངས། ད་ལན་ཨིན་ཡུལ་རྒྱལ་ས་ལོན་ཌོན་གྱི་ལྷོ་ཤར་ངོས་སུ་ཆགས་པའི་ཝུལ་ཝི་ཆི་ (Woolwich) ཞེས་པའི་ཁུལ་དེར་བོད་ཀྱི་རྒྱལ་དར་སྒྲེང་འཛུགས་གནང་པ་ཐེངས་གཉིས་པ་ཆགས་ཀྱི་ཡོད་པ་བཅས། །