༄༅། །འདི་གར་མེའོ་ཆོས་འཕེལ་གླིང་བོད་མིའི་ས་གནས་འགོ་འཛིན་ལས་ཁང་ནས་བཏང་གནས་ནང་འཁོད་དོན། ཨ་རུ་ཎཱ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་པདྨ་མཁའ་འགྲོ་མཆོག་ཨ་རུ་ཎཱ་ཅལ་མངའ་སྡེའི་ཅང་ལང་རྫོང་ཁྱབ་ཁོངས་ཁག་ཏུ་ཉིན་གྲངས་བཞིའི་རིང་གཞུང་འབྲེལ་འཚམས་གཟིགས་དང་བསྟུན་མེའོ་ཆོས་འཕེལ་གླིང་བོད་མིའི་གཞིས་སྒར་དུའང་འཚམས་གཟིགས་ཕེབས་གནང་བ་ཙམ་མ་ཟད་སིལ་པོལ་རྩེད་ཐང་དབུ་འབྱེད་དང་། སྔ་དྲོའི་ཞལ་ལག་ཀྱང་གཞིས་སྒར་ནང་མཆོད་གནང་ཡོད།
དེ་ཡང་སྤྱི་ཁྱབ་བློན་ཆེན་མཆོག་ཐོག་མར་གཞིས་སྒར་ནང་འབྱོར་མ་ཐག་སཾ་བྷོ་ཊ་སློབ་གྲྭའི་སློབ་ཕྲུག་རྣམས་ནས་བཀྲ་ཤིས་ཞོལ་པ་འཁྲབ་སྟོན་འགོ་འཛུགས་ཀྱིས་ས་གནས་འགོ་འཛིན་བསྟན་འཛིན་མཆོག་ལྡན་ལགས་ཀྱིས་མཇལ་དར་དཀར་གཙང་ཕུལ་ཏེ་འཚམས་འདྲི་ཞུས་རྗེས། སྤྱི་ཁྱབ་བློན་ཆེན་མཆོག་ལ་གྲོ་སོ་ཕྱེ་མར་དང་ཆང་ཕུད་འདེགས་འབུལ་ཞུས། མངའ་གཞུང་གི་གྲོས་ཚོགས་འཐུས་མི་སྐུ་ཞབས་སམ་ལོང་མོ་སང་མཆོག་དང་། རྫོང་དཔོན་གཞོན་པ་སྐུ་ཞབས་སན་ནི་ཀེ་སིང་མཆོག ས་འཐུས་ཚོགས་གཙོ་དབང་ཆེན་གྲགས་པ་ལགས། གཞན་ཡང་སྡེ་ཚན་ཁག་གི་འགན་འཛིན་དང་ལས་བྱེད་རྣམ་པས་ཕེབས་བསུ་ཞུས་གྲུབ་མཚམས་གཞིས་དགོན་པདྨ་ཆོས་གླིང་ནང་གནས་མཇལ་ཕེབས་ཡོད།
སྐབས་དེར་གནས་འཛིན་རིན་པོ་ཆེ་སྤྲུལ་སྐུ་པདྨ་ཆོས་དབྱིངས་རང་གྲོལ་ལགས་ཀྱིས་སྣེ་ལེན་ཞུས། དགོན་པར་གནས་མཇལ་གྲུབ་བསྟུན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་སིལ་པོལ་རྩེད་ཐང་གསར་རྒྱག་དང་དེའི་རྗེས་ཉམས་གསོ་བཅས་ཀྱི་རོགས་དངུལ་ཁྱོན་སྒོར་འབུམ་ ༡༠ གནང་ཡོད་པ་དེ་དབུ་འབྱེད་གནང་ཡོད་པ་དང་། དེ་ནས་མུ་མཐུད་གཞིས་སྒར་གྱི་མཉམ་འབྲེལ་རུམ་ཐག་སྡེ་ཚན་ཁག་དང་ས་གནས་འཕྲོད་བསྟེན་སྨན་ཁང་གཉིས་སུ་འཚམས་གཟིགས་གནང་།
མཐར་མི་མང་ཚོགས་ཁང་ནང་བོད་ཟས་ཞོགས་ཇ་འདེགས་འབུལ་ཞུས་ཏེ་ས་གནས་འགོ་འཛིན་གྱིས་སྐར་མ་ལྔའི་རིང་གཞིས་ཆགས་ཀྱི་སྤྱི་ཡོངས་གནས་སྟངས་ངོ་སྤྲོད་མདོར་བསྡུས་ཤིག་དང་། མངའ་གཞུང་ནས་རོགས་རམ་གང་ཐོབ་ཡོད་པ། མུ་མཐུད་ལམ་དང་གློག གད་སྙིགས་འཇོག་ཡུལ། ལམ་ཟུར་ཆུ་ཡུར་གྱི་དཀའ་ངལ་བཅས་པ་བརྙན་སྟོན་བརྒྱུད་འགྲེལ་བརྗོད་དང་སྦྲགས་ཡིག་ཐོག་ནས་ཀྱང་ཞུ་སྐུལ་ཕུལ་ཐུབ་པ་བྱུང་ཡོད། སྤྱི་ཁྱབ་བློན་ཆེན་མཆོག་གིས་གོང་གི་དཀའ་ངལ་ཁག་རྣམས་མགྱོགས་མྱུར་སེལ་རྒྱུ་ཡིན་སྐོར་ཞལ་བཞེས་བཟང་པོ་ཐོབ་བྱུང་ཡོད།
ས་གནས་མཉམ་འབྲེལ་གྱི་རེ་སྐུལ་ལྟར་གཞིས་ཆགས་ནང་རུམ་བཟོ་དང་ཕྱིར་ཚོང་ཚན་པ་སོགས་ཀྱི་ཁང་པ་གསར་རྒྱག་གི་འཆར་རྩིས་བཟོས་པ་དེར་རོགས་དངུལ་གནང་རྒྱུའི་བཀའ་བཞེས་ཀྱང་བཟང་པོ་ཐོབ་ཡོད། སྐབས་དེར་སྤྱི་ཁྱབ་བློན་ཆེན་མཆོག་མཉམ་གྲོང་གསེབ་འཛུགས་བསྐྲུན་བློན་ཆེན་སྐུ་ཞབས་ཧོན་ཆུན་ངན་ཏམ་དང་། གྲོང་སྡེ་ཡར་རྒྱས་དང་བཟའ་འབྲུ། ས་གཏེར་གྱི་བློན་ཆེན་སྐུ་ཞབས་ཀམ་ལོང་མོ་སང་མཆོག མངའ་སྡེའི་གྲོས་ཚོགས་ཀྱི་ཚོགས་གཞོན་སྐུ་ཞབས་ཏེ་སམ་པོང་ཏེ་མཆོག མངའ་སྡེའི་གྲོས་ཚོགས་འཐུས་མི་སྐུ་ཞབས་སམ་སོང་མོ་སང་མཆོག དེ་བཞིན་རྫོང་དཔོན་སྐུ་ཞབས་དྷི་ལྦན་ཡ་དྷབ་ལགས་དང་རྫོང་དཔོན་གཞོན་པ་སྐུ་ཞབས་སན་ནི་ཀེ་སིང་ལགས་རྣམ་གཉིས། རྫོང་གི་སྤྱི་ཁྱབ་སྐོར་སྲུང་འགན་འཛིིན་སྐུ་ཞབས་མི་ཧིན་གམ་པོ་ལགས་བཅས་ཀྱང་ཕེབས་གནང་ཡོད།
མཐར་ས་གནས་འགོ་འཛིན་དང་ས་འཐུས་ཚོགས་གཙོ་དབང་ཆེན་གྲགས་པ་ལགས་ཀྱིས་གཞིས་མི་ཡོངས་ཀྱི་ཚབ་མཚོན་ཕྱིར་སྤྱི་ཁྱབ་བློན་ཆེན་མཆོག་ལ་སྨན་ལྷའི་སྐུ་འདྲ་ཞིག་དང་། ལས་དྲུང་བསྟན་འཛིན་རང་གྲོལ་ལགས་ཀྱིས་་༸གོང་ས་མཆོག་གིས་ལུང་འདྲེན་བཀའ་སློབ་ཕྱག་རྟགས། གཞན་ཡང་ས་གནས་མཉམ་འབྲེལ་དང་དབུས་པདྨ་བཀོད་པ་སྐྱིད་སྡུག་ནས་ཀྱང་སྤྱི་ཁྱབ་བློན་ཆེན་མཆོག་ལ་ཕྱག་རྟགས་ཕུལ་གནང་ཡོད།
དེ་བཞིན་གཞིས་གྲོང་སྤྱི་མི་རྣམས་ནས་གཞན་སྐུ་མགྲོན་རྣམ་པར་ཕྱག་རྟགས་ཕུལ་གྲུབ་མཚམས་སྤྱི་ཁྱབ་བློན་ཆེན་སྐུ་ཞབས་པདྨ་མཁའ་འགྲོ་མཆོག་དང་གཞན་ཡང་མངའ་སྡེའི་སྣེ་ཡོད་སྐུ་མགྲོན་རྣམ་པ་གཞིས་ཆགས་ནས་ཕྱིར་མེའོ་གྲོང་སྡེའི་ཕྱོགས་སུ་ཕེབས་ཐོན་གནང་ཡོད་པ་བཅས།།
