ཕྱི་ལོ་ ༢༠༢༡ ཟླ་ ༣ ཚེས་ ༡༩ རེས་གཟའ་པ་སངས།
༄༅། །ཨ་རིའི་བྷོ་སི་ཊོན་བོད་རིགས་སྤྱི་མཐུན་ཚོགས་པ་དང་། བོད་རང་བཙན་སློབ་ཕྲུག་ཚོགས་པ། བྷོ་སི་ཊོན་ཡུ་གུར་ཚོགས་པ། བོད་དོན་ལས་འགུལ་བསྟི་གནས་ཁང་། བྷོ་སི་ཊོན་ཧོང་ཀོང་སྤྱི་ཚོགས་ལས་འགུལ་ཁང་། དེ་བཞིན་ཐེ་ཝན་དང་རྒྱ་རིགས་ཚོགས་སྡེ་ཁག་གི་ཚོགས་མི་སོགས་ནས་དཀའ་ངལ་ལ་མ་འཛེམ་པར་ཞུ་གཏུག་གི་ལས་འགུལ་རབ་དང་རིམ་པ་སྤེལ་བར་བརྟེན་ཨ་རིའི་མཱ་ས་ཆུ་སེ་ཊིའི་མངའ་སྡེའི་ནང་རྟེན་གཞི་བྱས་པའི་ཊ་ཧྥི་སི་མཐོ་སློབ་ཁང་ (Tufts University) གིས་ཁུང་ཙི་བསྟི་གནས་ཁང་ (Confucius Institute) སྒོ་བརྒྱག་རྒྱུའི་འཆར་གཞི་ཡོད་པའི་སྐོར་གསལ་བསྒྲགས་བསྐྱངས་གནང་ཡོད།
དེ་ཡང་བོད་རང་བཙན་སློབ་ཕྲུག་ཚོགས་པས་ཁུང་ཙི་བསྟི་གནས་ཁང་སྒོ་རྒྱག་སླད་གོང་གི་ཚོགས་པ་ཁག་ནས་འདས་པའི་ལོ་ངོ་གཉིས་དང་བདུན་ཕྲག་བཅུ་གསུམ་རིང་བསྟུད་མར་ངོ་རྒོལ་གྱི་ལས་འགུལ་སྤེལ་ཡོད། ཅེས་གསར་འགོད་གསལ་བསྒྲགས་སྤེལ། ཁུང་ཙི་བསྟི་གནས་ཁང་སྒོ་བརྒྱག་རྒྱུའི་གསལ་བསྒྲགས་མ་གནང་གོང་བྷོ་སི་ཊོན་བོད་རིགས་སྤྱི་མཐུན་ཚོགས་པའི་ཚོགས་གཙོ་ཨོ་ལོ་ལགས་ཀྱིས་ང་བོད་པ་ཞིག་ཡིན། ཕྱི་ལོ་ ༡༩༥༩ ལོར་རྒྱ་ནག་གཞུང་གིས་བོད་ས་ཡོངས་རྫོགས་དབང་སྒྱུར་བྱས་པ་ནས་བཟུང་བོད་མི་ས་ཡ་གཅིག་ལྷག་འདས་གྲོངས་སུ་གྱུར་བ་དེའི་འགན་རྒྱ་ནག་དམར་ཤོག་ཚོགས་པར་ཡོད་པ་དང་། ངའི་ཕ་མ་གཉིས་ལོ་དྲུག་དང་བརྒྱད་ཡིན་པའི་སྐབས་རྒྱ་ནག་གི་དབང་སྒྱུར་འོག་རི་བོ་ཧི་མ་ལ་ཡ་བརྒྱུད་རྐང་ཐང་དུ་བྲོས་བྱོལ་ལ་ཕེབས་དགོས་བྱུང་ཡོད། ཅེས་ཁུངས་སྐྱེལ་བདེན་དཔང་གནང་ཡོད།།
