༄༅། །ཕྱི་ལོ་ ༢༠༢༡ ཟླ་ ༣ ཚེས་ ༢༩ ཉིན་གྱི་སྔ་དྲོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨུ་རུ་སུའི་གཙུག་ལག་སློབ་གཉེར་ཁང་ལྔ་ཡིས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ་དྲ་ལམ་བརྒྱུད་བཞུགས་སྒར་རྒྱལ་བའི་ཕོ་བྲང་ནས་ཨུ་རུ་སུའི་གཙུག་ལག་སློབ་གཉེར་ཁང་ཁག་ལྔའི་སློབ་ཕྲུག་རྣམས་ལ་འགྱུར་ལྡོག་དུས་རིམ་ཁྲོད་ཀྱི་ང་ཚོའི་འཛམ་གླིང་(the theme Our World in the Time of Change) ཞེས་པའི་བརྗོད་གཞིའི་ཐོག་བཀའ་སློབ་སྩལ་དོན། ང་ཚོ་ཚང་མ་འགྲོ་བ་མི་ཡིན་པ་གཅིག་གྱུར་ཡིན་པ་མ་ཟད། ང་ཚོ་ཚང་མ་མི་ཚེ་བདེ་སྐྱིད་འདོད་པ་དང་སྡུག་བསྔལ་མི་འདོད་པ་གཅིག་མཚུངས་ཡིན། ཐ་ན་འབུ་སྲིན་ཕྲ་མོ་ཚུད་པའི་སེམས་ཅན་ཚང་མ་བདེ་སྐྱིད་འདོད་ཀྱི་ཡོད་པ་གཅིག་མཚུངས་ཡིན། འགྲོ་བ་མི་ལ་སེམས་ཅན་གཞན་ལས་ཁྱད་དུ་འཕགས་པའི་ཆོས་རབ་ཏུ་རྣམ་འབྱེད་ཀྱི་ཤེས་རབ་ཅིག་ཡོད། ང་ཚོས་བདེ་སྐྱིད་སྒྲུབ་ཆེད་ཆོས་རབ་ཏུ་རྣམ་འབྱེད་ཀྱི་ཤེས་རབ་བེད་སྤྱོད་བྱེད་ཀྱི་ཡོད། སྐབས་རེར་ང་ཚོར་ཁྱད་དུ་འཕགས་པའི་ཆོས་རབ་ཏུ་རྣམ་འབྱེད་ཀྱི་ཤེས་རབ་ཅིག་ཡོད་ཀྱང་མིག་རྒྱང་ཐུང་དྲགས་པ་དང་བསམ་བློ་གུ་དོག་པོ་ཡོང་གི་ཡོད།དུས་རབས་གོང་མའི་ནང་མི་རྣམས་ཀྱིས་མིག་རྒྱང་ཐུང་དྲགས་པ་དང་བསམ་བློ་གུ་དོག་པོ་ཡོད་པར་བརྟེན་ང་དང་ང་ཚོ་ཞེས་རང་ཕྱོགས་གཅིག་པུར་བསམ་བློ་བཏང་ཡོད། དཔེར་ན་བོད་ལ་མཚོན་ན་སྤྱིར་བཏང་ང་ཚོས་སེམས་ཅན་ཐམས་ཅན་གྱི་ཆེད་དུ་སྨོན་ལམ་རྒྱག་གི་ཡོད་ནའང་ལག་ལེན་ངོ་མའི་ཐོག་ནས་བོད་མི་གཅིག་པུར་བསམ་བློ་གཏོང་གི་ཡོད། དེ་བཞིན་ཨུ་རུ་སུའི་མི་ཚོས་ཀྱང་ཨུ་རུ་སུའི་མི་གཅིག་པུར་བསམ་བློ་གཏོང་གི་ཡོད། དུས་རབས་གོང་མའི་ནང་དམག་ཆེན་དང་པོ་དང་གཉིས་པ་བྱུང་བ་དེ་འགྲོ་བ་མིས་བཟོས་པ་རེད། འགྲོ་བ་མིའི་ཆོས་རབ་ཏུ་རྣམ་འབྱེད་ཀྱི་ཤེས་རབ་ལ་བརྟེན་ནས་དུས་རབས་སྔོན་མའི་ནང་ཚན་རིག་ཡར་རྒྱས་ཆེན་པོ་ཕྱིན་ཡོད། འགྲོ་བ་མིའི་ཤེས་ཡོན་དེ་དག་རྡུལ་ཕྲན་མཚོན་ཆ་དང་མེ་ཤུགས་འཕུར་མདའ་སོགས་བཟོ་རྒྱུའི་མཚོན་པས་དམག་དོན་དང་གཏོར་བཤིག་ཁོ་ནའི་ཆེད་བེད་སྤྱོད་བྱས་ཡོད། ད་ལྟ་སོ་སོའི་རྒྱལ་ཁབ་གཅིག་པུར་བསམ་བློ་བཏང་ནས་མ་བསྡད་པར་འགྲོ་བ་མི་སྤྱི་ལ་བསམ་བློ་གཏོང་དགོས་པའི་དུས་ལ་བབས་ཡོད། འཛམ་གླིང་ཆུང་ཆུང་འདིའི་སྒང་ལ་ང་ཚོ་ཚང་མ་གཅིག་ལ་གཅིག་བརྟེན་ནས་འཚོ་དགོས། འཛམ་གླིང་སྟེང་མི་ཐེར་འབུམ་བདུན་ཡོད་པ་རྣམས་ནང་ཁུལ་དབྱེ་བ་ཕྱེ་ནས་ང་ཚོ་དང་ཁོང་ཚོ་ཞེས་དམག་འཁྲུག་རྒྱག་རྒྱུའི་གཞི་རྩ་མེད། དེ་ནི་དངོས་ཡོད་གནས་ཚུལ་དང་མ་མཐུན་པ་ཞིག་ཡིན་པ་མ་ཟད། དེ་ལྟ་བུའི་བསམ་བློ་གཏོང་སྟངས་དེ་རྙིང་པ་རེད།

འགྲོ་བ་མི་དང་འཛམ་གླིང་བདེ་སྐྱིད་ལྡན་པ་ཞིག་བསྐྲུན་པར་མི་རིགས་དང་། ཆོས་ལུགས། རིག་གཞུང་བཅས་ཀྱི་ཁྱད་པར་ཡོད་པ་ནི་རིམ་པ་གཉིས་པ་རེད། གལ་ཆེ་ཤོས་ནི་ང་ཚོ་ཚང་མ་འགྲོ་བ་མི་ཡིན་པ་གཅིག་གྱུར་ཡིན། འཛམ་གླིང་ཆུང་ཆུང་འདིའི་སྒང་ལ་ང་ཚོ་ཚང་མ་གཅིག་ལ་གཅིག་བརྟེན་ནས་འཚོ་དགོས། ང་ཚོར་ཞི་བདེ་དང་བདེ་སྐྱིད་ལྡན་པའི་འཛམ་གླིང་དགོས་ཀྱི་ཡོད། དུས་རབས་ ༢༡ པའི་ནང་ང་ཚོས་འགྲོ་བ་མི་ཐེར་འབུམ་བདུན་ཚང་མ་ཁྱིམ་ཚང་གཅིག་གི་ནང་མི་ཡིན་པ་ལྟ་བུའི་བསམ་བློ་གཏོང་དགོས།ཨུ་རུ་སུ་ནི་རྒྱལ་ཁབ་ཆེན་པོ་ཞིག་ཡིན་སྟབས་འཛམ་གླིང་བདེ་སྐྱིད་ལྡན་པ་ཞིག་བསྐྲུན་རྒྱུའི་ནུས་པ་ཆེན་པོ་ཡོད། ངོས་ལ་རྣམ་པ་ཚོ་དང་ལྷན་བགྲོ་གླེང་བྱེད་རྒྱུའི་གོ་སྐབས་བྱུང་བར་ཧ་ཅང་དགའ་པོ་བྱུང་། དྲི་བ་ཡོད་ན་ང་ཚོས་ཕན་ཚུན་ནང་ཚགས་བྱས་ནས་བགྲོ་གླེང་བྱེད་ཆོག་གི་རེད། འདྲ་ཆགས་པོ་དེ་འདྲ་དགོས་པ་མ་རེད། ཁྱེད་རང་ཚོས་མི་གཞན་ཞིག་དང་ལྷན་སྐད་ཆ་བཤད་ཀྱི་ཡོད་བསམ་ན་འགྲིག་གི་ཡོད། ལུས་སེམས་དང་མྱོང་ཚོར་གྱི་ཆ་ནས་ང་ཚོ་ཚང་མ་གཅིག་པ་རེད།  ང་ཚོ་ཚང་མས་མི་ཚེ་བདེ་སྐྱིད་འདོད་ཀྱི་ཡོད། ང་ཚོ་ཚང་མས་བདེ་སྐྱིད་ལྡན་པའི་འཛམ་གླིང་འདོད་ཀྱི་ཡོད། ངོས་རང་ཨུ་རུ་སུའི་མཐོ་སློབ་ཁག་གི་གྲོགས་པོ་ཚོ་དང་ལྷན་བགྲོ་གླེང་བྱེད་རྒྱུར་ཧ་ཅང་དགའ་པོ་ཡོད། ཅེས་བཀའ་སློབ་བསྩལ་རྗེས་སློབ་ཕྲུག་རྣམས་ཀྱི་དྲི་བ་ཁག་ལ་བཀའ་ལན་བསྩལ།ཐེངས་འདིའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ལས་རིམ་ནང་ཨུ་རུ་སུའི་མཐོ་སློབ་ལྔ་མཉམ་ཞུགས་བྱས་ཡོད་པ་དང་།  དེ་དག་ནི། མོ་སི་ཁོ་གཙུག་ལག་མཐོ་སློབ། (Moscow State University) དང་། སེན་ཌི་པི་ཊར་སི་སྦག་གཙུག་ལག་མཐོ་སློབ། (St. Petersburg State University)  ཁལ་མུག་མངའ་སྡེའི་གཙུག་ལག་མཐོ་སློབ། (Kalmyk State University) བྷུ་རི་ཡ་ཐི་གཙུག་ལག་མཐོ་སློབ། (Buryat State University) ཐུ་ཝ་གཙུག་ལག་མཐོ་སློབ། (Tuvan State University) བཅས་ཡིན།།