ཕྱི་ལོ་ ༢༠༢༡ ཟླ་ ༣ ཚེས་ ༦ རེས་གཟའ་སྤེན་པ།༄༅། །ཕྱི་ལོ་ ༢༠༢༡ ཟླ་ ༣ ཚེས་ ༦ ཉིན་གྱི་སྔ་དྲོ་ཆུ་ཚོད་ ༧ ཙམ་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་རྡ་སར་རྟེན་གཞི་བྱས་པའི་གཞུང་གི་སྨན་ཁང་ (Zonal Hospital) དུ་ཆིབས་སྒྱུར་བསྐྱངས་ཏེ་ཏོག་དབྱིབས་གཉན་རིམས་སྔོན་འགོག་སྨན་ཁབ་རིམ་པ་དང་པོ་དེ་བཞེས་གནང་མཛད་ཡོད།

དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྡ་སའི་ཛོ་ནལ་སྨན་ཁང་དུ་ཏོག་དབྱིབས་གཉན་རིམས་སྔོན་འགོག་སྨན་ཁབ་བརྒྱག་དགོས་པའི་གལ་གནད་དང་འབྲེལ་བའི་སྐོར་བཀའ་སློབ་སྩལ་དོན། ངོས་ཀྱི་ཡིད་ཆེས་བློ་ཐུབ་ཀྱི་གྲོགས་པོ་དང་སྨན་པས་ཏོག་དབྱིབས་གཉན་རིམས་སྔོན་འགོག་སྨན་ཁབ་འདི་ངེས་པར་དུ་བརྒྱག་དགོས་པའི་དགོངས་ཚུལ་གསུངས་བྱུང་།

ཛ་དྲག་གི་ནད་ཡམས་སྔོན་འགོག་སླད་ཏོག་དབྱིབས་གཉན་རིམས་ཀྱི་སྨན་ཁབ་འདི་ཧ་ཅང་ཕན་ཐོགས་ཆེན་པོ་ཡོད་དང་ཡག་པོ་རེད། དེ་བཞིན་ནད་པ་གཞན་ཚོས་ཀྱང་སྤྱི་ཡོངས་ཀྱི་ཁེ་ཕན་ཆེན་པོའི་དོན་དུ་ཏོག་དབྱིབས་གཉན་རིམས་སྔོན་འགོག་སྨན་ཁབ་དེ་ངེས་པར་རྒྱག་རོགས་གནང་། ཧ་ཅང་གལ་ཆེན་པོ་རེད། དེར་བརྟེན་ངོས་ཀྱིས་ཏོག་དབྱིབས་གཉན་རིམས་ཀྱི་སྨན་ཁབ་བརྒྱབ་པ་ཡིན། ངོས་ཀྱིས་མི་གང་མང་མང་གིས་སྔོན་འགོག་སྨན་ཁབ་འདི་བརྒྱག་པར་བློ་སྟོབས་བསྐྱེད་དགོས་པའི་བསམ་ཚུལ་ཞུ་འདོད་བྱུང་། ཞེས་བཀའ་སློབ་སྩལ།།