ཕྱི་ལོ་ ༢༠༢༡ ཟླ་ ༡ ཚེས་ ༡༢ རེས་གཟའ་པ་སངས།
༄༅། །སུད་སིའི་གྲོང་ཁྱེར་ཇི་ནི་ཝར་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༦ པའི་ཐོག་སུད་སིའི་སྐུ་ཚབ་དོན་གཅོད་ཁང་གི་ལས་བྱེད་འཕྲིན་ལས་ཆོས་སྐྱིད་ལགས་ཀྱིས་བགྲོ་གླེང་གི་དོན་ཚན་ཨང་གསུམ་པའི་འོག་རྒྱ་གཞུང་གི་ཉེན་རྟོག་པས་རང་ལོ་ ༡༩ ཡིན་པའི་རྫ་དབོན་པོ་དགོན་པའི་དགེ་འདུན་པ་བསྟན་འཛིན་ཉི་མའམ་རྟ་མེ་ལགས་དང་བོད་མདོ་ཁམས་ནག་ཆུ་འབྲི་རུ་རྫོང་ཆགས་རྩེ་ཤང་གྲོང་ཚོ་ལྔ་པ་ནས་ཡིན་པའི་སྣེ་ཤན་པ་དཀོན་མཆོག་སྦྱིན་པ་ལགས་རྣམ་གཉིས་ལ་རྡུང་རྡེག་མནར་གཅོད་ཚད་ལས་བརྒལ་བ་བཏང་སྟེ་འདས་གྲོངས་སུ་གྱུར་བའི་སྐོར་གླེང་སློང་གནང་ཡོད། སྐབས་དེར་རྒྱལ་ཚོགས་ཀྱི་དམིགས་བསལ་གསར་འགོད་པ་ནི་ལི་སི་མེལ་ཛར་(Nils Melzer) ལགས་ཀྱིས་བགྲོ་གླེང་གི་དོན་ཚན་ཨང་གསུམ་པའི་འོག་མནར་སྤྱོད་དང་། ཉེས་ཆད། མི་སྤྱོད་ལས་འདས་པའི་སྐོར་སྙན་ཐོ་སྙན་སྒྲོན་གནང་ཡོད།
དེ་ཡང་འཕྲིན་ལས་ཆོས་སྐྱིད་ལགས་ཀྱིས། ཕྱི་ལོ་ ༢༠༡༩ ཟླ་ ༡༡ ནང་རང་ལོ་ ༡༩ ཡིན་པའི་རྫ་དབོན་པོ་དགོན་པའི་དགེ་འདུན་པ་བསྟན་འཛིན་ཉི་མའམ་རྟ་མེ་ལགས་ཀྱིས་བོད་རང་བཙན་གྱི་སྦྱར་ཡིག་འགྲེམས་སྤེལ་བྱས་པར་བརྟེན་རྒྱ་ནག་གཞུང་གི་ཉེན་རྟོག་པས་ཁོང་འཛིན་བཟུང་གིས་རྡུང་རྡེག་མནར་གཅོད་ཚད་ལས་བརྒལ་བ་བཏང་བའི་རྐྱེན་གྱིས་ཕྱི་ལོ་ ༢༠༢༡ ཟླ་ ༡ ཚེས་ ༡༩ ཉིན་འདས་གྲོངས་སུ་གྱུར་བའི་སྐོར་དང་། དེ་བཞིན་བོད་མདོ་ཁམས་ནག་ཆུ་འབྲི་རུ་རྫོང་ཆགས་རྩེ་ཤང་གྲོང་ཚོ་ལྔ་པ་ནས་ཡིན་པའི་དཀོན་མཆོག་སྦྱིན་པ་ལགས་ཀྱིས་གསང་བ་ཕྱིར་བསྒྲགས་བྱས་པའི་ཉེས་མིང་འོག་རྒྱ་ནག་གཞུང་གི་ཉེན་རྟོག་པས་ཁོང་འཛིན་བཟུང་བྱས་ཏེ་ལོ་ཉི་ཤུ་རྩ་གཅིག་རིང་ཁྲིམས་ཐག་བཅད་པ་མ་ཟད། བཙོན་ཁང་དུ་རྡུང་རྡེག་མནར་གཅོད་ཚད་ལས་བརྒལ་བ་བཏང་བའི་རྐྱེན་གྱིས་ཕྱི་ལོ་ ༢༠༢༡ ཟླ་ ༢ ཚེས་ ༦ ཉིན་ཁོང་འདས་གྲོངས་སུ་གྱུར་ཡོད་པ་སོགས་སྐོར་གླེང་སློང་ཤུགས་ཆེ་གནང་ཡོད།
གཞན་ཡང་འཕྲིན་ལས་ཆོས་སྐྱིད་ལགས་ཀྱིས། རྒྱལ་ཚོགས་ཀྱི་དམིགས་བསལ་གསར་འགོད་པ་དང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་ལ་རྒྱ་ནག་གཞུང་གིས་མནར་སྤྱོད་མཚམས་འཇོག་དང་། མནར་སྤྱོད་འོག་བོད་མི་འདས་གྲོངས་སུ་གྱུར་བ་དེ་དག་གི་འགན་རྒྱ་ནག་ལ་འཁུར་འཇུག་དགོས་པའི་འབོད་སྐུལ་ཞུས་ཡོད། །
