ཕྱི་ལོ་ ༢༠༢༡ ཟླ་ ༣ ཚེས་ ༤ རེས་གཟའ་ཕུར་བུ།
༄༅། །སུད་སིའི་གྲོང་ཁྱེར་ཇི་ནི་ཝར་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་འདུ་ཐེངས་ ༤༦ དེ་བཞིན་ཕྱི་ལོ་ ༢༠༢༡ ཟླ་ ༢ ཚེས་ ༢༢ ནས་ཟླ་ ༣ ཚེས་ ༢༣ བར་འཚོག་བཞིན་ཡོད་པ་དང་བསྟུན། སུད་སིའི་སྐུ་ཚབ་དོན་གཅོད་ཁང་གིས་དྲ་རྒྱ་བརྒྱུད་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་ཟུར་ཚོགས་ཤིག་ཚོགས་གནང་ཡོད།
དེ་ཡང་སུད་སིའི་དོན་ཁང་གི་ལས་བྱེད་སྐལ་ལྡན་མཚོ་མོ་ལགས་ཀྱིས་བགྲོ་གླེང་གཙོ་སྐྱོང་གནང་ཡོད་པ་དང་། བོད་དང་ཤར་ཏུར་ཀི་སི་ཐན་སྐོར་ཉམས་ཞིབ་གནང་མཁན་ཨེ་ཌི་རི་ཨན་ཛན་ཛི་ (Adrian Zenz) ལགས་དང་། བོད་དོན་སྐོར་ཆེད་མཁས་པ་དང་རྩོམ་པ་པོ་ཀེ་ཊེ་སོན་ཌར་སི་ (Kate Saunders) ལགས། སུད་སིའི་དོན་ཁང་གི་ལས་བྱེད་འཕྲིན་ལས་ཆོས་སྐྱིད་ལགས་བཅས་ཀྱིས་བོད་ནང་གི་འགྲོ་བ་མིའི་ཐོབ་ཐང་སྐོར་གསུང་བཤད་གནང་ཡོད།
བགྲོ་གླེང་ལས་རིམ་ཐོག་བོད་དང་ཤར་ཏུར་ཀི་སི་ཐན་སྐོར་ཉམས་ཞིབ་གནང་མཁན་ཨེ་ཌི་རི་ཨན་ཛན་ཛི་ (Adrian Zenz) ལགས་ཀྱིས་རྒྱ་ནག་གཞུང་ནས་བོད་མིའི་ངོ་བོ་དང་རིག་གཞུང་། ཆོས་ཕྱོགས་ཀྱི་བྱེད་སྒོ་ཁག་རྩ་མེད་གཏོང་རྒྱུར་དམིགས་པའི་སྲིད་བྱུས་ལག་བསྟར་དང་འཆར་གཞི་འདིང་ཕྱོགས་ཁག་གསལ་འདོན་གནང་ཡོད་པ་མ་ཟད། རྒྱ་ནག་གཞུང་ནས་བོད་ཀྱི་ཞིང་འབྲོག་མི་མང་རྣམས་ལ་དམག་གི་སྦྱོང་བརྡར་ལྟ་བུ་སྤྲོད་བཞིན་པ་དེ་དག་ནི་ངལ་རྩོལ་བསྒྱུར་བཀོད་དང་ཁྱད་པར་གང་ཡང་མེད་སྐོར་གསུངས་པ་དང་། བོད་རང་སྐྱོང་ལྗོངས་ཟེར་བའི་ཁོངས་གཏོགས་ཆབ་མདོ་ས་ཁུལ་དུ་ཉམས་ཞིབ་གནང་སྐབས། རྒྱ་ནག་གཞུང་ནས་ལྟ་བ་དང་བསམ་བློ་བཅོས་སྒྱུར་ཟེར་བའི་མིང་ཐོག་ནས་བོད་མི་དེ་དག་ལ་དམར་ཤོག་ཚོགས་པའི་ཁྲིམས་སྒྲིག་བརྩི་སྲུང་དང་། རྒྱ་སྐད་དང་རྒྱ་ཡིག་སྦྱོང་བཅུག་པ་དེ་དག་དམག་སྦྱོང་ལྟ་བུ་བྱེད་དུ་བཅུག་གི་ཡོད་སྐོར་འགྲེལ་བརྗོད་གནང་ཡོད།
དེ་བཞིན་རྩོམ་པ་པོ་ཀེ་ཊེ་སོན་ཌར་སི་ལགས་ཀྱིས་ཉེ་དུས་རྒྱ་ནག་གཞུང་གི་གནས་ཚུལ་ཕྱིར་བསྒྲགས་བྱས་པའི་ཉེས་མིང་འོག་ལོ་ངོ་ ༢༡ རིང་བཙོན་འཇུག་ཁྲིམས་ཐག་བཅད་པའི་བོད་མི་དཀོན་མཆོག་སྦྱིན་པ་ལགས་བཙོན་འཇུག་དུས་ཡུན་རིང་རྡུག་རྡེག་མནར་གཅོད་རྐྱེན་པས་འདས་གྲོངས་སུ་གྱུར་ཡོད་པའི་སྐོར་གསུངས་པ་དང་འབྲེལ་དཀོན་མཆོག་སྦྱིན་པ་ལགས་ཀྱི་གནད་དོན་ལས་རྒྱ་ནག་གཞུང་གིས་བོད་ནང་གི་གནས་ཚུལ་ཕྱིར་བསྒྲགས་ཐོག་དམ་བསྒྲགས་ཇི་ཙམ་བྱེད་ཀྱི་ཡོད་པ་གསལ་པོ་མངོན་ཐུབ་ཅེས་གསུངས་པ་དང་། གཞན་ཡང་ཁོང་གིས་རྒྱ་ནག་གཞུང་ནས་འབྲོག་ས་བཙན་འཕྲོག་གི་གནད་དོན་སྐོར་ཡང་གསལ་འདོན་གནང་ཡོད།
ཉེ་དུས་རྒྱ་ནག་གཞུང་གིས་བོད་ནི་རྒྱ་ནག་ནང་གི་འགྲོ་བ་མིའི་ཐོབ་ཐང་གནས་སྟངས་ཡར་རྒྱས་ཕྱིན་ཡོད་པའི་དཔེ་མཚོན་གསལ་ཤོས་དེ་ཡིན་སྐོར་འགྲེལ་བརྗོད་བྱས་ཡོད་པའི་ཐད། འཕྲིན་ལས་ཆོས་སྐྱིད་ལགས་ཀྱིས་རྒྱ་གཞུང་ནས་བཤད་པའི་བོད་ནང་གི་ཡར་རྒྱས་ཟེར་བ་དེ་དག་ནི་བོད་ནང་གཉའ་གནོན་དང་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བའི་བྱུས་ངན་གསར་པ་ཞིག་ཡིན་སྐོར་སོགས་གསུངས་ཏེ་བོད་ནང་གི་འགྲོ་བ་མིའི་ཐོབ་ཐང་གནས་སྟངས་དངོས་འབྲེལ་གང་ཡིན་པ་གསལ་འདོན་གནང་ཡོད་པ་བཅས། །
