ཕྱི་ལོ་ ༢༠༢༡ ཟླ་ ༣ ཚེས་ ༡༧ རེས་གཟའ་ལྷག་པ། ༄༅། །ཕྱི་ལོ་ ༢༠༢༡ ཟླ་ ༣ ཚེས་ ༡༥ ཉིན་སུད་སིའི་དཔྱིད་ཀའི་གྲོས་ཚོགས་འཚོགས་བཞིན་པའི་སྐབས་སུད་སིའི་གྲོས་ཚོགས་གོང་མའི་ (The National Council of Switzerland) ནང་གྲོས་ཚོགས་འཐུས་མི་གྲངས་ ༡༣༤ ནས་ཆེས་མཐོའི་མང་མོས་ཐོག་དགོས་འདུན་ཨང་ ༢༠་༤༣༣ (postulate 20.4333) ཞེས་པ་ཞིག་སུད་སིའི་གཞུང་ལ་སུད་སིའི་ནང་གི་བོད་མིའི་གནས་སྟངས་དང་ལྷག་པར་རྒྱ་ནག་གཞུང་གིས་སྨྲ་བརྗོད་རང་དབང་ཐོག་དམ་བསྒྲགས་དང་སོ་ལྟ་བྱེད་བཞིན་པའི་སྐོར་སྙན་ཐོ་གནང་དགོས་པའི་དགོས་འདུན་བཏོན་གནང་འདུག

སྐབས་དེར་གྲོས་ཚོགས་འཐུས་མི་གྲངས་ ༤༨ ཀྱིས་དགག་པ་བསྐྱོན་གནང་བ་དང་། གྲོས་ཚོགས་འཐུས་མི་གྲངས་ལྔ་ཚོགས་བཅར་གནང་ཐུབ་མེད།  དེ་བཞིན་ཕྱི་ལོ་ ༢༠༢༡ ཟླ་ ༣ ཚེས་ ༩ ཉིན་སུད་སིའི་གྲོས་ཚོགས་གོང་མས་དགོས་འདུན་ཨང་༢༠་༤༣༣༤ (postulate 20.4334) ཞེས་པ་སུད་སིའི་གཞུང་གིས་རྒྱ་ནག་དང་ལྷན་འགྲོ་བ་མིའི་ཐོབ་ཐང་གི་གནས་སྟངས་དང་ལག་བསྟར་སྐོར་གྲོས་མོལ་གནང་བའི་སྐོར་དང་། དེ་བཞིན་སུད་སིའི་གཞུང་གིས་འབྱུང་འགྱུར་གྲོས་མོལ་བརྒྱུད་རིམ་ཐོག་འཆར་གཞི་བཅས་ཀྱི་སྐོར་སྙན་ཐོ་གནང་དགོས་པའི་དགོས་འདུན་བཏོན་གནང་ཡོད།སུད་སིའི་གྲོས་ཚོགས་འཐུས་མི་སྐུ་ཞབས་རོ་ལན་ཌི་ཧྥི་ཆར་(Roland Fischer) མཆོག་གིས་སུད་སིའི་གྲོས་ཚོགས་གོང་མས་དགོས་འདུན་བཏོན་གནང་བར་རྒྱབ་སྐྱོར་དང་སྦྲགས་གསུང་དོན། རྒྱ་ནག་གི་གཙོ་འཛིན་མའོ་ཙེ་ཏུང་གིས་རྒྱ་ནག་མི་དམངས་སྤྱི་མཐུན་རྒྱལ་ཁབ་དབུ་བརྙེས་པའི་གསལ་བསྒྲགས་བྱས་ཏེ་ལོ་གཅིག་གི་རྗེས་རྒྱ་ནག་མི་དམངས་བཅིངས་གྲོལ་དམག་གྲངས་ ༤༠༠༠༠ ལྷག་བོད་ཀྱི་ཤར་ཕྱོགས་སུ་བཙན་འཛུལ་བྱས་ཡོད། ཕྱི་ལོ་ ༡༩༥༩ ལོར་བོད་ནང་གི་བོད་མི་ཚོས་རྒྱ་ནག་གི་དབང་སྒྱུར་ལ་ངོ་རྒོལ་གྱིས་རང་དབང་སྒེར་ལངས་བྱས་རྗེས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་བོད་མི་བརྒྱད་ཁྲི་ལྷག་རྒྱ་གར་ལ་བཙན་བྱོལ་དུ་ཕེབས་དགོས་བྱུང་ཡོད། རྒྱ་ནག་གིས་བོད་དབང་སྒྱུར་བྱས་པ་ནས་བཟུང་ད་བར་མུ་མཐུད་བོད་ནང་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པ་སོགས་ཀྱི་སྐོར་གསུངས་ཡོད།སུད་སིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཟུང་སྦྲེལ་ཚོགས་གཙོ་དང་གྲོས་ཚོགས་འཐུས་མི་སྐུ་ཞབས་ནི་ཀོ་ལ་སི་ (Nicolas Walder) མཆོག་གིས། རྒྱ་ནག་གི་འགོ་ཁྲིད་རྣམས་ཀྱིས་སོ་ལྟ་དང་འཇིགས་སྐུལ་ཤུགས་ཆེ་རུ་བཏང་བར་བརྟེན་སུད་སིའི་ནང་ཡོད་པའི་བོད་མི་ཚོས་སོ་སོའི་བདེ་འཇགས་ལ་ཐུགས་འཚབ་གནང་བཞིན་ཡོད་པ་དང་། སུད་སིའི་ནང་ཡོད་པའི་བོད་མི་རྣམས་ཀྱི་རང་དབང་དང་བདེ་འཇགས་སུད་སིའི་ཡུལ་མི་ཚོ་དང་གཅིག་མཚུངས་ལྟར་སྲུང་སྐྱོབ་བྱེད་རྒྱུའི་འགན་ང་ཚོར་ཡོད། ཅེས་སོགས་གསུངས།

སུད་སིའི་ཁྲིམས་དང་བདེ་སྲུང་ལྷན་ཁང་གི་འགན་འཛིན་ལྕམ་སྐུ་ཀ་རིན་ཀེ་ལེར་ (Karin Keller-Sutter) ལགས་ཀྱིས། སུད་སིའི་གཞུང་གིས་སྐྱབས་བཅོལ་ཞུ་མཁན་བོད་མི་རྣམས་ཀྱི་སྐོར་སྙན་ཐོ་རྒྱས་པ་ཞིག་གནང་རྒྱུ་ཡིན་པའི་སྐོར་གསུངས་ཡོད། སུད་སིའི་ཕྱི་སྲིད་ལྷན་ཁང་གི་གཙོ་འཛིན་ཨིག་ན་ཛིའོ་ཁེ་སི་སི་(Ignazio Cassis) ལགས་ཀྱིས་སུད་སིའི་གཞུང་གི་ཚབ་ཞུས་ཏེ་གྲོས་ཚོགས་གོང་མའི་དགོས་འདུན་ལ་རྒྱབ་སྐྱོར་མོས་མཐུན་གནང་བ་དང་སྦྲགས་ཉེ་བའི་ཆར་རྒྱ་ནག་ནང་འགྲོ་བ་མིའི་ཐོབ་ཐང་གི་སྤྱིའི་གནས་སྟངས་སྡུག་ཏུ་འགྲོ་བཞིན་ཡོད་པའི་སྐོར་གསུངས་ཡོད།

སུད་སིའི་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས། སུད་སིའི་གྲོས་ཚོགས་གོང་མས་དགོས་འདུན་བཏོན་གནང་བར་ཐུགས་རྗེ་ཆེ་ཞུས་ཡོད་པ་མ་ཟད། སུད་སིའི་གྲོས་ཚོགས་བོད་དོན་རྒྱབ་སྐྱོར་ཚོགས་པ་དང་སུད་བོད་མཛའ་འབྲེལ་ཚོགས་པ་སོགས་ནས་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཡོད།།