ཕྱི་ལོ་ ༢༠༢༡ ཟླ་ ༣ ཚེས་ ༡༥ རེས་གཟའ་ཟླ་བ།

༄༅། །ཕྱི་ལོ་ ༢༠༢༡ ཟླ་ ༣ ཚེས་ ༡༢ ཉིན་ཤི་ལོངྒ་ཁུལ་གྱི་བོད་མི་རྣམས་ཀྱིས་བོད་དགོན་དགའ་ལྡན་ཆོས་གླིང་དུ་བོད་ཀྱི་བུད་མེད་སྒེར་ལངས་ཉིན་མོ་ཐེངས་ ༦༢ དང་གཞུང་འབྲེལ་བོད་ཀྱི་བུད་མེད་ཉིན་མོ་སྲུང་བརྩི་གཟབ་རྒྱས་ཞུས་ཡོད།

དེ་ཡང་ཤི་ལོངྒ་ས་གནས་བོད་མི་རྣམས་བོད་དགོན་དགའ་ལྡན་ཆོས་གླིང་དུ་འདུ་འཛོམས་གནང་སྟེ་བོད་ཀྱི་བུད་མེད་རང་དབང་སྒེར་ལངས་ཉིན་མོ་ཐེངས་ ༦༢ སྲུང་བརྩི་ཐོག་བོད་ཀྱི་དཔའ་མོ་རྣམས་ཀྱི་སེམས་ཤུགས་དང་སྙིིང་སྟོབས་ལ་ཆེ་བསྟོད་གནང་ཡོད། མཛད་སྒོའི་ཐོག་མར་དགེ་འདུན་པ་དང་མི་མང་རྣམས་ཀྱིས་སྤྱིི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་ཡུན་རིང་བརྟན་པ་དང་། བོད་བསྟན་སྲིད་མི་རིགས་ཀྱི་ཆེད་ཚེ་སྲོག་ཤོར་བའི་རྒྱལ་གཅེས་པ་རྣམས་ཀྱི་ཆེད་སྨོན་ལམ་གསུང་འདོན་གནང་གྲུབ་མཚམས་ས་གནས་བོད་ཀྱི་བུད་མེད་ལྷན་ཚོགས་ཀྱི་དྲུང་ཆེ་དང་དངུལ་གཉེར་རྣམ་གཉིས་ཀྱིས་དབུས་བོད་ཀྱི་བུད་མེད་ལྷན་ཚོགས་ཀྱི་གསུང་འཕྲིན་སྒྲོགས་སྦྱང་གནང་ཡོད། དེ་རྗེས་ས་གནས་འགོ་འཛིན་པདྨ་དོན་གྲུབ་ལགས་ཀྱིས་མི་མང་ལ་གསུང་བཤད་གནང་།དེ་བཞིན་མཛད་སྒོའི་ཐོག་བུད་མེད་ནུས་སྟོབས་གོང་འཕེལ་ལས་རིམ་གྱི་ཆ་ཤས་སུ་བསྟན་འཛིན་པདྨ་ལགས་ཀྱིས་འཛིན་རིམ་བཅུ་གཉིས་ཀྱི་ཡིག་རྒྱུགས་ཁྲོད་གྲུབ་འབྲས་རྩེ་ཕུད་སོན་པར་བྱ་དགའ་གནང་ཡོད། མཛད་སྒོ་གྲུབ་རྗེས་ས་གནས་འགོ་འཛིན་གྱིས་བུད་མེད་ནུས་སྟོབས་གོང་འཕེལ་གྱི་ལས་རིམ་དང་འབྲེལ་བའི་ས་གནས་གནད་ཡོད་མི་སྣ་ཁག་དང་ཚོགས་འདུ་ཚོགས་གནང་ཡོད་པ་བཅས།།