ཕྱི་ལོ་ ༢༠༢༡ ཟླ་ ༣ ཚེས་ ༡༦ རེས་གཟའ་མིག་དམར། ༄༅། །ཕྱི་ལོ་ ༢༠༢༡ ཟླ་ ༣ ཚེས་ ༡༠ ཉིན་སུད་སི་སྐུ་ཚབ་དོན་གཅོད་ཁང་གི་ཁྱབ་ཁོངས་སུད་སི་དང་། འཇར་མན་ནི། ཅེག་སྤྱི་མཐུན་རྒྱལ་ཁབ། ཨོ་སི་ཀྲི་རི་ཡ། ཨི་ཌ་ལི། སོ་ལོ་ཝ་ཀི་ཡ། ཧང་གྷ་རི་བཅས་རྒྱལ་ཁབ་བདུན་གྱི་བསྟི་གནས་ཁང་གྲངས་ ༡༤༣༤ ལྷག་གིས་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༢ ཉིན་མོར་བོད་ཀྱི་རྒྱལ་དར་སྒྲེང་འཛུགས་གནང་སྟེ་བོད་པའི་འཚེ་མེད་ཞི་བའི་འཐབ་རྩོད་ལ་གདུང་སེམས་མཉམ་སྐྱེ་དང་རྒྱབ་སྐྱོར་ཤུགས་ཆེ་གནང་ཡོད།

དེ་ཡང་སུད་སིའི་གྲོང་ཁྱེར་ཨར་གོ་ ( Aargau) དང་། བྷ་སེལ། ( Basel) ཇི་ནི་ཝ། སན་ཊི་ག་ལེན། (St. Gallen) ཐུར་གོ། (Thurgau) ཝོ་ཌི། (Vaud) ཛུ་རིག་བཅས་ཀྱིས་གྲོང་སྡེ་སྤྱི་ཁྱབ་ལྷན་ཁང་དང་གྲོང་སྡེའི་ཚོགས་ཁང་དུ་བོད་མིར་གདུང་སེམས་མཉམ་སྐྱེའི་ཆེད་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༢ ཐོག་བོད་ཀྱི་རྒྱལ་དར་སྒྲེང་འཛུགས་ནང་ཡོད་པ་མ་ཟད། བྷར་ཌོན་ནེ་ཀི་སི་ (Bardonnex) གྲོང་སྡེ་སྤྱི་ཁྱབ་ལྷན་ཁང་གིས་ཕྱི་ཟླ་གསུམ་པ་ཧྲིལ་པོར་བོད་ཀྱི་རྒྱལ་དར་སྒྲེང་འཛུགས་དང་། བྷེར་ནེ་ཀི་སི་(Bernex) གྲོང་སྡེ་སྤྱི་ཁྱབ་ལས་ཁང་གིས་བོད་མིའི་རང་དབང་སྒེར་ལངས་ཉིན་བདུན་ཕྲག་ཧྲིལ་པོར་བོད་ཀྱི་རྒྱལ་དར་སྒྲེང་འཛུགས་གནང་ཡོད། གཞན་ཡང་སུད་སིའི་ནང་ཡོད་པའི་ཡུ་རོབ་ཁུལ་གྱི་མཁར་རྫོང་ཆེས་སྔ་ཤོས་ཀྱི་གྲས་ཧ་བྷ་སི་བྷག་ (Habsburg Castle) ཐོག་ཏུ་བོད་ཀྱི་རྒྱལ་དར་ཆེན་པོ་ཞིག་སྒྲེང་འཛུགས་གནང་ཡོད།དེ་བཞིན་ཇར་མན་ནིའི་རྫོང་དང་། གྲོང་ཁྱེར། གྲོང་སྡེ་སྤྱི་ཁྱབ་ལས་ཁུངས་བཅས་གྲངས་ ༤༠༠ ལྷག་གིས་བོད་པའི་རང་དབང་དང་བདེན་པའི་འཐབ་རྩོད་ལ་གདུང་སེམས་མཉམ་སྐྱེ་དང་རྒྱབ་སྐྱོར་གྱི་ཆེད་བོད་མིའི་རང་དབང་སྒེར་ལངས་ཉིན་མོར་བོད་ཀྱི་རྒྱལ་དར་སྒྲེང་འཛུགས་གནང་ཡོད།  ཅེག་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མའི་ཚོགས་གཞོན་གྱིས་གྲོས་ཚོགས་ཁང་གི་ཐོག་ཏུ་ལོ་རྒྱུས་རང་བཞིན་ལྡན་པའི་བོད་ཀྱི་རྒྱལ་དར་ཐེངས་དང་པོ་སྒྲེང་འཛུགས་གནང་ཡོད་པ་མ་ཟད། གྲོས་ཚོགས་གོང་མའི་ཚོགས་གཙོ་མཆོག་གིས་ལས་འགུལ་དེ་ནི་བོད་དང་བོད་མིར་རྒྱབ་སྐྱོར་མཚོན་ཆེད་ཀྱི་ལས་འགུལ་གལ་ཆེན་ཞིག་ཡིན་སྐོར་གསུངས་ཡོད། གཞན་ཡང་ཅེག་སྤྱི་མཐུན་རྒྱལ་ཁབ་ཀྱི་གྲོང་སྡེ་སྤྱི་ཁྱབ་ལྷན་ཁང་དང་། གྲོང་སྡེ་ཚོགས་ཁང་། ཤེས་ཡོན་བསྟི་གནས་བཅས་གྲངས་ ༩༤༦ ལྷག་གིས་བོད་ཀྱི་རྒྱལ་དར་སྒྲེང་འཛུགས་གནང་ཡོད།ཨོ་སི་ཊི་རི་ཡའི་བོད་དོན་རྒྱབ་སྐྱོར་བ་རྣམས་ནས་ཨོ་སི་ཊི་ཡའི་གྲོང་སྡེ་ཀུ་ཕི་སི་ཊིན་ (Kufstein) དང་། ལིན་ཛི། (Linz) ཊེ་རོལ། (Tyrol) ཨིན་སི་བྷི་རག (Innsbruck) བཅས་ཀྱི་ཚོགས་ཁང་དུ་བོད་ཀྱི་རྒྱལ་དེར་སྒྲེང་འཛུགས་གནང་ཡོད། དེ་བཞིན་ཨི་ཌ་ལིའི་མངའ་ཁུལ་ཝེ་རེ་སེ་ (Verese) དང་། པེཌ་མོནྜ་ས་གནས་རང་སྐྱོང་ལྷན་ཁང་ (Council of Piemonte) གི་ཚོགས་ཁང་བཅས་སུ་བོད་ཀྱི་རྒྱལ་དར་སྒྲེང་འཛུགས་གནང་ཡོད་པ་མ་ཟད། ཨུམ་བྷི་རི་ཡ་ (Umbria) མངའ་ཁུལ་གྱི་གཙོ་འཛིན་སྐུ་ཞབས་མར་ཀོ་ (Marco Squarta) མཆོག་གིས་བོད་མིའི་འཚེ་མེད་ཞི་བའི་འཐབ་རྩོད་ལ་རྒྱབ་སྐྱོར་ཡོད། ཅེས་དང་།  རྒྱ་ནག་གཞུང་གིས་བོད་ནང་དྲགས་གནོན་བྱེད་བཞིན་པར་ངོ་རྒོལ་ཤུགས་ཆེ་གནང་ཡོད།སུད་སི་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས་གྲོང་སྡེ་སྤྱི་ཁྱབ་ལས་ཁང་དང་གྲོང་སྡེ་ཚོགས་ཁང་བཅས་ནས་བོད་དང་བོད་མིར་གདུང་སེམས་མཉམ་སྐྱེ་དང་རྒྱབ་སྐྱོར་མཚོན་ཆེད་བོད་མིའི་རང་དབང་སྒེར་ལངས་ཉིན་མོར་བོད་ཀྱི་རྒྱལ་དར་སྒྲེང་འཛུགས་གནང་བར་ཐུགས་རྗེ་ཆེ་ཞུས་པ་དང་འབྲེལ། བོད་དོན་རྒྱབ་སྐྱོར་ཚོགས་པ་དང་བོད་རིགས་སྤྱི་མཐུན་ཚོགས་པ་སོགས་ལ་ད་ལན་བོད་ཀྱི་རྒྱལ་དར་རྒྱལ་ཁའི་ངང་སྒྲེང་འཛུགས་གནང་ཐུབ་པར་ཐུགས་རྗེ་ཆེ་ཞུས་ཡོད་པ་བཅས། །