ཕྱི་ལོ་ ༢༠༢༡ ཟླ་ ༣ ཚེས་ ༡༡ རེས་གཟའ་ཕུར་བུ།
༄༅། བོད་རང་དབང་སྒེར་ལངས་བྱས་ནས་མི་ལོ་ ༦༢ འཁོར་བའི་གསུམ་བཅུའི་དུས་དྲན་ཐོག་ཨ་རིའི་གྲོས་ཚོགས་འོག་མའི་ཚོགས་གཙོ་དང་མང་གཙོ་ཚོགས་པའི་དབུ་ཁྲིད་ལྕམ་སྐུ་ནེན་སི་པེ་ལོ་སི་ (Nancy Pelosi) མཆོག་གིས་བོད་དང་བོད་མིར་རྒྱབ་སྐྱོར་གྱི་བསྒྲགས་གཏམ་ཞིག་སྤེལ་བའི་ནང་འཁོད་དོན། དེ་རིང་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༢ པའི་ཐོག་ང་ཚོས་རང་དབང་གི་དོན་དུ་ཚེ་སྲོག་བློས་གཏོང་གནང་མཁན་རྒྱལ་གཅེས་པ་རྣམས་ལ་གུས་འདུད་ཞུ་རྒྱུ་ཡིན་པ་མ་ཟད། བོད་མིར་མུ་མཐུད་རྒྱབ་སྐྱོར་ཡོད། ཉིན་མོ་འདི་ནི་བོད་མི་ཚོས་རྒྱ་ནག་གི་དྲག་གནོན་ཅན་གྱི་སྲིད་བྱུས་ལས་གྲོལ་ཏེ། ཞི་བདེ་དང་རང་སྲིད་རང་སྐྱོང་། བརྟན་ལྷིང་གི་འཚོ་བར་རོལ་རྒྱུའི་མངོན་འདོད་གསལ་བར་བྱེད་པའི་ཉིན་མོ་ཞིག་ཀྱང་ཡིན།
བོད་མི་ཕོ་མོ་རྒན་གཞོན་དང་ཕྲུ་གུ་ཚུན་ཆད་རང་དབང་གི་ཐོག་ནས་ཆོས་དད་རང་དབང་དང་ཐུན་མིན་རིག་གཞུང་རྒྱུན་འཛིན་བྱེད་ཀྱི་ཡོད་སྟབས། དེར་རྒྱ་ནག་གཞུང་གིས་གདུག་རྩུབ་ཆེན་པོས་ཆོས་དད་རང་དབང་དང་ཐུན་མིན་རིག་གཞུང་རྒྱུན་འཛིན་བྱེད་རྒྱུའི་ཐོབ་ཐང་འཕྲོག་བཞིན་ཡོད་པ་དེས་ཞི་བདེར་དགའ་བའི་འཛམ་གླིང་མི་མང་ཚོར་བོད་དོན་ཐོག་རྒྱབ་སྐྱོར་ཡོང་བར་འབོད་སྐུལ་ཤུགས་ཆེ་གནང་ཡོད། དེར་བརྟེན་སྔ་ལོ་ཨ་རིའི་གཞུང་གིས་ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་ཡིག་གཏན་འབེབས་གནང་ཡོད་པ་དེས་ཨ་རིའི་གཞུང་དང་བོད་མིའི་སྒྲིག་འཛུགས་དབར་འབྲེལ་བ་དམ་ཟབ་ཡོད་པ་དང་། ཁྲིམས་ཡིག་དེའི་བརྒྱུད་༸སྐུའི་ཡང་སྲིད་དང་བླ་སྤྲུལ་ངོས་འཛིན་ཞུ་རྒྱུའི་ཐོབ་ཐང་དང་བདག་དབང་བོད་མི་ཁོ་ནར་ཡོད། ཅེས་འཁོད་ཡོད།
སྤྱི་ནོར་༸གོང་ས་༸སྐྱབས་མགོན་ཏཱ་ལའི་བླ་མ་མཆོག་གིས་ཉིན་ལྟར་ཞི་བདེ། བྱམས་སྙིང་རྗེ། ཡིད་ཆེས་སོགས་ཀྱི་སྐོར་བཀའ་སློབ་ལམ་སྟོན་སྩལ་བ་གཞིར་བཟུང་ང་ཚོས་བོད་ཀྱི་བདེན་པའི་འཐབ་རྩོད་ཐོག་མུ་མཐུད་ཤར་བསྐྱོད་བྱེད་དགོས་ཀྱི་ཡོད། གལ་སྲིད་ད་ལན་ང་ཚོས་རྒྱ་ནག་གཞུང་གི་གཞི་རྒྱ་ཆེ་བའི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏོང་བཞིན་པ་དེར་གནོན་ཤུགས་དང་གདོང་ལེན་མ་བྱེད་ཚེ་འགྲོ་བ་མིའི་བཟང་སྤྱོད་ཀྱི་རིན་ཐང་དང་ཐོབ་ཐང་དོར་གྱི་ཡོད། ཅེས་འཁོད་ཡོད། །
