ཕྱི་ལོ་ ༢༠༢༡ ཟླ་ ༣ ཚེས་ ༥ རེས་གཟའ་པ་སངས།
༄༅། །བོད་མིའི་སྒྲིག་འཛུགས་ཀྱི་དཔལ་འབྱོར་ལས་ཁུངས་ནས་དྲ་རྒྱའི་ལམ་ནས་དཔྱ་ཁྲལ་འབུལ་རྒྱུའི་དྲ་ཚིགས་ཤིག་བཟོ་སྐྲུན་ལེགས་པར་གྲུབ་ཡོད་པར་བརྟེན། བྱང་ཨ་རིར་གནས་སྡོད་བོད་མི་རྣམས་ནས་དྲ་རྒྱའི་བརྒྱུད་དྭང་བླང་དཔྱ་དངུལ་འབུལ་ཕྱོགས་དང་འབྲེལ་བའི་འགེངས་ཤོག་འདི་བཞིན་བཀང་དགོས་པའི་འབོད་སྐུལ་གནང་ཡོད།
གོང་གི་འགེངས་ཤོག་དེའི་དམིགས་ཡུལ་གཙོ་བོ་ནི། དྲྭ་ལམ་བརྒྱུད་དྭང་བླངས་དཔྱ་དངུལ་འབུལ་འདོད་ཡོད་མཁན་གྱི་གློག་འཕྲིན་ཁ་བྱང་དང་སྐྱེས་ལོ་སྐྱེས་ཚེས། དཔྱ་ཁྲལ་ལག་དེབ་ཨང་གྲངས་བཅས་ཁུངས་ལྡན་དཔྱད་ཞིབ་བྱ་རྒྱུའི་ཆེད་ཡིན་པ་དང་། དྲ་ལམ་བརྒྱུད་དཔྱ་དངུལ་འབུལ་བར་དང་ཐོག་དེབ་སྐྱེལ་བྱེད་དགོས་ཀྱི་ཡོད་པ་མ་ཟད། དེབ་སྐྱེལ་སླད་གློག་འཕྲིན་ (Gmail) ཁ་བྱང་ངེས་པར་དགོས།
དེ་རྗེས་གློག་འཕྲིན་ཁ་བྱང་བརྒྱུད་དྭང་བླངས་དཔྱ་དངུལ་འབུལ་ཕྱོགས་དང་འབྲེལ་བའི་འགེངས་ཤོག་ཅེས་པ་བཀང་དགོས། དེ་ནས་ (Chatrel.com) དང་ (Chatrel apps) ནང་འཛུལ་རྗེས་སླར་ཡང་སོ་སོའི་གློག་འཕྲིན་ཁ་བྱང་དང་སྐྱེས་ལོ་སྐྱེས་ཚེས། དཔྱ་དངུལ་ལག་དེབ་ཨང་གྲངས་བཅས་བཀང་རྗེས་ (Payment Page )ནང་དྭང་བླངས་དཔྱ་དངུལ་འབུལ་ཐུབ། ད་ཆ་དྲ་ཐོག་དྭང་བླངས་དཔྱ་དངུལ་འབུལ་རྒྱུའི་ལས་གཞི་འདི་བཞིན་ཚོད་ལྟ་ཆེད་བྱང་ཨ་རི་གཅིག་པུར་དམིགས་པ་ཞིག་ཡིན།
དེ་སྔ་ཕྱི་ལོ་ ༢༠༢༡ ཟླ་ ༡ ཚེས་ ༢༤ ཉིན་བོད་མིའི་སྒྲིག་འཛུགས་ཀྱི་དཔལ་འབྱོར་ལས་ཁུངས་དང་བྱང་ཨ་རི་བོད་ཀྱི་སྐུ་ཚབ་དོན་གཅོད་ཁང་བཅས་ཟུང་འབྲེལ་ཐོག་བྱང་ཨ་རིའི་བོད་རིགས་སྤྱི་མཐུན་ཚོགས་པ་ཁག་གི་དཔྱ་ཁྲལ་ལག་དེབ་འགན་འཛིན་དང་ཚོགས་གཙོ་རྒྱུན་ལས་རྣམས་ལ་དྲ་ཐོག་དཔྱ་ཁྲལ་འབུལ་ཕྱོགས་སྐོར་ཟབ་སྦྱོང་ངོ་སྤྲོད་དང་། དྲི་བ་དྲིས་ལན་གྱི་ལས་རིམ་ཞིག་གོ་སྒྲིག་གནང་ཡོད། སྐབས་དེར་བྱང་ཨ་རིའི་བོད་རིགས་སྤྱི་མཐུན་ཚོགས་པ་ ༣༢ དང་། སྤྱི་མཐུན་ཚོགས་པ་མེད་པའི་ས་གནས་ ༤ བཅས་ཀྱི་དཔྱ་དེབ་འགན་འཛིན་དང་། བོད་རིགས་སྤྱི་མཐུན་ཚོགས་པའི་ཚོགས་གཙོ་དང་རྒྱུན་ལས་བཅས་ཁྱོན་མི་གྲངས ༥༣ དྲ་ཐོག་མཉམ་ཞུགས་གནང་ཡོད་པ་བཅས། །
