ཕྱི་ལོ་ ༢༠༢༡ ཟླ་ ༣ ཚེས་ ༡༥ རེས་གཟའ་ཟླ་བ།
༄༅། །ཕྱི་ལོ་ ༢༠༢༡ ཟླ་ ༣ ཚེས་ ༡༠ ཉིན་ནིའུ་ཡོག་ཏུ་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་མདུན་དུ་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༢ སྲུང་བརྩི་ཞུས་ཡོད་པ་དང་། སྐབས་དེར་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་མཉམ་ཞུགས་གནང་ཡོད།
དེ་ཡང་ཉིན་དེར་བོད་མི་དང་བོད་དོན་རྒྱབ་སྐྱོར་བ་མང་པོ་ཞིག་མཉམ་འཛོམས་ཀྱི་ཐོག་མར་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་བོད་ཀྱི་རྒྱལ་དར་སྒྲེང་འཛུགས་ཀྱིས་མི་མང་ནས་བོད་དང་ཨ་རིའི་རྒྱལ་གླུ་བླངས་ཡོད།
དེ་རྗེས་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་གི་གསུང་འཕྲིན་སྒྲོགས་སྦྱང་དང་། ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པེ་ལོ་སི་ (Nancy Pelosi) མཆོག་གིས་བོད་མིར་རྒྱབ་སྐྱོར་གནང་བའི་བསྒྲགས་གཏམ་སྒྲོགས་སྦྱང་གནང་གྲུབ་མཚམས་གསུམ་བཅུའི་དུས་དྲན་གྱི་གལ་ཆེ་རང་བཞིན་སྐོར་རྒྱས་བཤད་གནང་ཡོད།དེ་བཞིན་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་མཉམ་འབྲེལ་རྒྱལ་ཚོགས་ནས་བོད་ཀྱི་གནས་སྟངས་ཐོག་དམིགས་བསལ་ཐག་གཅོད་རིགས་གནང་མེད་སྟབས། ད་ཆ་རྒྱ་ནག་དམར་ཤོག་གཞུང་ནི་གོ་ལ་ཧྲིལ་པོར་རང་དབང་དང་། མང་གཙོ། འགྲོ་བ་མིའི་ཐོབ་ཐང་བཅས་ཉེན་ཁ་བཟོ་མཁན་ཞིག་ཏུ་གྱུར་ཡོད་སྐོར་གསུངས་ཡོད་པ་མ་ཟད། རྒྱ་ནག་གི་འགོ་ཁྲིད་ཚོར་གསུང་དོན། བོད་མི་ཚོས་མི་རབས་ནས་མི་རབས་བར་བོད་ཀྱི་རང་དབང་འཐབ་རྩོད་བྱེད་རྒྱུ་རེད་ཅེས་གསུངས།
མཐའ་དོན་སྐུན་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་བྱང་ཨ་རིའི་བོད་མི་རྣམས་ལ་གོ་སྐབས་སོགས་ཡོད་སྟབས་རྒྱལ་སྤྱིའི་ཚོགས་སྡེ་ཁག་ལ་གནོན་ཤུགས་སྤྲོད་རྒྱུར་འབད་བརྩོན་བྱ་དགོས་པའི་ལམ་སྟོན་གནང་བ་མ་ཟད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འདི་ལོའི་ལོ་གསར་སྐབས་བཀའ་སློབ་སྩལ་པ་བཞིན་བོད་ཀྱི་སྐད་ཡིག་མི་ཉམས་རྒྱུན་འཛིན་གནང་དགོས་པའི་གསུང་བཤད་གནང་ཡོད།དེ་བཞིན་ནིའུ་ཡོག་བོད་རིགས་སྤྱི་མཐུན་ཚོགས་པའི་ཚོགས་གཙོ་དང་ས་གནས་ཀྱི་ཆབ་སྲིད་པ་ཀེ་རོ་ལིན་ (Caroyln) ལགས་རྣམ་གཉིས་ཀྱིས་མཛད་སྒོའི་ཐོག་གསུང་བཤད་གནང་ཡོད། ཕྱོགས་མཚུངས་ཨ་རིའི་གྲོས་ཚོགས་ཀྱི་འཐུས་མི་སྐུ་ཞབས་ཇིམ་མེག་གྷོ་ཝན་ (Jim McGovern) མཆོག་གིས་གསུམ་བཅུའི་དུས་དྲན་ཐོག་བརྙན་འཕྲིན་བརྒྱུད་གནང་བའི་གསུང་འཕྲིན་དེ་ཉིད་གཟིགས་འབུལ་ཞུས་ཡོད།
མཛད་སྒོ་གྲུབ་རྗེས་མི་མང་རྣམས་ཀྱིས་རྒྱ་ནག་གཞུང་ཚབ་བར་ཞི་བའི་གོམ་བགྲོད་ཀྱི་ལས་འགུལ་སྤེལ་ཡོད། ཉིན་དེའི་ཕྱིི་དྲོར་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་ཨ་རིའི་རྒྱལ་ས་ཝ་ཤིན་ཊོན་དུ་རྟེན་གཞི་བྱས་པའི་ཇམ་སི་ཊོན་ཉམས་ཞིབ་བསྟི་གནས་ཁང་ (Jamestown Foundation) གིས་གོ་སྒྲིག་ཞུས་པའི་མ་འོངས་པའི་བོད་ (Future of Tibet) ཞེས་པའི་བརྗོད་གཞིའི་ཐོག་དྲ་ལམ་བརྒྱུད་ཆེད་དོན་མི་སྣའི་བགྲོ་གླེང་ནང་མཉམ་ཞུགས་གནང་ཡོད།
དྲ་ཐོག་བགྲོ་གླེང་ཐོག་ཨ་རིའི་དེ་སྔའི་བོད་དོན་འབྲེལ་མཐུད་པ་སྐུ་ཞབས་རོ་བྷེར་ཊི་ཌེ་སི་ཊི་རོ་ (Robert Destro) མཆོག་དང་། བོད་དང་ཤར་ཏུར་ཀི་སི་ཐན་སྐོར་ཉམས་ཞིབ་གནང་མཁན་ཨེ་ཌི་རི་ཛན་ཛི་ (Adrian Zenz) ལགས་སོགས་མཉམ་ཞུགས་གནང་ཡོད་པ་དང་། སྐབས་དེར་ཇམ་སི་ཊོན་ཉམས་ཞིབ་བསྟི་གནས་ཁང་གི་འགན་འཛིན་སྐུ་ཞབས་ (Glen Howard) ལགས་ཀྱིས་དྲ་ཐོག་ཆེད་དོན་མི་སྣའི་བགྲོ་གླེང་གཙོ་འཛིན་གནང་ཡོད་པ་བཅས། །