ཕྱི་ལོ་ ༢༠༢༡ ཟླ་ ༣ ཚེས་ ༡༧ རེས་གཟའ་ལྷག་པ།༄༅། །ཕྱི་ལོ་ ༢༠༢༡ ཟླ་ ༣ ཚེས་ ༡༥ ཉིན་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པ་དབུ་འཛུགས་གནང་ཡོད་པ་དང་། བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་སྐབས་བཅོ་ལྔ་པའི་བཀའ་ཤག་གི་སྔོན་རྩིས་གསུང་བཤད་མཐའ་མ་དེ་གནང་ཡོད།

དེ་ཡང་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་ཕྱི་ལོ་ ༢༠༢༠ ཟླ་ ༣ ཚེས་ ༣༡ ཉིན་གྱི་ཕྱོགས་བསྡོམས་མ་དངུལ་བསྡོམས་ཧིན་སྒོར་ས་ཡ་ ༣༨༣༦་༣༠ ཐམ་པ་བྱས་པ་ཕྱི་ལོ་ ༢༠༡༩ ཟླ་ ༣ ཚེས་ ༣༡ ཉིན་གྱི་གནས་བབ་ལས་སྒོར་ས་ཡ ༢༧༤་༡༡ མང་བ་བྱུང་ཡོད།  

བོད་མིའི་སྒྲིག་འཛུགས་ཀྱི་རྩིས་ལོ་ ༢༠༢༡་་་༢༠༢༢ ལོའི་ལས་ཁུངས་མ་ལག་དང་བཅས་པའི་འགྲོ་གྲོན་ཚོད་དཔག་ཕྱོགས་བསྡོམས་རྒྱབ་གཉེར་སྒོར་ས་ཡ་ ༢༦༩༩་༠༡ ནས་ཁྲིམས་བཟོ་དང་འབྲེལ་བའི་འགྲོ་གྲོན་སྒོར་ས་ཡ་ ༦༢་༢༡ དང་། ཆབ་སྲིད་དང་འབྲེལ་བའི་འགྲོ་གྲོན་སྒོར་ས་ཡ་ ༦༣༧་༧༨། འཛིན་སྐྱོང་དང་འབྲེལ་བའི་འགྲོ་གྲོན་སྒོར་ས་ཡ་ ༥༩༡་༠༢། ཤེས་ཡོན་དང་འབྲེལ་བའི་འགྲོ་གྲོན་སྒོར་ས་ཡ་ ༦༠༢་༣༣། འཕྲོད་བསྟེན་དང་འབྲེལ་བའི་འགྲོ་གྲོན་སྒོར་ས་ཡ་ ༢༣༥་༤༡། ཆོས་རིག་དང་འབྲེལ་བའི་འགྲོ་གྲོན་སྒོར་ས་ཡ་ ༦༠་༥༧། སྤྱི་ཚོགས་དང་འབྲེལ་བའི་འགྲོ་གྲོན་སྒོར་ས་ཡ་ ༥༠༦་༩༩ བཅས་རྒྱབ་གཉེར་ཞུས་གནང་ཡོད།

བཀའ་ཤག་སྐབས་བཅུ་བཞི་པ་དང་བཅོ་ལྔ་པས་ཐོག་མ་རྩིས་བཞེས་སྐབས་དང་། ད་ལྟ་འགྲོ་བཞིན་པའི་རྩིས་ལོའི་ཕྱི་ལོ་ ༢༠༢༠ ཟླ་ ༡༢ ཚེས་ ༣༡ བར་གྱི་སྔོན་རྩིས་མ་དངུལ་དང་། གཏན་འཇགས་མ་དངུལ། ཟུར་བཀོལ་བཅས་ཀྱི་འཕར་འབབ་གནས་སྟངས་ནི།

གོང་གསལ་ཕྱོགས་བསྡོམས་ཀྱི་ཐོག་ལ་བོད་མིའི་སྒྲིག་འཛུགས་ཀྱི་ཁེ་ཡོད་ཚོགས་པ་གངས་ལྗོངས་དཔལ་འབྱོར་ཞབས་ཞུ་ཁང་གི་བུན་གཏོང་ལས་གཞིའི་ཆེད་ཕྱི་ལོ་ ༢༠༢༠ ཟླ་ ༡༢ ཚེས་ ༣༡ བར་སྒོར་ས་ཡ་ ༣༠༠་༡༤ ཐམ་པ་ཡོད།

ཕྱི་ལོ་ ༢༠༡༡ ལོར་བོད་མིའི་སྒྲིག་འཛུགས་ཀྱི་ཕྱོགས་བསྡོམས་མ་དངུལ་སྒོར་ཡ་ས་ ༢༠༧༣་༤༩ ཡིན་པ་དང་། འདས་པའི་ལོ་ངོ་བཅུའི་ནང་བོད་མིའི་སྒྲིག་འཛུགས་ཀྱི་ཕྱོགས་བསྡོམས་མ་དངུལ་སྒོར་ས་ཡ་ ༢༠༠༦་༢༣ ཐམ་པ་འཕར་ཡོད། །