ཕྱི་ལོ་ ༢༠༢༡ ཟླ་ ༣ ཚེས་ ༩ རེས་གཟའ་མིག་དམར།  ༄༅། །ཕྱི་ལོ་ ༢༠༢༡ ཟླ་ ༣ ཚེས་ ༨ རེས་གཟའ་ཟླ་བ་ཉིན་བདེ་སྐྱིད་གླིང་ས་གནས་འཕྲོད་བསྟེན་སྨན་ཁང་དུ་ལྡེ་ར་ལྡུན་ཁྱབ་ཁོངས་བོད་མི་རྣམས་ཀྱི་ཆེད་ཏོག་དབྱིབས་གཉན་རིམས་ཀྱི་སྔོན་འགོག་སྨན་ཁབ་རྒྱག་སའི་ས་ཚིགས་ཤིག་གསར་འཛུགས་གནང་ཡོད།

དེ་ཡང་འདས་པའི་ཟླ་གྲངས་གཅིག་ཙམ་གྱི་རིང་ལྡེ་ར་ལྡུན་ཁྱབ་ཁོངས་བོད་མིའི་ས་གནས་འགོ་འཛིན་དང་ས་གནས་བོད་མིའི་འཕྲོད་བསྟེན་སྨན་ཁང་གི་འགན་འཛིན་སོགས་ནས་ལྡེ་ར་ལྡུན་ཁྱབ་ཁོངས་སྤྱི་ཁྱབ་སྨན་བཅོས་འགན་འཛིན་ལ་ཏོག་དབྱིབས་གཉན་རིམས་སྔོན་འགོག་སྨན་ཁབ་རྒྱག་ས་ཞིག་ཆེད་འཛུགས་ཆོག་པའི་ཞུ་སྐུལ་རིམ་པ་གནང་རྗེས་ཞལ་བཞེས་ཐོབ་ཡོད།ས་གནས་འཕྲོད་བསྟེན་སྨན་ཁང་དུ་ཏོག་དབྱིབས་གཉན་རིམས་སྔོན་འགོག་སྨན་ཁབ་རྒྱག་སའི་ས་ཚིགས་ཐོག་སྔོན་འགོག་སྨན་ཁབ་ཆེས་ཐོག་མ་དཔལ་ས་སྐྱ་༸གོང་མ་ཁྲི་ཆེན་རིན་པོ་ཆེ་མཆོག་ལ་བསྐྱོན་ཡོད་པ་དང་། དེ་ནས་ས་སྐྱའི་རྒྱལ་ཡུམ་ཆེན་མོ་བཀྲ་ཤིས་ལྷ་སྐྱིད་མཆོག ཚེ་དབང་སྤྲུལ་སྐུ། ས་སྐྱ་སྒྲོལ་མ་ཕོ་བྲང་གི་སྐུ་འཁོར་དགུང་གྲངས་ ༦༠ ཡན་ཕེབས་པ་རྣམས་ལ་སྔོན་འགོག་སྨན་ཁབ་རིམ་པ་དང་པོ་དེ་བསྐྱོན་ཡོད། ཉིན་རྒྱབ་བདེ་སྐྱིད་གླིང་གནས་འཁོད་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་བགྲེས་ཡོལ་དུ་ཕེབས་པ་རྣམས་ལ་སྔོན་འགོག་སྨན་ཁབ་རིམ་པ་དང་པོ་དེ་རྒྱབ་ཡོད།སྤྱིར་རྒྱ་གར་རྒྱལ་ཡོངས་སུ་ད་ལྟ་སྨན་ཁབ་རིམ་པ་གཉིས་པ་རྒྱག་འགོ་བཙུགས་ཡོད་པའི་ཁོངས་སུ་ལོ་ ༦༠ ཡན་ཆད་དང་། ལོ་ ༤༥ ཡན་ཆད་ཀྱི་བླ་གཉན་ནད་པ་ཚོ་ཚུད་ཀྱི་ཡོད་པ་བཞིན། ལྡེ་ར་ལྡུན་ཁྱབ་ཁོངས་སུ་སྡེ་ཚན་དེའི་ཁོངས་སུ་གཏོགས་པའི་བོད་མི་གྲངས་ ༡༥༠༠ ཙམ་ཡོད་འདུག་པ་དང་། ཉིན་གཅིག་ལ་མི་གྲངས་ ༡༠༠ ལ་སྔོན་འགོག་སྨན་ཁབ་རྒྱག་བཞིན་ཡོད་པ་བཅས། །