ཕྱི་ལོ་ ༢༠༢༡ ཟླ་ ༣ ཚེས་ ༥ རེས་གཟའ་པ་སངས།
༄༅། །འདི་གའི་གསར་འགོད་པ་བསོད་ནམས་དཔལ་ལྡན་ལགས་ཀྱིས་ས་གནས་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་རྒྱ་གར་བྱང་ཤར་ཁུལ་གྱི་བོད་མིའི་གཞིས་ཆགས་ཁག་དང་སྤོན་ཊ་ཆོལ་གསུམ་བོད་མིའི་གཞིས་ཆགས་བཅས་སུ་འཚམས་གཟིགས་ལེགས་གྲུབ་བྱུང་ཡོད།
དེ་ཡང་ཕྱི་ལོ་ ༢༠༢༡ ཟླ་ ༣ ཚེས་ ༣ རེས་གཟའ་ལྷག་པ་ཉིན་གྱི་ཕྱི་དྲོར་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་སྤོན་ཊ་ཆོལ་གསུམ་བོད་མིའི་གཞིས་ཆགས་སུ་ཕེབས་འབྱོར་སྐབས་མི་མང་ཡོངས་ནས་ཕེབས་བསུའི་སྣེ་ལེན་གཟབ་རྒྱས་ཞུས་པ་དང་འབྲེལ་ཕྱི་དྲོ་ཆུ་ཚོད་ ༧།༣༠ ཙམ་ལ་མི་མང་ཚོགས་ཁང་དུ་སྤོན་ཊ་ཆོལ་གསུམ་ལྷ་མོ་ཚོགས་པ་ནས་རིག་གཞུང་འཁྲབ་སྟོན་གཟིགས་འབུལ་ཞུས་ཡོད།
ཕྱི་ཚེས་ ༤ ཉིན་གྱི་སྔ་དྲོ་དཔལ་ལྡན་སྲིད་སྐྱིད་མཆོག་གིས་སྤོན་ཊ་ཆོལ་གསུམ་བོད་མིའི་གཞིས་ཆགས་ཀྱི་སྤྱི་པའི་ལུས་སྦྱོང་རྩེད་ར་གསར་པ་དབུ་འབྱེད་གནང་བ་དང་འབྲེལ་སྤོན་ཊ་ཆོལ་གསུམ་མི་མང་ཚོགས་ཁང་དུ་ས་ཌོན་ཁམས་ཀ་ཐོག་གི་ས་གནས་འགོ་འཛིན་དང་། ཀུམ་རའོ་སྒ་པ་ས་གནས་འགོ་འཛིན། ལྡེ་ར་ལྡུན་གྱི་ཁྱབ་ཁོངས་ས་གནས་འགོ་འཛིན་གྱིས་གཙོས་སྤོན་ཊའི་སེར་སྐྱ་མི་མང་དང་སཾ་བྷོ་ཌ་གཏན་སློབ་ཀྱི་སློབ་ཕྲུག་རྣམས་ལ་གསུང་བཤད་གནང་ཡོད།
མཛད་སྒོའི་ཐོག་མར་ས་གནས་འགོ་འཛིན་དགེ་ལེགས་འཇམ་དབྱངས་ལགས་ཀྱིས་ཕེབས་བསུའི་གསུང་བཤད་དང་འབྲེལ་ས་གནས་མི་མང་ཡོངས་ཀྱི་ཚབ་ཞུས་ཏེ་དཔལ་ལྡན་སྲིད་སྐྱོང་མཆོག་དང་ནང་སྲིད་དྲུང་འཕར་ཟླ་བ་ཚུལ་ཁྲིམས་ལགས་རྣམ་གཉིས་ལ་ཕྱག་རྟགས་ཕུལ་ཡོད།
དེ་རྗེས་དཔལ་ལྡན་སྲིད་སྐྱོང་མཆོག་གིས་མི་མང་ལ་གསུང་བཤད་གནང་བའི་ནང་། དཔལ་ལྡན་སྲིད་སྐྱོང་མཆོག་གིས་ཕྱི་ལོ་ ༢༠༡༡ ལོར་ཐོག་མར་སྲིད་སྐྱོང་ཆགས་པའི་སྐབས་ཤེས་ཡོན་ཡར་རྒྱས་གཏོང་རྒྱུ་ཡིན་ཞེས་གསུངས་པ་བཞིན་འདས་པའི་ལོ་ངོ་ལོ་བཅུའི་ནང་འཛིན་རིམ་བཅུ་པ་དང་བཅུ་གཉིས་ཀྱི་སློབ་ཕྲུག་རྣམས་ཀྱི་ཡིག་རྒྱུགས་གྲུབ་འབྲས་ལེགས་པོ་སོན་པ་དེ་ཤེས་ཡོན་ཡར་རྒྱས་ཕྱིན་ཡོད་སྐོར་དང་། དེ་བཞིན་བོད་མིའི་སྒྲིག་འཛུགས་ཀྱི་དཔལ་འབྱོར་འདུ་འགོད་ཡག་པོ་གནང་ཐུབ་ཡོད་སྐོར། ལྷག་པར་ཨ་རིའི་གཞུང་གིས་ཁྲིམས་སུ་གཏན་འབེབས་གནང་བའི་ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་ནང་བོད་མིར་རོགས་དངུལ་ཨ་སྒོར་ས་ཡ་དགུ་ལྷག་བཀའ་འཁྲོལ་གནང་ཡོད་སྐོར།
དེ་བཞིན་ཞུགས་སྒར་རྡ་རམ་ས་ལ་ནི་ས་གནས་གལ་ཆེན་པོ་ཞིག་ཆགས་ཡོད་པར་བརྟེན་གངས་སྐྱིད་ཁུལ་གྱི་ལས་ཁུངས་ཡོངས་རྫོགས་བོད་ལུགས་ལྟར་བཟོ་བཀོད་གནང་ཡོད་སྐོར་སོགས་ཀྱི་གསུང་བཤད་གནང་གྲུབ་མཚམས་ས་གནས་ཀྱི་གསར་འགོད་པའི་བཅར་འདྲི་དང་ལེན་གནང་ཡོད།
སྤྱིར་དཔལ་ལྡན་སྲིད་སྐྱོང་མཆོག་ད་ལམ་བཙན་བྱོལ་བོད་མིའི་གཞིས་ཆགས་ཁག་གཅིག་ནང་ཐུགས་རྗེ་ཆེ་ཞུའི་འཚམས་གཟིགས་ཕེབས་སྐབས་འབྲེལ་ཡོད་རྒྱ་གར་གྱི་མངའ་སྡེ་འབྲས་ལྗོངས་དང་། ཨ་རུ་ཎཱ་ཅལ། མེ་གྷཱ་ལཡ་བཅས་ཀྱིས་མངའ་སྡེའི་སྐུ་མགྲོན་གྱི་མཚན་ཐོག་ནས་མཐུན་འགྱུར་གང་ལེགས་གནང་ཡོད་པ་བཅས། །
